ގެދޮރުވެރިޔާ ސްކީމްގެ ދަށުން ފުލެޓް ލިބޭ މީހުންގެ ފައިނަލް ލިސްޓް އަންނަ ނޮވެމްބަރު މަހުގެ ދެވަނަ ހަފުތާގައި އާންމުކުރަން މަސައްކަތް ކުރަމުން އަންނަ ކަމަށް ހައުސިންގ މިނިސްޓްރީން މިއަދު ބުނެފިއެވެ.
ކުރީ ސަރުކާރުން، ފުލެޓު ލިބޭ ފަރާތްތަކުގެ ދާއިމީ ލިސްޓް އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަަށް ތުހުމަތުކޮށް، އާންމު ފަރާތަކުން އެންޓި ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހެޅިއެވެ.
އެކަމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅުގެ މަތިން، “ހައުސިންގ އެޑްވައިޒަރީ ކޮމިޓީ“ އެއް އެކުލަވައިލިއެވެ. އަދި މާލެ ސިޓީ ކައުންސިލުން “ހައުސިންގ ކޮންސަލްޓެޓިވް ކޮމިޓީ“ އެއް އެކުލަވައިލިއެވެ.
މިނިސްޓްރީން މިއަދު ނެރުނު ބަޔާނެއްގައި ބުނީ އެ ކޮމިޓީން ވެސް ގެދޮރުވެރިޔާ ސްކީމްގެ ދާއިމީ ލިސްޓް އެކުލަވާލައިފައިވާ ގޮތް ރަނގަޅު ކަމަށް ނުފެންނަ ކަމަށެވެ.
އެހެންކަމުން މި ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ އިވެލުއޭޓްކުރުމުގެ މަސައްކަތް ފަށާފައިވާ ކަމަށާއި، މި މަސައްކަތް ފުރިހަމައަށް ނިންމާލުމަށް އިތުރު ވަގުތު ބޭނުންވާ ކަމަށް މިނިސްްޓްރީން ބުންޏެވެ.
އެހެންވެ މަސައްކަތް ކުރަމުންދަނީ އަންނަ ނޮވެމްބަރުމަހުގެ ދެވަނަ ހަފުތާގެ ނިޔަލަށް ފުލެޓުގެ ވަގުތީ ލިސްޓް އާންމުކުރުމުގެ މަސައްކަތްތައް ކުރުމަށް ކަމަށް މިނިސްްޓްރީން ބުންޏެވެ.
