ދިވެހިންގެ އެހީގައި އެފްރިކާ ޓެންޒޭނިއާގެ ޓަންގާ އަވަށުގައި މިސްކިތެއް ބިނާކޮށްފިއެވެ.
މިއީ ރާއްޖޭގެ ޖަމްއިއްޔާއެއް ކަމަށްވާ ޚިދުމަތް ޖަމްއިއްޔާގެ ފަރާތުން މިދިޔަ ރަމަޟާން މަހު ހުޅުވައިލި މިސްކިތު ފަންޑަށް ދިވެހި ރައްޔިތުން ދިން ދީލަތި އެހީގައި ޓެންޒޭނިޔާގައި ބިނާ ކުރެވުނު ދެވަނަ މިސްކިތެވެ.
ޚިދުމަތް ޖަމްއިއްޔާއިން ފޭސްބުކްގައި ކުރި ޕޯސްޓެއްގައި ބުނީ މިއީ އެތައް އަހަރެއް ވަންދެން ޓަންގާ މިސްކިތެއް ނެތި، ދުރު ހިސާބުތަކަށް ދަތުރުކޮށް ޖަމާއަތުގައި ނަމާދުކުރާ ގިނަ ރައްޔިތުން ދިރިއުޅޭ ކަމުގެ މައުލޫމާތު ލިބިފައިވާތީވެ އެ ޖަމިއްޔާއިން ޚާއްސަ އިސްކަމެއްދީގެން ކުރެވުނު ބުރަ މަސައްކަތެއް ކަމަށެވެ.
އެ ޖަމްއިއްޔާއިން ބުނީ ސިޓީ ދަރަޖައިގެ ސަރަހައްދުތަކުގައި އާންމުކޮށް މިސްކިތް ބިނާކުރުމަށް ކުރާ މަސައްކަތަށްވުރެ މިކަހަލަ އަވަށްތަކުގައި ބިނާކުރާ މިސްކިތް ތަކަށް ކުރާ ޚަރަދު އިތުރުވެ, އަދި މަސައްކަތަށް ބޭނުންވާ ސާމާނު އަވަށާ ހަމައަށް ފޯރުކޮށްދިނުމުގައި އެތައް ގޮންޖެހުންތަކެއް ހުންނަ ކަމަށެވެ.
ނަމަވެސް މި މަސައްކަތް ކާމިޔާބުކަމާއެކީ ނިންމާ ލެވިފައިވާކަމަށް ޚިދުމަތް ޖަމްއިއްޔާއިން ބުންޏެވެ.
މިފަދަ ޕްރޮޖެކްޓްތައް ކާމިޔާބުކަމާއެކީ ނިންމާލެވިފައިވަނީ ހަގީގަތުގައިވެސް ދިވެހި ރައްޔިތުން ދެއްވާ ދީލަތި އެހީގެ ސަބަބުންކަން ފާހަގަކޮށް، ޚިދުމަތް ޖަމްއިއްޔާއިން ވަނީ ދިވެހި އެންމެހައި ރައްޔިތުންނަށް ޝުކުރު އަދާކޮށްފައެވެ.
