ބޭނުންވާ ތަކެތި:
ބޮޑު 2 އަލުވި
1 ފިޔާ
2 ލޮނުމެދު
1 ތޮޅިމިރުސް
2 ހިކަނދިފަތް
1 ސައިސަމުސާ ރާޅުކޮށް މުގުރާފައިހުރި މިރުސް
1/2 ސައިސަމުސާ ރީނދޫ
1/2 ސައިސަމުސާ ދިރި (ނުމުގުރާ)
1 ސައިސަމުސާ ލޮނު
2 މޭޒުމަތީސަމުސާ ތެޔޮ
1 މޭޒުމަތީސަމުސާ ކޮށާފައިހުރި ކޮތަނބިރިފަތް (ކޮރިއަންޑާ ލީވްސް)
ތައްޔާރުކުރާނެ ގޮތް:
އަލުވިތައް ރިހަޔަށް ކޮށާހެން ކޮށާލާފައި ބައި ސައިސަމުސާ ލޮނު އަޅައިގެން ފެނުކައްކާލާށެވެ. ފެނުކައްކާނީ އަލުވިތައް ޗަސްނުވާވަރަށެވެ.
ފިޔާ ތުނިކޮށް ކޮށާލާށެވެ. ލޮނުމެދު ގާނާލާށެވެ. މިރުސް ދެފަޅި ކޮށްލާފައި ކޮންމެ ފަޅިއެއް ދެބުރިއަށް ބުރިކޮށްލާށެވެ.
އަލުވިތައް ކެކުމުން ފެން ލުހެލާފައި ބަހައްޓާށެވެ. ތަވަޔަށް ތެޔޮފޮދު އެޅުމަށްފަހު އަލުވިތައް ކުޑަކޮށް ތެއްލާލާށެވެ. 2 މިނިޓެއްހާއިރު ތެއްލުމުން ރަނގަޅުވާނެއެވެ. ތެއްލާނީ ދޭފަތުން ހުއްޓާނުލައި ހަލުވަމުންނެވެ.
ފިޔާ، މިރުސް، ދިރި އަދި ހިކަނދިފަތް ހަމަ އެ ތެޔޮފޮދުގައި މީރުކޮށްލާށެވެ. ފިޔާތައް ބިއްލޫރި ކުލަޔަށް އެރުމުން ލޮނުމެދު އަޅައި އެއްކޮށްލާށެވެ. އެއަށްފަހު މުގުރި މިރުސް، ރީނދޫ އަދި ލޮނު އަޅައިގެން އެއްކޮށްލާށެވެ.
އަލުވިކޮޅު އޭގެތެރެއަށް އަޅައި ރަނގަޅަށް އެއްކޮށްލުމަށްފަހު މަޑުގިނީގައި މަތިޖަހައިގެން ކައްކާލާށެވެ. މިނިޓެއްހާއިރު ކައްކާލުމުން ރަނގަޅުވާނެއެވެ.
ކޮށާފައި ހުރި ކޮތަނބިރިފަތްކޮޅު އޭގެމައްޗަށް ބުރުވާލާށެވެ.
