ސީރިޔާގެ ދިމިޝްގަށް ވާސިލު ވުމަށްޓަކައި ހަނގުރާމެވެރިޔާ އަބޫ މުހަންމަދު އަލް ޖަލާނީގެ ދަތުރަކީ ދިގު ދަތުރެކެވެ. އޭނާގެ ކާމިޔާބީ ފާހަގަކުރުމަށް ޓަކައި ދިން ޚުތުބާގައި އެ ދަތުރުގެ މައްޗަށް އަލި އަޅުވާލިއެވެ

ވިއްސަކަށް އަހަރު ކުރިން އަލްގާއިދާގެ އާދައިގެ ހަނގުރާމަވެރިއެއްގެ ގޮތުގައި ގުޅުނު އަބޫ މުހަންމަދު އަލް ޖަލާނީ ގެ ވާހަކައިގާ އޭނާގެ ދިގު ދަތުރުގައި އަލްގާއިދާގެ ފިކުރު އެއްފަރާތްކުރުމަށްފަހު އިސްލާމް ދީނުގެ ތަފާތު މަޒްހަބުތައް އޭގެ ޒާތުގައި ގަބޫލުކުރަން ފެށުނުގޮތުގެ މައްޗަށް ވެސް އަލިއަޅުވާލިއެވެ. ދެން އަޅުގަނޑުމެން މި ބަލަނީ އޭނާގެބަހުން އެކަންތައް ކިޔާދިންގޮތް ސަންދާނުގެ ކިއުންތެރިންނާ ހަމަޔަށް ގެނެސްދެވޭތޯއެވެ.
“ އެއީ ދިގު ދަތުރެކެވެ. ދަތުރުގެ އެންމެހާ ކަންތައްތައް ތަރުތީބުކޮށް ރާވައިގެން ހިންގުމަށް ފުރުސަތު ލިބުނެވެ. ކޮން ތަނަކަށް ކޮން ވަގުތަކު ދިއުމާ ދޭތެރޭ ގޮތެއް ކަނޑައަޅަން ވަގުތު ލިބުނެވެ. އޭނާއަށް ތާއީދުކޮށް މި މަގާމަށް އައުމުގައި ބައިވިރިވި މީހުނަނަށް އޭނާގެ ބާރު ކަނޑުވާލެވިދާނެ ކަމަށާއި އެމީހުން ބޭނުންވާ މުއްދަތަކަށް ބާރުގައި ބެހެއްޓިދާނެކަން ފާހަގަކުރިއެވެ.
އަބޫ މުހަންމަދު އަލް ޖަލާނީގެ ފުރަތަމަ ތަގްރީރު ދިނުމަށްޓަކައި ދިމިޝްގުގެ މަޝްހޫރު ގަނޑުވަރެއް ނުވަތަ ޓެލިވިޒަން ސްޓޭޝަނެއް ގެ ބަދަލުގައި ދިމިޝްގުގެ މަޝްހޫރު އުމައްޔަދު މިސްކިތް އިޚްތިޔާރު ކުރުމަކީ ހައިރާން ވާން ޖެހޭ ކަމެއް ނޫނެވެ. އެ މިސްކިތަށް 1300 އަހަރު ވެފައިވާއިރު އަދި ދުނިޔޭގެ އެންމެ މަޝްހޫރު މިސްކިތްތަކުގެ ތެރޭގައި އެ މިސްލިތް ހިމެނެއެވެ.
އަހަރެންގެ އަޚުންނޭވެ ! މިއީ މުޅި އިސްލާމީ އުންމަތަށް ލިބުނު ކާމިޔާބީއެކެވެ. އެއީ މިހާފަސޭހައިން ބައްޝާރުލް އަސަދުގެ ޚުދުމުޚްތާރު ވެރިކަން ވައްޓާލެވުނީތީ އެކަމަށް އިޝާރާތްކޮށް އޭނާއާ އެކު ޖިހާދުކުރުމުގައި ބައިވެރިވި ހަޔާތު ތަހްރީރް އަލް ޝާމްގެ ހަނގުރާމަވެރިންނަށް މުޚާތަބުކޮށް ބުނި ވާހައެއް ކަމަށް ބެލެވެއެވެ. އެއަށްފަހު ސީރިޔާގެ ހަނގުރާމައިގާ ޝަހީދުވެ ގޮސްފައިވާ މީހުންގެ ހުވަފަތް އަނބިންނާއި ޔަތީމް ދަރިންވެސް އެ މެސެޖްގައި ބައިވެރިކުރިއެވެ. މިއީ ޖަލުގެ ދަގަނޑު ތޭރިތަކުގެ ތެރޭންލާފައި ކާމިޔާބު ކުރެވުނު އުދަނގޫ ކާމިޔާބީ އެކެވެ.
އޭނާގެ ވާހަކައިގާ ސީރިޔާއަށް އަލިއަޅުވާލަމުން ބުނެފައިވަނީ މި ގައުމަކީ މާތް ﷲ އިޚްތިޔާރު ކުރައްވާފައިވާ ގައުމެއް ކަމަށެވެ. އެކަމުގައި އަހަރެމެންގެ އަގީދާއާއި އަޅުކަންކުރުމުގެ ގޮތްތަކާއި އާދަކާދަ ވަރަށް މުހިންމު ދައުރެއް އަދާކުރެއެވެ. އޭނާގެ މިވާހަކައިގެ އަމާޒަކީ ސުންނީ މުސްލިމުންނެވެ. ޝިޔާއީ މުސްލިމުންނާއި ނަސާރާ އިންނާއި އަލަވައިޓުންނާއި ޑުރޫޒުންނަށް ނުސީދާގޮތެއްގައި އިނގިލި ދިއްކުރުން ކަމުގައި ތަރުޖަމާކުރެވުނެވެ. އަދި އޭނާގެ މި ވާހަކަތަކުން ސީރިޔާގެ ރައްޔިތުންގެ މެދުގައި އުފެދިފައިވާ އެއްބައިވަންތަކަން އުވިގެން ހިނގައިދާނެ ކަމަށްވެސް ބެލެވުނެވެ. ސީރިޔާގެ އާބާދީގައި އެންމެ ގިނައީ އަސަދުގެ އާއިލާވެސް ނިސްބަތް ކުރެވޭ އަލާވައިޓް މަޒްހަބުގެ މީހުންނެވެ.
އަބޫ މުހަންމަދު އަލް ޖަލާނީގެ ވާހަކައިގާ ހާމަކުރިގޮތުގައި އީރާނުންކޮރަޕްޝަނާއި ފަސާދަ އާންމު ކުރުމުގެ ބޭނުމުގައި ސީރިޔާ ބޭނުންކުރަނީ ފުޓުބޯޅަ ބިމެއްގެ ގޮތުގައެވެ. އެކަމަކު ދެން ސީރިޔާގެ ކަންތަކާ ބެހުމުގެ ފުރުސަތު އީރާނަކަށް ނުލިބޭނެ ކަމަށް އޭނާގެ ވާހަކައިގާ ބުނެފައިވެއެވެ.
ޓްރަމްޕް ގެ ސަރުކާރުން ގެންގުޅޭނެ ސިޔާސަތާ ދޭތެރޭ ޚަބަރުދާރުވެ ތިބުމަށްވެސް އޭނާގެ ވާހަކައިގާ ބާރު އަޅާފައިވެއެވެ. އެމެރިކާއިން އޭނާގެ ބޮލަށް 10 މިލިއަން ޑޮލަރުގެ އަގެއް ކަނޑައަޅާފައިވާކަންވެސް އޭނާ ފާހަގަ ކުރިއެވެ.
އަބޫ މުހަންމަދު ޖުލާނީ ވާހަކަ ދައްކަމުން ދިޔައިރު މޫނުމަތިން ކޮންމެވެސް ވަރެއްގެ ނުތަނަވަސް ކަމެއް ހާމަވަމުން ދިޔައެވެ. އަރަބިންގެ ޓީ ވީ ޗެނަލެއް ބޭނުންކުރުމުގެ ބަދަލުގައި ސީ އެން އެން ބޭނުންކުރަން އޭނާ ގަސްދުކުރީ އޭނާގެ މަގްސަދު އެމެރިކާގެ ރައީސް ބައިޑްނައާއި އަދި އިންތިޚާބީ ރައީސް ޓްރަމްޕް އަށްވެސް އެންގުމުގެ ބޭނުމުގައި ކަމަށް ވެއެވެ. ޖަލާނީގެ ވާހަކަ އަޑުއިވުމުން ރައީސް ބައިޑްން ވިދާޅުވި ކަމަށްވަނީ “ އޭނާ އެ ދެއްކީ ރަނގަޅު ވާހަކަތަކެއް ކަމަށެވެ. އެކަމަކު ކުރިއަށް އޮތްތަނުގައި އޭނާ ކަންތައް ކުރާގޮތެއްވެސ ޖެހޭނީ ބަލާށެވެ. ”ޖަލާނީގެ ވާހަކަ ނިންމާލަމުން ބުނެފައިވަނީ ސީރިޔާ މިއޮތީ ބާރުގަދަ ހުރިހާ މަސްތުވާ ތަކެއްޗެއްގެ ހާއްޔަކަށް ވެފައެވެ. އެންމެ ފުރަތަމަ ޖެހޭނީ މި ގައުމު ދޮވެ ސާފުކުރާ ށެވެ. ”
ސީރިޔާގައި ޒަމާންތަކަކަށް ހިންގަމުން ދިޔަ ގޮށްމުށުގެ ބާރުގެ ވެރިކަން ނިމުމަކަށް ގެނެވުނު އިރު އެ ގައުމުގެ ރައްޔިތުން އަޅުވެތި ކޮށްފައިތިބި މިނަވަރާދޭތެރޭ މީޑިއާތަކުން ގެނެސްދެމުންގެންދާ ޚަބަރުތަކުގެ ކޮންމެވެސް ވަރެއް ސަންދާނު ކިއުންތެރިންގެ މައުލޫމާތަށްޓަކައި ގެނެސްދޭން އަޅުގަނޑުމެން ބޭނުމެވެ.
މިދިޔަ އަންގާރަ ދުވަހު ސީރިޔާގެ ވެރިރަށް ދިމިޝްގުގެ ރަށްބޭރަށް އެ ގައުމުގެ ރައްޔިތުން ޖަމާވަމުން ދިޔައީ އެތައްޒަމާނަކަށް ގޮށްމުށުގެ ބާރުން ވެރިކަންކުރި ޑިކްޓޭޓަރ ގައުމުދޫކޮށް ފިލައިގެން ދިއުމުން ކޮންމެވެސް ވަރެއްގެ ހިތްހަމަޖެހުމަކާ އެކުގައެވެ. އެހެންނަމަވެސް އެ ކުޑަކުޑަ ހިތްހަމަ ޖެހުމަށް ހިޔަނި އެޅިފައި އޮވެދާނެ ބިރުވެރިކަމެއް ހިތުން ފިލައިގެން ނުދެއެވެ.
އެއްވި މީހުންތައް ދުވަމުން ދިޔައީ އެތަނުގައި ހުރި ސޭދްނާޔާ މިލިޓްރީ ޖަލާ ދިމާލަށެވެ. ލޯބިވާ ބަފައިނންނާއި ދަރިން ފިރިން ދިރި ތިއްބާ ފެނިދާނެ ކަމުގެ ކުޑަކުޑަ އުންމީދަކާއި އެކުގައެވެ. އެ ޖަލަކީ އެގައުމުގެ ރައްޔިތުންގެ ތެރޭގައި މަޝްހޫރު ވެފައިވާ އިންސާނުންކަތިލާގެއެވެ.
އެން ބީ ސީ ގެ ރިޕޯރޓަރުން އެތަނަށް ދިޔައިރުވެސް އެސަރަހައްދުގެ ނުރައްކާތެރިކަން ތަސައްވުރު ކުރެވުނެވެ. ގައުމުގެ ރައްޔިތުން ފުނިޖެހެމުން ދިޔައީ ދަރިންނާއި ބަފައިންނާއި ފިރިން ދިރިތިއްބާ ފެނިދާނެ ކަމުގެ އުންމީދަކާއެކުގައެވެ. އެއްވެފާއޮތް މީސްތަކުން ރޯއި ހޭރެމުންތޮއްޖެހެމުން ދިޔަމަންޒަރު ބަލަން ކުޅަދާނައެއް ނޫނެވެ. އެތަނަށް ވަންނާން ޖެހިއްޖެ މީހަކު އަނބުރާ ނިކުތުމަށް ފުރުސަތެއް ނޯންނާނެކަން އެންމެނަށްވެސް އެނގެއެވެ. އެ ހިސާބުން އެމީހަކު ނެތުމުގެ ތެރެއަށް ގެއްލިގެން ދިޔައީ އެވެ.
ހިއުމަން ރައިޓްސް ގުރޫޕް ތަކުން ބުނެފައިވާ ގޮތުގައި މިއީ ސިއްރު ތަންތަނެއް ނޫނެވެ. އަސަދު އާއިލާގެ 50 އަހަރު ވީ ވެރިކަމުގައި ސަރުކާރާ ދެކޮޅަށް ބަސްބުނުމާއި ފާޑުކިއުމުން އެމީހެއްގެ ކައްވަޅަކީ އެތައް އަނިޔާއެއް ކުރުމަށްފަހު ސޭދްޔާނާ ޖަލުކަމަށް ވެގެން ދާނެއެވެ. އަންގާރަ ދުވަހު ނަސީބު ރަނގަޅުކަމުން ޖަލުން ސަލާމަތްވީ މީހުން މައުލޫމާތު ހާމަކޮށްފައިވާ ގޮތުގައި އެ ޖަލުތަކަށް ވައްދާ މީހުންނަށް އިންސާނީ ތާރީޚުން އެނގިފައިނުވާފަދަ އަނިޔާވެރިކަމާ ކުރިމަތިލާން ޖެހެއެވެ. އެތަނުގެ ތެރޭގައި ލުއި އެއްވެސް އަނިޔާއެއް ނޯވެއެވެ. އަދަބު ދިނުމަށް ބޭނުން ކުރަނީ އާންމުގޮތެއްގައި ކޯރާޑިއާއި ބޮޑު މަރުތޭލައެވެ. ޖަލުގެ އެއްފަރާތެއްގައި ބިޔަ 2 ދަގަނޑު ފިލާ ހައިޑްރޯލިކް މެޝިނާ ގުޅާފައި ހުއްޓެވެ. ޖަލުން ސަލާމަތްވީ މިޙުން މީޑިއާއަށް ކިޔާދިން ގޮތުގައި އެއީ އެކްސިކިއުޝަން ޕްރެސް އެވެ. ނުވަތަ ޖަލުގެ ގައިދީންގެ ކުރިމަތީގައި އެ 2 ފިލާގެ މެދުގައި މަރަން ބޭނުންވާމީހާ ބެހެއްޓުމަށްފަހު ހައިޑްރޯލިކް ގެ ބާރުގައި 2 ފިލާ ކައިރިއަށްގެނެސް އެމީހާއާއެކު ފިއްތާލަނީއެވެ.
މިއީ އިސްލާމީ ދައުލަތެއްގައި ވެރިކަން ކުރަމުންދިޔަ ގޮތުގެ ކުޑަކުޑަ ތަންކޮޅެކެވެ. އަޅުގަނޑުމެން މިއަށްވުރެން ތަފްސީލުކޮށް މިވާހަކަތައް ލިޔަން ބޭނުމެއްނުވެއެވެ