1988 ނޮވެމްބަރު 3 ވަނަ ދުވަހު ރާއްޖެއަށް އުދުވާނީ ހަމަލާއެއް ދިން މައްސަލާގައި ބައިވެރިވިކަމުގެ ތުހުމަތުގައި ޖަލު ހުކުމެއް އައި ސިއްކަ އަޙްމަދު އިސްމާޢީލް މަނިކުގެ ދިފާއުގައި ކުރީގެ ރައީސް މުޙައްމަދު ނަޝީދު އާ ވާހަކަތަކެއް ދައްކަވައިފިއެވެ.

ނަޝީދުގެ ނުރަސްމީ އެކްސް އެކައުންޓުން ރޭގެ ވަގުތެއްގައި ކުރެއްވި ޕޯސްޓެއްގައި ވިދާޅުވީ 1988 ނޮވެމްބަރު 3 އާ ގުޅޭ ގޮތުން ސިއްކައަށް އެނގި ހުރި މިންވަރަށް އެނގި ތިބި ކިތަންމެ ބަޔަކު އެބަ ތިބި ކަމަށާއި، ސިއްކަ އޮތީ އޭރުގެ ރައީސް މައުމޫން ޢަބްދުލްޤައްޔޫމް އަރިހުގައި އޭނައަށް އެނގޭ މިންވަރު މާކުރިން ދަންނަވާފައި ކަމަށެވެ.

ނަޝީދު ވިދާޅުވީ ސިއްކަ އަނދަގޮނޑި ޖަހައި، ޗޭނު ޖަހައި، އަނިޔާކޮށް، ރައީސް މައުމޫން އެދިވަޑައިގަންނަވާ ގޮތަށް ބަޔާން ނެގި ކަމުގައި ވިޔަސް އެއީ ކަން ހިނގާދިޔަ ގޮތްކަމަށް މިއަދު ދެކޭނަމަ އެއީ ވަރަށް ބޮޑު ދެރައެއް ކަމަށެވެ.

“ކޮންމެ ނޮވެމްބަރު 3 ގައި ރައީސް މައުމޫނަށް ސަނާ ކިޔައި، އަދި ސިއްކައާއި އޭނާގެ އާއިލާ ބަދުނާމު ކުރަމުން މި ގެންދަނީ ވަރަށް ބޮޑު ބޭއިންސާފެއްގައި.“ ބޮޑުބޭބެއާ ގުޅޭ ގޮތުން ނަޝީދު ވިދާޅުވިއެވެ.

ނޮވެމްބަރު 3 ގެ ހަމަލާގެ މައްސަލާގައި ސިއްކައަށް އިއްވީ 15 އަހަރުގެ ޖަލު ހުކުމެކެވެ. ނަމަވެސް އެ ހުކުމަށް ތިން އަހަރު ވެސް ނުވަނީސް ރައީސް މައުމޫން، އޭނާއަށް މާފުދެއްވައި ބަންދުން ދޫކޮށްލެއްވީއެވެ.

ސިއްކަ އަޙްމަދު އިސްމާޢީލް މަނިކަކީ ކުރީގެ ރައީސް އިބްރާހިމް މުޙައްމަދު ޞާލިޙްގެ އަނބިކަނބަލުން ފަޒްނާ އަޙްމަދުގެ ބައްޕައެވެ.