ހައިކޯޓުގެ ކުރީގެ ފަނޑިޔާރު ޝުޢައިބު ޙުސައިން ޒަކަރިއްޔާ މިއަދު އަވަހާރަވެއްޖެއެވެ.
މައުލޫމާތު ލިބިފައިވާ ގޮތުގައި ޝުޢައިބު އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށެވެ.
އުމުރުން 55 އަހަރުގައި ޝުޢައިބު އަވަހާރަވީ މާލޭގައެވެ.
ޝުޢައިބުގެ މައްޗަށް ކުރެވޭ ކަށުނަމާދު އޮންނާނީ މިރޭ 23:00 ގައި އާސަހަރާ މިސްކިތުގައެވެ.
ޝުޢައިބު ވަނީ 11 އަހަރު ވަންދެން ހައިކޯޓުގެ ފަނޑިޔާރުކަމުގެ މަގާމު ފުރުއްވައިފައެވެ.
ހައިކޯޓުގެ ފަނޑިޔާރު ކަމަށް އޭނާ އައްޔަންކުރައްވައިފައިވަނީ 2011 މާޗު 26 ގައެވެ. އެ މަގާމުން އޭނާ ރިޓަޔާ ކުރެއްވީ 2022 ވަނަ އަހަރުގެ ނޮވެމްބަރު 22 ގައެވެ.
ޝުޢައިބު އަވަހާރަވުމާ ގުޅިގެން މިއަދު އިރުއޮއްސި 18:00 އިން ފެށިގެން މާދަމާގެ އިރުއޮއްސި 18:00 އަށް ކޯޓުތަކުގެ ދިދަ ބައިދަނޑިއަށް ތިރިކުރަން އުއްތަމަ ފަނޑިޔާރު މުޢުތަސިމް ޢަދުނާން ނިންމަވާފައިވާ ކަމަށް ސްޕްރީމް ކޯޓުން މިރޭ ވަނީ ބުނެފައެވެ.
