16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާ ކުރުމާ މެދު އިނގިރޭސިވިލާތުގެ ސަރުކާރުން މަޝްވަރާ ކުރަން ފަށައިފި އެވެ.
އިނގިރޭސިވިލާތުން މި މަޝްވަރާތައް ފަށާފައި މި ވަނީ، އޭއައި ބޭނުންކޮށްގެން އުފައްދާ ކުޑަކުދިންގެ އުމުރާ ނުގުޅޭ ކޮންޓެންޓު ވަރަށް ބޮޑަށް އިތުރުވެ އެ ކަމުގެ ކަންބޮޑުވުން އިތުރުވެފައި ވަނިކޮށެވެ.
އެގޮތުން އޭއައި ބޭނުންކޮށްގެން މީހުންގެ ފޮޓޯ ބަރަހަނާކުރެވޭ ގޮތް މަނާކުރަން އިނގިރޭސިވިލާތުން ވަނީ ނިންމާފައެވެ. އަދި ކުޑަކުދިން ގެންގުޅޭ ޑިވައިސްތަކުން ބަރަހަނާ މަންޒަރުތައް ނުބެލޭނެ ގޮތް ހެދުމަށްވެސް މަސައްކަތް ކުރަމުން އަންނަ ކަމަށް ރިޕޯޓުކޮށްފައި ވެއެވެ.
ޒުވާނުންގެ މެދުގައި މޯބައިލް ފޯނު ބޭނުންކުރުން މަދުކުރުމަށް އަޅާ ފިޔަވަޅުތަކުގެ ތެރެއިން 16 އަހަރުން ދަށުގެ ކުދިން ސޯޝަލް މީޑިއާ ބޭނުން ކުރުން މަނާ ކުރުމަށް އިނގިރޭސިވިލާތުން މަޝްވަރާ ކުރަން ފަށާފައި މި ވަނީ މިދިޔަ ޑިސެމްބަރު މަހުގެ 10ވަނަ ދުވަހު އޮސްޓްރޭލިޔާގައިވެސް އުމުރުން 16 އަހަރުން ދަށުގެ ކުދިން މީސްމީޑިޔާ ބޭނުންކުރުން މަނާކޮށްފައި ވަނިކޮށެވެ.
