ގެދޮރު އިމާރާތްކުރުމަށް ބޭނުންވާ ފަރާތްތަކަށް ދޫކުރަން ހަމަޖެހިފައިވާ ލުއި ލޯނު ޕްރޮގްރާމް ”ހިޔާވަހި ފައިނޭންސިން ސްކީމް“ މިއަދު އިފްތިތާހުކޮށްފިއެވެ.

މި ސްކީމް އިފުތިތާހުކޮށްދެއްވީ މިކަމަށް ޚާއްސަކޮށް އިސްލާމީ މަރުކަޒުގެ ޖަލްސާ ކުރާ މާލަމުގައި މިއަދު ބޭއްވި ހަފުލާއެއްގައި ރައީސް ޑރ. މުޙައްމަދު މުޢިއްޒެވެ.

ހިޔާވަހި ފައިނޭންސިން ސްކީމަކީ ގެދޮރު އިމާރާތްކުރަން ބޭނުންވެފައިވާ ފަރާތްތަކަށް މާލީ އެހީތެރިކަން ދިނުމަށް ސަރުކާރުން ފަށަން މަސައްކަތްކުރާ ސްކީމެކެވެ.

ހިޔާވެހި ފައިނޭންސިންގެ ތެރެއިން ތިން ބާވަތެއްގެ ލޯނު ދޫކުރުމަށް ވަނީ ހަމަޖެހިފައެވެ.

1.ހިޔާވެހި ރަށްވެހި:

މި ލޯނު ދޫކުރާނީ އެޗްޑީއެފްސީ މެދުވެރިކޮށް ހަމައެކަނި އަތޮޅުތެރޭގެ ރަށްރަށުގައި ގެ ހެދުމަށް.

މި ލޯނަށް އިކުއިޓީއެއް ދައްކާކަށް ނުޖެހޭނެ.

ނަމަވެސް މިނިސްޓްރީން ކަނޑައަޅާ އަގެއްގައި ބަންޑާރަ ގޯތި މިލްކްކުރަން ފީއެއް ދައްކަން ޖެހޭނެ.

2.ހިޔާވެހި ސަހަރު :

މިއީ އާބަން ސެންޓަރުތަކުގައި ގެދޮރު އަޅަން ދޫކުރާ ލޯނެއް.

މި ލޯނަށް ދޫކުރާނީ ޖުމްލަ 3 މިލިއަން ރުފިޔާ.

މި ލޯނުގެ އިންޓަރެސްޓަކީ 5 އިންސައްތަ.

ލޯނު އަނބުރާ ދައްކަން 25 އަހަރު ލިބޭނެ.

3.ހިޔާވެހި ފުރަމާލެ :

މިއީ މާލެ ސަރަހައްދުގައި ގެދޮރު އަޅަން ދޫކުރާ ލޯނެއް.

ޖުމްލަ 6 މިލިއަން ރުފިޔާ ދޫކުރާނެ.

އިކުއިޓީއަށް 10 އިންސައްތަ ނަގާނެ.

މި ލޯނު ދޫކުރާނީ 5 އިންސައްތަ އިންޓްރެސްޓްގައި.

އެއީ 25 އަހަރުން އަނބުރާ ދައްކާ ގޮތަށް.

600 އަކަފޫޓަށްވުރެ ކުދި ބިންތައް އެއްކޮށްލައިގެން ގެ ހަދަން ވެސް މި ސްކީމުން ލޯނު ދޫކުރާނެ.

މި ސްކީމްގެ ދަށުން ލޯނަށް އެދޭ ފަރާތަކީ ސަރުކާރުގެ ބޯހިޔާވަހިކަމުގެ ދަށުން ފްލެޓެއް ނުވަތަ ހައުސިން ޔުނިޓެއްފަދަ ބޯހިޔާވަހިކަމެއް ހުރި ފަރާތަކަށްވެގެންނުވާނެއެވެ.

މި ހަފުތާ ނިމުމުގެ ކުރިން މި ސްކީމާ ބެހޭ އުސޫލުތަކާއި ގަވާއިދުތަކާއި ޝަރުތުތައް ގެޒެޓްކުރާނެ ކަމަށް ހައުސިން މިނިސްޓްރީން ވަނީ ބުނެފައެވެ.