ގދ.ތިނަދޫގެ އާބާދީގައި 10,000 މީހުން ހަމަނުވަނީސް، ސިޓީއެއްގެ ދަރަޖަ ދީފައިވާތީ އެކަން ބާތިލުކުރަން އެދި ހައިކޯޓަށް ދުސްތޫރީ މައްސަލައެއް ހުށަހަޅަފިއެވެ.

މި މައްސަލަ ހުށަހެޅުއްވީ އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު އަދިގާނޫނީ ވަކީލު މުޙައްމަދު ރާގިބެވެ.

މި މައްސަލަ ރައްދުކޮށްފައިވަނީ ރައީސުލްޖުމްހޫރިއްޔާގެ އޮފީހަށެވެ.

މައްސަލައިގައި ބުނެފައިވަނީ ކުރީ ސަރުކާރުގައި ރައީސުލްޖުމްހޫރިއްޔާގެ ގަރާރަކުން ތިނަދުއަށް ސިޓީއެއްގެ ދަރަޖަ ދީފައިވަނީ އެ ރަށު ކައުންސިލުން ދީފައިވާ ދޮގު މައުލޫމާތުތަކެއްގެ މައްޗަށް ބިނާކޮށް ކަމަށެވެ.

މައްސަލާގައި ފާހަގަކޮށްފައިވާ ކަންކަން:

ތިނަދޫ ކައުންސިލު އިދާރާއިން އެ ރަށުގެ އާބާދީގެ ރަސްމީ އަދަދު ހިއްސާކޮށްފައިވަނީ އޮޅުވާލައިގެން.

އެ ރަށުގެ އާބާދީއަކީ 10,150 މީހުން ކަމަށް ބުނެފައިވާއިރު، އެކެއްގެ ނަމުގައި އެއް އައިޑީ ކާޑު ނަންބަރަށްވުރެ ގިނަ ނަންބަރު ބޭނުންކޮށްފައިވޭ.

އެކެއްގެ ނަން އެއްފަހަރަށްވުރެ ގިނަ ފަހަރު ލިސްޓުގައި ހިމަނާފައިވޭ. އަދި މަރުވެފައިވާ 115 މީހުންގެ ނަން ވެސް ލިސްޓުގައި ހިމަނާފައިވޭ.

ކައުންސިލުގެ އިދާރާގެ ރަޖިސްޓްރީއާއި، ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރް) ގެ ރަޖިސްޓްރޭޝަނުގައި ވަރަށް ބޮޑު ފަރަގެއްވޭ. ޑީއެންއާރްގެ ރަޖިސްޓްރޭޝަނުން ދައްކާ ގޮތުން މި މަހުގެ 17 ވަނަ ދުވަހުގެ ނިޔަލަށް ތިނަދޫގެ އާބާދީއަކީ 7,924 މީހުން.

އެހެންކަމުން ރާގިބުގެ މައްސަލާގައި އެދިވަޑައިގެންފައިވަނީ ތިނަދުއަށް ސިޓީއެއްގެ ދަރަޖަ ދީފައިވަނީ ގާނޫނާ ޚިލާފަށް ކަމަށް ކަނޑައަޅުއްވައިދެއްވުމަށާއި، އެ ރަށަށް ސިޓީއެއްގެ ދަރަޖަ ދިނުމަށް ނިންމަވައި ރައީސުލްޖުމްހޫރިއްޔާ ނެރުއްވި ގަރާރު ބާތިލުކޮށްދެއްވުމަށެވެ.