މަޖީދީ މަގުގެ ހަލާކުވެފައިވާ ސަރަހައްދުތައް މަރާމާތު ކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
ސިޓީ ކައުންސިލުން ކުރި ޕޯސްޓެއްގައި ބުނީ މާލެސިޓީގެ މަގުތަކުގެ ޙާލަތު ދެނެގަނެ، ކުރިމަތިވާ މައްސަލަތައް ޙައްލު ކުރުމަށް ކުރެވުނު ސާވޭގެ ތެރެއިން، މަޖީދީ މަގުގެ އެންމެ ބޮޑަށް ފެންބޮޑުވާ ސަރަޙައްދުތައް މަރާމާތު ކުރުމުގެ މަސައްކަތް ފަށާފައިވާ ކަމަށެވެ.
އެގޮތުން ސިޓީ ކައުންސިލުން ވަނީ އެ ކައުންސިލުގެ މުވައްޒަފުން ޗާންދަނީމަގާއި ރަށްދެބައިމަގު މަރާމާތު ކުރުމުގެ މަސައްކަތް ކުރަމުން އަންނަ ފޮޓޯތައް އާންމުކޮށްފައެވެ.
ހަމައެހެންމެ މި މަސައްކަތް ނިމޭއިރު މަޖީދީމަގުގެ އެ ސަރަހައްދުން ފެން ބޮޑުވުމުގެ ސަބަބުން، ހިނގާ މީހުންނަށާއި ދުއްވާތަކެއްޗަށް ކުރިމަތިވާ އުނދަގުލަށް ހައްލު ލިބިގެންދާނެ ކަމަށްވެސް އެ ކައުންސިލުން ވަނީ ބުނެފައެވެ.
މީގެ އިތުރުން މާލޭ ސިޓީ ކައުންސިލުން ވަނީ މާލޭގެ މަގުތަކުގައި ބޭނުންނުކޮށް ބަހައްޓާފައި ހުންނަ އުޅަނދުތައް ނަގައި، މިހާރު ހުރި ޕާރކިން ޖާގަތައް ބޭނުން ކުރާނެ ރަގަޅު ގޮތްތަކެއް ހޯދައި، މާލޭގެ މަގުތައް ބޭނުންކުރާ ފަރާތްތަކަށް،ތޮއްނުޖެހި ދަތުރުކޮށް އުޅެވޭނެ ގޮތްތައް ހޯދުމާއި ގުޅޭގޮތުންވެސް ޓްރާންސްޕޯޓު މިނިސްޓްރީ އަދި ފުލުހުންގެ އިސްވެރިންނާއެކު މިއަދު މަޝްވަރާކޮށްފައެވެ.
