ޙަގީގަތުގައި ދިވެހިންނަކީ ސައްތައިންސައްތަ މުސްލިމުން އުޅެންޖެހޭ ގޮތަށް އުޅެމުން ދިޔަ ބައެކެވެ. ނަމަވެސް އިޖުތިމާޢީ ގޮތުންނާއި ސުލޫކީ ގޮތުން ބަލާއިރު މިހާރު މިއޮތީ އަޚްލާޤީ ބަލިތަކުގެ ޝިކާރައަކަށް ވެފައެވެ. ދިރިއުޅުމަކީ ފަސޭހަކަމަކަށް ނުވާ ދަރަޖައަށް ޒުވާނުންގެ ސުލޫކު ވަނީ ފާސިދުވެފައެވެ.

މިގޮތުން ވައްކަން ކުރުމާއި، ޓެކުމާއި، ލޫޓޫވުމާއި، މީހުން މެރުމާއި، ޢިއްފަތް ފޭރުމާއި، މަސްތުވާ ތަކެތި ބޭނުންކުރުމާއި، އަދި މީހުންގެ ޙައްޤުތަކަށް އަރައިގަތުން ވަނީ އާއްމުކަމަކަށް ވެފައެވެ. މުޖުތަމައުގައި އެއްވެސް ހަމަޖެހުމެއް ސުލްޙަ މަސަލަސްކަމެއް ނެތެވެ. ރައްޔަތުންނަށް މަގުދައްކަން ތިބޭ ވެރީންނަށް ވެސް ގިނަފަހަރަށް ނިސްބަތްވަނީ ދައުލަތުގެ ފައިސާއަށް ޚިޔާނާތްތެރިވުމާއި މާލީ ފަސާދަ ހިންގާއަޑެވެ. ހެޔޮލަފާދާރު ކަމަށް ގަބޫލުކުރެވޭ ބައެއް އިސް ރަށްވެހިންނަށް ވެސް ގިނަފަހަރަށް ނިސްބަތްވަނީ ވައްކަމާއި މާލީ ފަސާދަ ހިންގާއަޑެވެ. ދާދި ފަހުން ސަރުކާރުގެ ބެލުމުގެ ދަށުގައި ބަނދަރުގައި ހުއްޓާ ގެއްލުނުކަމަށް ފެންމަތިވި ސިނގުރެޓި ކޮންޓެއިނާތަކުން ވެސް ގައުމުގެ ޙާލަތު ގޮސްފައިވާ ނުކިއްސަރު ހިސާބު އެނގެއެވެ.

އޭގެ ސަބަބުތައް ގިނައެވެ. އެ ސަބަބުތައް ދަނެގަނެ ޙައްލު ހޯދުމަކީ ގައުމީ ވާޖިބެކެވެ. ހަރުކަށިވެގެން އެއްވެސް ކަމެއް ޙައްލެއް ނުވާނެއެވެ. މިސަރުކާރުން ދުންފަތުގެ އިސްތިއުމާލު މަދުކުރުމުގެ ނަމުން އެޅި ހަރުކަށި ފިޔަވަޅުގެ ނަޖީއަކީ ފަހެ ކޮބައިތޯއެވެ؟! މިހާރު ފުލުހުން ދަނީ މަސްތުވާތަކެތި ނައްތާލާނެ ކަމަށް ބުނެ ހަރުކަށިކަން ދައްކަމުންނެވެ. ދަންނާށެވެ! ހަރުކަށިކަމަކީ އެއްވެސް ކަމެއްގެ ޙައްލެއްނޫނެވެ. ކަމެއް ޙައްލުކުރަން ބޭނުންވާނަމަ އެކަމެއްގެ އަސްލު ސަބަބު ދަނެގަނެ އެކަމަކަށް ދާއިމީ ހައްލެއް ހޯދާށެވެ.

އާދެ! އާއްމުގޮތެއްގައި މުޖުތަމަޢުގައި ފަސާދަ ގިނަވަން ދިމަވާ އެންމެ ބޮޑު އެއް ސަބަބަކީ ކުޑަކުދީންނަށް މިސްކިތުން ލިބެންޖެހޭ ތަރުބިއްޔަތު ލިބުމުގެ ދޮރު މުޖުތަމައަށް ހުޅުވާލެވިފައި ނުވާތީއެވެ. ކުޑަކުދީންނަށް ތަރުބިއްޔަތު ލިބޭނީ މައިގަނޑު ގޮތެއްގައި ތިން ތަނަކުންނެވެ. އެއީ މަދުރަސާއާއި ގެއާއި އަދި މިސްކިތެވެ. މީގެ ތެރެއިން މިސްކިތްތަކުން ކުޑަކުދީންނަށް ލިބެން ޖެހޭ ތަރުބިއްޔަތުގެ އެއްވެސް މިންވަރެއް ރާއްޖޭގެ މިސްކިތްތަކުގައި އިންތިޒާމު ކުރެވިފައެއް ނެތެވެ. ކަންމިހެން އޮތުމާއި އެކު އެ ކުޑަކުދީން މާދަމާ ބޮޑުވެގެން ބަދަލުވަނީ މަސްތުވާތަކެތި ބޭނުންކުރާ މީހަކަށެވެ. ނުވަތަ ދުންފަތުގެ އިސްތިއުމާލުކުރާ މީހަކަށެވެ. ނުވަތަ ވައްކަންކުރާ މީހަކަށެވެ. ވީމާ އެ ކުޑަކުދީން މާދަމާ ބޮޑުވާއިރު ރަނގަޅު ފަރުދެއްގެ ގޮތުގައި ދެމިހުރުމަށް ޓަކައި ބޭނުންވާ ރޫޙާނީ ފަރުވާ ( ރޫޙާނީ ވެކުސިން ) އެކުދީންގެ ޅަފަތުގައި ދޭންޖެހެއެވެ. އެ ވެކުސިން ނުދީ ބޮޑުވެއްޖެ ނަމަ ހަރުކަށިކަން ދެއްކުމަކުން ދެނެއް ކުރެވޭނެ އިތުރުކަމެއް ނޯއްނާނެއެވެ. ވީމާ މި ދިވެހި އުއްމަތް އަނބުރާ އިސްލާޙު ކުރުމަށް ދިނީ ގޮތުން ކުރެވޭ އަޅުގަނޑުގެ ތަސައްވުރު ތިރީގައި އެވަނީއެވެ.

ހައްލު:

ހ- މިސްކިތުގައި ޤުރުއާނާއި ޙަދީސުތައް ހިތުދަސްކުރުމުގެ ކުލާސްތައް ގާއިމުކުރުން :

     މިސްކިތުގެ ދައުރު އިހުޔާކޮށް މިސްކިތުން ލިބެން ޖެހޭ ތަރުބިއްޔަތު މުޖުތަމައަށް ލިބިދިނުމަށް ޓަކައި ޤުރުއާން ހިތުދަސްކުރުމުގެ ކަރިކިއުލަމަކާއި އިސްލާމީ އަޚުލާގުގެ މައްޗަށް ބިނާކުރެވިފައިވާ ހަދީސުގެ ތަރުބަވީ ކަރުކިއިލަމަށް (ގުރޭޑު 4ން ގުރޭޑު 8އަށް އަމާޒުކޮށްގެން) އުފައްދައި ސަރުކާރުގެ ޚަރަދުގައި އެ ކުލާސްތައް ރާއްޖޭގެ މިސްކިތްތަކުގައި ހިންގުމެވެ.

އެ ގޮތުން މިސްކިތުގައި ސަރުކާރުން އުފައްދާ ޤުރުއާން ހިތުދަސްކުރުމުގެ ކުލާހުގައި ބައިވެރިވެގެން ތަރުތީބުން ކުލާހަށް ހާޒިރުވެ ކޮންމެ ހަފުތާއަކު ކަނޑައެޅިފައިވާ މިންވަރަށް ޤުރުއާނާއި ހަދީސްތައް ހިތުދަސްކުރާ ކުދީންނަށް ކޮންމެ މަހަކު ޖީބުޚަރަދެއްގެ ގޮތުގައި އެ ވަގުތަކަށް ސަރުކާރުން ކަނޑައަޅާ ފައިސާގެ މިންވަރެއް ދިނުމެވެ. ސަރުކާރުގެ އަމާޒަކަށް ވާންވާނީ ގުރޭޑު އަށެކަށް ދަރިވަރު ދާއިރު ޤުރުއާން ހިތުދަސްވެފައި ހުރުން ނުވަތަ ހިތުދަސްވާން ކައިރިވެފައިވުމެވެ. އަދި އޭގެއިތުރުން ދަރިވަރަށް މުސްލިމެއްގެ ކިބައިގައި ހުންނަން ޖެހޭ އަޚްލާޤީ ސިފަތައް ލިބިގަނެވޭ މިންވަރަކަށް ނަބަވީ އިރުޝާދުތައް ހިތުދަސްވެފައިހުރުމެވެ.

މި އެޖެންޑާ ތަންފީޒުކުރެއްވިއްޖެ ނަމަ ދަރީން ފާސިދުވެދާނެތީ މައިން ބަފައިން މިހާރު ގަންނަ ބިރު ގަންނާކަށެއް ނުޖެހޭނެއެވެ. ކުއްޖާ ހަތް އަހަރުން ފެށިގެން ބޮޑުވަމުން ދާނީ ދީނީ މާހައުލެއްގައެވެ.

ށ- ވަޢުޡާއި ނަސޭޙަތަށް ޚާއްސަ ކަރުކިއުލަމެއް ތައްޔާރުކޮށް ތަންފީޒުކުރުން :

މުޖުތަމައުގައި އިސްލާމީ ސަގާފަތް ފެތުރުމަށް ޓަކައި ބޭނުންވާ މައުލޫމަތު އެކުލެވޭ ކަރިކިއުލަމެއް ތައްޔާރުކޮށް ޚަބަރު ފޮނުވާ ވަސީލަތް މެދުވެރިކޮށް ވަޢުޡާއި ނަސޭހަތް މުޖުތަމައުގައި ވަށައި ދައުރުވާ ގޮތަކަށް އިންތިޒާމު ކުރުމެވެ. ދަނެއު، މިހާރުވެސް އިސްލާމީ ވުޒާރާއިން ވަޢުޡާއި ނަސޭހަތަށް ކުރިޔަށް ގެންދެއެވެ. އަދި އެކަމަށް ބޮޑު ހޭދައެއްވެސްކުރެއެވެ. ނަމަވެސް ކުރާ ޚަރަދަށް ވުރެ އޭގެ އަސަރު ކުޑަކަމަށް ބެލެވެއެވެ. އޭގެ އެއް ސަބަބަކީ ބޭނުންކުރެވޭ ކަރުކިއުލަމު މުޖުތަމައުގެ އިސްލާހަށް އަމާޒުކުރެވިފައިނުވާތީކަމަށް ފެނެއެވެ. މި މައްސަލައަކީ ޒަމާނުއްސުރެން އަޅުގަނޑު ކަންބޮޑުވާ މައްސަލައެކެވެ. އެހެންކަމުން އަލުގަނޑު މިހުންނަނީ އެފަދަ ކަރުކިއުލަމެއް އުފައްދާނަމޭ ހިތުލައިގެންނެވެ. ނަމަވެސް އެކަމަށް ބޭނުންވާ އެއްބާރުން ލިބޭނެ މަގެއް ފަހިވެފައިނުވަތީ މަޑުޖެހިފައިވަނީއެވެ. އިރާފުޅުކުރެއްވިއްޔާ، ފުރުސަތެއް ލިބުނުހާއަވަހަކަށް އެކަމުގައިއުޅޭނަމެވެ.  އޭގައި ހިމެނޭ މައުޟޫޢުތައް ތިރީގައި އެވާ ލިންކުންވެސް ވިދާޅުވެލައްވާށެވެ.