ރާއްޖެއަށް މަލްޓި ޕާޓީ ސިސްޓަމް އައުމާ ހިސާބުން ފެށިގެން ސަރުކާރުތަކުން އައީ ވައްކަން ކުރަމުން ކަމަށާއި، ވައްކަން ކުރި މީހުން ތިބީ ހިމާޔަތާއި، ސަލާމަތާއި ރައްކާތެރިކަމުގައި ކަމަށް ވެލިދޫ ދާއިރާގެ މެންބަރު މުޙައްމަދު ޢައްބާސް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު، އިގުތިސާދީ ކޮމިޓީން ނިންމި ގޮތުގެ ރިޕޯޓަށް ބަހުސްކުރައްވަމުން ޢައްބާސް ވިދާޅުވީ ނިމިދިޔަ ސަރުކާރުން ކޮށްފަ ހުރި ވައްކަންތަކާއި ޖަރީމާތައް ބޮޑުކަމުން މި ރާއްޖޭގެ ރައްޔިތުން މިއަދު މިވަނީ ވަރަށް ބޮޑަށް ބިކަވެފައި ކަމަށެވެ.
ގައުމުގެ އިގުތިސާދު ވަނީ މާދަމާ ކަންވެގެންދާނޭ ގޮތް ނޭނގޭފަދަ ފުން ވަޅުގަނޑަކަށް ވެއްޓިފައި ކަމަށެވެ.

“މވައްކަން ކުރުމުގެ ސަގާފަތުގެ ވާހަކަދައްކާނަމަ، ރާއްޖެއަށް މަލްޓި ޕާޓީ ސިސްޓަމް އައިސް މި ޑިމޮކްރަސީ އައުމަށްފަހު 2008 އިން ފެށިގެން އައީ ވައްކަން ކުރަމުން
ވައްކަން ކުރި މީހުން ވެސް އެ ތިބީ ހިމާޔަތާއި، ސަލާމަތާއި ރައްކާތެރިކަމުގަ.“

ވައްކަން ކުރި ކުންފުނިތަކުގެ ވެރިން ވެސް ތިބީ މިލިއަނަރުންނަށްވެފައި ކަމަށް ޢައްބާސް ވިދާޅުވިއެވެ. ފެނަކައިގެ އެމްޑީއަކަށް ހުންނެވި ބޭފުޅާ ވެސް އެތައް ބިލިއަން ރުފިޔާގެ ވައްކަންކޮށްފަ ނުލާހިކު އަރާމު ދިރިއުޅުމެއްގައި އުޅުއްވަމުން ގެންދަވާ ކަމަށް ޢައްބާސް ވިދާޅުވިއެވެ.

“ކުރަންވީހާ ވެސް ކަމަކީ ވައްކަން ކުރި ހުރިހާ އެންމެން ހިފާ ހައްޔަރުކޮށް އެ މީހުންނާ، މި ހެދިފަ ހުރި ގާނޫނުތައް އަރާ ހަމަކުރަންވީ.“

ވައްކަން ނުކުރާނަމަ މި ސައުތު އޭޝިޔާގައި ރާއްޖެއަށްވުރެ މުއްސަނދި ގައުމެއް ނޯންނާނެ ކަމަށް ޢައްބާސް ވިދާޅުވިއެވެ.