ބޭނުންވާ ތަކެތި:
3 މޭޒުމަތީސަމުސާ މައިލޯ
1 ދަޅު ގެރިކިރު
8 ބިސް
5މލ ވެނީލާ އެސެންސް
2 މޭޒުމަތީސަމުސާ ހަކުރު
1 ސައިސަމުސާ ބަޓަރު

ތައްޔާރުކުރާނެ ގޮތް:
މިކްސަރުން ބިސްތައް ގިރާލާށެވެ. ބިސްތައް ގިރުމުން އެއަށް ގެރިކިރު، އެސެންސް އަދި މައިލޯ އަޅައިގެން ގިރާލާށެވެ.
ބަޓަރުކޮޅު ތަވައެއްގައި ވިރުވާލާފައި އޭގެތެރެއަށް ހަކުރު އަޅައިގެން މުށިކުލަ އަރަންދެން ވިރުވާލާށެވެ.
ގާތްގަނޑަކަށް 10 އިންޗި ހުންނަވަރުގެ ތައްޓަކަށް ނުވަތަ ޓްރޭއަކަށް ހަކުރުގަނގު އެޅުމަށްފަހު ރަނގަޅަށް ފަތުރާލާށެވެ. ގިރާފައި ހުރި ޕުޑިންގ ފުރާނާލާފައި ޓްރޭއަށް އަޅާލާށެވެ. މަތީގައި ފޮނު ހުރިނަމަ ފޮނުތައް ނެގުމުން ޕުޑިންގ ފިހެވޭއިރު އޮމާންކޮށް އޮންނާނެއެވެ.
ޕުޑިންގ އެޅުމަށްފަހު ޓްރޭގެ މަތީގައި ފޮއިލް އަޅައި ވަށައިގެން ރަނގަޅަށް ބަންދުކޮށްލާށެވެ. އޭގެމަތީގައި ވަޅިން ނުވަތަ އުލުން ލޯވަޅުތަކެއް އަޅާލާށެވެ.
ތެއްޔެއްގެ ތެރެއަށް ތެލި ބަހައްޓާކަހަލަ ނަރުގަނެއް ލުމަށްފަހު އެއަށް 2 ޖޯޑު ފެން އަޅާފައި ނަރުގަނޑުމަތީގައި ޓްރޭ ބައިންދާށެވެ. އެއަށްފަހު ތެލީގެ މަތިޖަހައިގެން ކައްކާލާށެވެ. ކައްކާނީ ގިނި މާ ގަދަނުކޮށެވެ. ގިނި ގަދަވާނަމަ ޓްރޭގެ ތެރެއަށް ފެން އެޅިފާނެއެވެ.
ގާތްގަނޑަކަށް 10 މިނިޓުން ފިހެވޭނެއެވެ. ފިހެވުނުތޯ ބެލުމަށް ޓްރޭގެ މެދަށްވާހެން ޓޫތުޕިކެއް ނުވަތަ އުލެއް، ޓްރޭގެ ފުލުގައި ޖެހެންދެން ހަރާލާށެވެ. ހަރާލާފައި ނަގާއިރު ޕުޑިންގ ހޭކިފައި ނެތްނަމަ ފިހެވުނީއެވެ. ޕުޑިންގ ނުފިހެވެނީސް ތެލިން ފެން ހުސްވާނަމަ ފެންފޮދެއް އަޅާލާށެވެ.
ޓްރޭ ނަގާފައި ކުޑަކޮށް ހިހޫވެލުމުން އައިސްއަލަމާރިއަށް ލާފައި ގަޑިއެއްހާއިރު ފިނިކޮށްލަން ބަހައްޓާށެވެ. ފިނިކުރަން ބޭނުންނުވާނަމަ ފިނިނުކޮށްވެސް ކެވޭނެއެވެ.
ކާންވުމުން މައްޗަށް ހިކި މައިލޯކޮޅެއް ބުރުވާލުމުން މީރުވާނެއެވެ.