ތައިލަންޑްގައި ދަތުރުކޮށްފައި ދިޔަ ރޭލެއްގެ މައްޗަށް ކޮންސްޓްރަކްޝަން ކްރޭނެއް ވެއްޓުމުގެ ސަބަބުން މަދުވެގެން 22 މީހުން މަރުވެއްޖެއެވެ.މިހާދިސާ ހިނގާފައިވަނީ މިއަދު އެތާ ގަނޑިން ހެނދުނު 9 ޖެހިއިރުއެވެ. މިހާދިސާގައި އިތުރު 80 މީހުންނަށް އަނިޔާވެފައިވާއިރު ރޭލުން އެވަގުތު 195 މީހުން ދަތުރު ކުރަމުން ދިޔަ ކަމަށް އޮފިޝަލުން މައުލޫމާތު ދީފައި ވެއެވެ.ރޭލު ދަތުރު ކުރީ ބެންކޮކުން ފުރައިގެން އިރު އުތުރު ޕްރޮވިންސަކަށް ދިއުމަށެވެ.
ސަލާމަތްވި މީހަކު ކިޔާދިން ގޮތުގައި ކްރޭން ރޭލުގެ މައްޗަށް ވެއްޓުމާއި އެކު އައި ޝޮކްގެ ބޮޑުކަމުން ބައެއްމީހުން ރޭލުން ބޭރަށް ވިއްސައިގެން ގޮސްފައި ވެއެވެ.

މިހާދިސާ ހިނގަން ދިމާވިގޮތް ތަހުގީގު ކުރަން ފަށާފައިވާ ކަމަށް ތައިލަންޑްގެ ސްޓޭޓް ރޭލްވޭގެ ގަވަނަރު ބުނެފައި ވެއެވެ.
ތައިލަންޑްގެ ރޭލު ނިޒާމުގެ ފެންވަރު ހިފެހެއްޓުމަށް ގަވާއިދުން މަސައްކަތް ކުރަމުން ނުދާތީ މިފަދަ ހާދިސާތައް ހިނގުމަކީ ދިމާވާ ކަމެކެވެ.
މިއަދު އެކްސީޑެންޑް ހިންގި ސަރަހައްދަކީ ތައިލަންޑާ ޗައިނާ ގުޅުވާދޭ ރޭލުގެ ނިޒާމެއް ގާއިމް ކުރުމަށް މަސައްކަތް ކުރިޔަށް ދިޔަ ސަރަހައްދެކެވެ. މިހާދިސާއާއި ގުޅިގެން ޗައިނާގެ ފޮރިން މިނިސްޓްރީގެ ތަރުޖަމާން ބުނެފައިވަނީ ރައްކާތެރިކަމާއެކު ޕްރޮޖެކްޓްތައް ހިންގުމުށާއި މަސައްކަތް ތެރިންގެ ސަމާމަތަށް ޗައިނާއިން އަބަދުވެސް އިސްކަން ދޭ ކަމަށާއި، މިހާތަނަށް މައުލޫމާތު ލިބިފައިވާ ގޮތުގައި ހާދިސާ ހިންގި ސަރަހައްދުގައި މަސައްކަތް ކުރަމުން އަންނަނީ ތައިލަންޑްގެ ކުންފުންޏަކުން ކަމުގައެވެ.
ބެންގކޮކާއި ޗައިނާގެ ކުންމިންގ ގުޅުވާ ދިނުމަށް ގާއިމްކުރާ ހައި ސްޕީޑް ރޭލް ލިންކަކީ 5.4 ބިލިއަންޑޮލަރުގެ އަގުހުރި ޕްރޮޖެކްޓެކެވެ.

އަޕްޑޭޓް: މި ހާދިސާގައި މަރުވި މީހުންގެ އަދަދު ވަނީ 32 އަށް އަރާފައި