މި ދުވަސްވަރު މީޑިއާތަކުން އެންމެ ކުލަ ގަދަކޮށް ފެންނަނީ ފަލަސްތީނުގެ މިނިވަން ދައުލަތެއް އުފެއްދުމާއި އެ ދައުލަތް ގިނަ ގައުމުތަކަކުން ގަބޫލުކުރަން ރާވަމުން ގެންދާ މައުޟޫއެވެ. އަޅުގަނޑުމެންގެ ކިއުންތެރިން އެކަން ހިނގަމުންދާގޮތް އެނގެން ބޭނުންވާނެ ކަމަށް ދެކެމެވެ.

ސުރުޚީގައި އެވަނީ ފަހަކަށް އައިސް ދިވެހިން އުފައްދައިގެން ކިޔާއުޅުނު ފާޑެއްގެ މުހާވަރާ އިބާރާތެކޭ ބުނެވިދާނެއެވެ. އަޅުގަނޑުމެންގެ މިލިއުމާ ގުޅުން ހުރިކަމަށް ފެންނާތީ ބޭނުން ކޮށްލީއެވެ.
ފަލަސްތީނުގެ މިނިވަން ދައުލަތެއް މިހާރަކު ނެތެވެ. އެކަމަކު ދުނިޔޭގެ އެންމެ ބާރުގަދަ ޖަމާއަތް ”ދަ ޔުނައިޓެޑް ނޭޝަންސް“ ގެ 193 މެމްބަރު ގައުމުގެ ތެރެއިން އެ ދައުލަތް ރަސްމީގޮތުން ގަބޫލުކޮށް އިގްރާރުވާ 147 ގައުމު އެބައޮތެވެ. އިތުރު ބައެއް ގައުމުތަކުން ދާދި އަވަހަށް ފަލަސްތީނުގެ މިނިވަން ދައުލަތެއް ގަބޫލުކުރާނެ ކަމަށް ބެލެވެއެވެ. އޭގެ ތެރޭގައި ޔޫރަޕުގެ އެންމެ ބާރުގަދަ ގައުމުތަކުގެ ތެރޭގައި ހިމެނޭ ފަރަންސޭސި ވިލާތާއި ކެނެޑާ އަދި އިނގިރޭސި ވިލާތުގެ އިތުރުން މޯލްޓާ ވެސް ހިމެނޭނެކަމަށް ވެއެވެ. އަޅުގަނޑުމެންގެ ސުރުޚީގައި އެބުނަނީ ހަމަ އެ ވާހަކައެވެ. އެއީ ވާ އެއްޗެކެވެ، އަދި ނުވާ އެއްޗެކެވެ. އަމުދުން ވާ ނުވާ ނޭނގޭ އެއްޗެކެވެ.
މީގެ އަހަރުތަކެއް ކުރިން ފަލަސްތީނުގެ މިނިވަން ދައުލަތް ގަބޫލުކޮށްފައިވާ ގައުމުތަކާއި އަދި ކައިރި މުސްތަގްބަލެއްގައި ގަބޫލުކުރަން ރާވާފައިވާ ގައުމުތައް ގުޅިގެން އިގްރާރުވެ ގަބޫލުކޮށްފައިވާ ފަލަސްތީނުގެ މިނިވަން ދައުލަތުގެ އިން ފާހަގަކުރެވިފާއޮތީ ހުޅަނގު އައްސޭރިއާއި ގައްޒާ ވެސް ހިމެނޭ ގޮތުގައި އަދި އިރުމަތީ ގުދުސްއަކީ އެ ދައުލަތުގެ ވެރިކަންކުރާ ރަށް ކަމުގައި ބަލާފައިވާ ޚިޔާލީ ރޮނގުތަކެއްގެ ސިފައިގައެވެ. އެ ރޮނގުތަކުގެ މެދުގައި މިހާރުވެސް ހުރީ ގަދަކަމުން ވެރިވެ ގަނެގެން އުޅޭ އިސްރާއީލުންގެ ދިދައެވެ. ފަލަސްތީނީންގެ އާބާދީތައް ވިއްސި ވިހާލި ކުރަމުން އެ ތަންތަނުގައި އެ ގެންދަނީ ޔަހޫދީން އާބާދު ކުރުވަމުންނެވެ. އިސްރާއީލާއެކުގައި އެމެރިކާ އޮތުމުގެ ސަބަބުން އެކަން ހުއްޓުވޭނެ ގޮތެއް ނެތެވެ.
ޔޫރަޕްގެ ބާރުގަދަ ގައުމުތަކަކުން ވުޖޫދުގައި ނެތްނަމަވެސް ފަލަސްތީނުގެ މިނިވަން ދައުލަތެއް އޮންނަންޖެހޭނެ ކަމަށް އިގްރާރުވެ އެ ދައުލަތް ގަބޫލުކޮށްފިނަމަ އެ ދައުލަތުގެ އިންފާރު މި ވަގުތު ރޭނުމުގެ ފުރަސަތު ނުލިބުނު ކަމުގައިވިޔަސް އެ ކަމަށް މަގުފަހި ވެގެން ދާނެކަމަށް އުންމީދު ކުރެވެއެވެ. އަދި އެ މަގު ދިގުދެމިގެން ދިޔަވަރަކަށް ދުނިޔޭގެ ކުރިމަތީ އިސްރާއީލް އެކަހެރިވެ ބަދުނާމުވުންވެސް އިތުރުވެގެން ދާނެއެވެ. ދުނިޔޭގެ ޖިއޯ-ޕޮލިޓިކްސްވެސް ބަދަލުވަމުންދާ މި ދުވަސްވަރު އެމެރިކާއަށް ވެސް އެކަން ހުއްޓުވިދާނެ ކަމަކަށް ނުފެނެއެވެ.
ޖޯރޖްޓައުން ޔުނިވަރސިޓީ ސެންޓަރުގެ އަރަބިންނާބެހޭ ތަޖްރިބާކާރު ޚާލިދު އަލްގިންޑީ ވިދާޅުފައިވާ ފަދައިން ފަލަސްތީނުގެ މިނިވަންދައުލަތެއްގެ މަލަމަތިވެސް ފެންނަން ނެތް އިރެއްގައި އެ ކަމަށް މަސައްކަތްކުރަމުން ގެންދާ ކަމަށް ވަކާލާތު ކުރާ ގައުމުތަކުން އެ ކުރާ ކަމަކީ މުސްތަގްބަލްގެ ޖީލްތަކަށް ”ފަލަސްތީނުގެ މިނިވަންދައުލަތެއް ގާއިމްކުރުމަށްޓަކައި އަހަރެމެން ގުރުބާނީތަކެއް ވީމޭ ބުނެ ޔައުމިއްޔާ ފޮތުގައި ލިއެލަން“ ކުރާ ކަމެކެވެ. ފަލަސްތީނުގެ 2 މިލިއަން މީހުންގެ ގެދޮރު ސުންނާފަތިކޮށްލައި ވަކިއުމުރެއް ޖިންސެއް ނުބަލާ ތާރީޚުން ނުދެކޭފަދަ އަނިޔާވެރި ގޮތްގޮތަށް އެމީހުން މަރަމުން ދެންތިބި ބަޔަކަށް ކާންބޯން އަދި ފެންލިބޭނެ ހުރިހާ މަގުތަކެއް ބަންދުކޮށް ބަނޑަށް މަރަމުން ގެންދާއިރު 150 ގައުމުން ބައިވެރިވެގެންވެސް އެކަން ނުހުއްޓުވުމުން އެހެން ރަނގަޅު ކަމެއް ކޮށްދެވިދާނެތޯ އެތައް ސަތޭކަ ސުވާލު އުފެދެއެވެ.
ހުޅަނގުގެ ގައުމުތަކުން އުންމީދު ކުރަނީ ފަލަސްތީނުގެ މިނިވަން ދައުލަތް ޑިމޮކްރެސީގެ އުސޫލުން ވުޖޫދުކުރެވިގެން ދިއުމަށެވެ. މިކަމަށްޓަކައި ހަމާސްއިން ހަތިޔާރު ބަހައްޓައި މަހްމޫދު އައްބާސްގެ ސަރުކާރަށް ބައިއަތު ހިފުން މިހާރު ވަނީ ޝަރުތުވެސް ކޮށްފައެވެ. އެކަމަކު މަހްމޫދު އައްބާސްއަކީ އިސްރާއީލާ އެއްކޮޅަށް މާ ބޮޑަށް ދީލާ ލައްވާފައި ހުންނަވާ ބޭފުޅެއް ކަމަށް ފަލަސްތީނުގެ ގިނަ ރައްޔިތުން ތުހުމަތުގެ އިނގިލި ދިއްކުރެއެވެ. އިސްރާއީލުގެ ޖަލުތަކުގައިތިބި ފަލަސްތީނުގެ ޖިހާދީންނަށާއި ފަލަސްތީނު މިނިވަންކުރުމުގައި ޝަހީދުވެގެން ގޮސްފައިވާ މުޖާހިދުންގެ އާއިލާތަކަށް ސަރުކާރުން ދެމުން ގެންދިޔަ އިނާޔަތް ކަނޑާލުމަކީވެސް އިސްރާއީލުން ރުއްސުމަށްޓަކައި މަހްމޫދު އައްބާސް އެޅުއްވި ފިޔަވަޅެއްމަކަށް ފަލަސްތީނުގެ ގިނަބަޔަކު ތުހުމަތު ކުރެއެވެ.
ފަލަސްތީނުގެ މިނިވަންދައުލަތެއް ލިބުމަށް ފަލަސްތީނަށް ނިސްބަތްކުރެވޭ ރައްޔިތުން ބޭނުންވާނެ ކަމާދޭތެރޭ ހަމަ އެކަކުވެސް ޝައްކެއް ނުކުރާނެއެވެ. އަދި މުސްތަގްބަލްގައި ސުލްހައިގެ ވާހަކަތަކަށް ފުރުސަތެއް ލިބިއްޖެނަމަ ފަލަސްތީނުންވެސް މިނިވަން ދައުލަތެއްގެ ހައިބަތާއެކު ތަމްސީލު ކުރުމަކީ ފައިދާކުރާނެ މަގާމެކެވެ. އަދި މިހާރުން މިހާރަށްވެސް ފަލަސްތީނުގެ ބިމުގައި އިސްރާއީލުން ރައްވެހި ކުރުވުން ހުއްޓުމަށް ބާރު އެޅޭނެއެވެ. އެކަމަކު ގައުމެއް ލިބުމުގެ ކުރިން ދިރިހުރެވޭނެ ގޮތެއް ބޭނުންވާނެއެވެ. މިނިވަން ކަމާއެކު ދިރި ހުރުމަށްޓަކައި ކެއިން ބުއިމާއި ގައިން ތާހިރުވެ އުޅުމުގެ ވަސީލަތްތައް ބޭނުންވާނެއެވެ. އެ ހުރިހާވަސީލަތަކުން މަހްރޫމް ކުރުމަށްފަހު ގައުމެއް ލިބުމަކުން ލިބޭނެ ހިތްހަމަޖެހުމެއް ނޯންނާނެއެވެ. ފަލަސްތީނުގެ މިނިވަން ދައުލަތަކަށް ތާއީދުކޮށް ވަކާލާތު ކުރަމުން ގެންދާ ގައުމުތަކާއި އަދި މުއްސަނދި އަރަބި ގައުމުތަކަށް ލިބިފައިވާ ބާރުގެ ބޭނުންކޮށްފިނަމަ ފަލަސްތީނުގެ މުޅި މައްސަލަ ހައްލުކުރުމަކީ ވަރަށް ފަސޭހައިން ކުރެވިދާނެކަމެއް ކަމުގައި ގަބޫލުކުރާ ގިނަ އެނަލިސްޓުން ތަކެއްގެ ރައުޔު ޕްރައިވެޓް މީޑިއާތަކުން ފެންނާން އެބަހުއްޓެވެ. ފަލަސްތީނުގެ ސިޔާސީ ވިސްނުމުގެ ބޭފުޅަކުކަމުގައިވާ ފަތުހީ ނިމްރް ވެސް ވަނީ މި މޭރުމަކުން އެ ބޭފުޅާގެ ރައުޔު ހާމަކުރައްވާފައެވެ.
އިސްރާއީލާއި ފަލަސްތީނުގެ ދެކޮޅުވެރިކަމާބެހޭގޮތުން ނިއު ޔޯރކް ސިޓީއަށް އިސްރާއީލުން ކުރިން ކަނޑައަޅާފައިހުރި ކޮންސަލް ޖެނެރަލް އަދި ސިޔާސީ އެނަލިސްޓް އެލޯން ޕިންކާސް ބުނެފައި ވެއެވެ. ޔޫރަޕްގެ ގައުމުތަކުން އިސްރާއީލާ ދެކޮޅަށް ތެދުވާން ޖެހުމާއި ބައިނަލް އަގްވާމީ މައިދާނުގައި އިސްރާއީލު އެކަހެރިވެގެން ހިނައިދާނެ ކަމުގެ ބިރު އުފެދިފައިމިވަނީ ޓްރަމްޕް އޭ ކިއުނު މީހެއްގެ ދެއުޅި އެއްނުވާ ސިޔާސަތުގެ ސަބަބުންނެވެ.
ފަލަސްތީނުގެ މައްސަލައަށް ދާއިމީ ހައްލެއް ގެނެވޭނެ ހަމައެކަނި ގޮތަކީ ފަލަސްތީނުގެ ބިމަށް ބެލްފޯރ ޑިކްލަރޭޝަނުންނޭ ކިޔާފައި މިހާރު ވެރިކުރުވާފައި މިއޮތް އިސްރާއީލުގެ އެނެއްފަޅީގައި ފަލަސްތީނުގެ މިނިވަން ދައުލަތެއް ގާއިމް ކުރެވިގެންކަމުގައި ހަމައެކަނި 2 ގައުމެއް ފިޔަވައި ދުނިޔޭގެ ހުރިހާ ގައުމަކުން ގެންދަނީ ބުނަމުންނެވެ. އެ ގައުމުތަކުގެ ލީޑަރުން އެކަމަށްޓަކައި ކުރައްވާ މަސަކަތުގައި މާތް ރަސްކަލާންގެ ބަރަކާތްލައްވައި ފަލަސްތީނުގެ މިނިވަން އަމާން ދައުލަތެއް ދުށުމުގެ އުންމީދު އަޅުގަނޑުމެންވެސް ކުރަމެވެ.