ރާއްޖޭގެ އަންހެނުންގެ އާބާދީގެ 40 އިންސައްތަ އަންހެނުންނަކީ އެކަނިވެރި މައިންނެވެ. މީގެ ތެރޭގައި ގިނައީ 20 އަހަރާއި 35 އަހަރުގެ އަންހެނުންނެވެ. ކައިވެނި ރޫޅިފައިވާ މިއިން ކޮންމެ އަންހެނަކަށް ލިބިފައި ވަނީ އެއްދަރި ނުވަތަ ދެ ދަރިންނެވެ. އެހެން ކަމުން ދައުލަތުން އެ ދެއްވާ ދެހާސް ރުފިޔާއަކުން މިދެންނެވި އެކަނިވެރި މައިންނަކަށް ދެކޮޅެއް ނުޖެހެއެވެ. މިފަދަ އަންހެން ކުދީންގެ ތެރެއިން ވަޒީފާ އަދާކުރަނީ 10 އިންސައްތަ އަންހެނުންނެވެ.

ގިނަ އަންހެނުންނަށް ވަޒީފާއަދާނުކުރެވެނީ ދަރިފުޅު ބަލަހައްޓާނެ އިތުރު ފަރާތެއް ނެތުމުން ކަމަށް ވެއެވެ.މިފަދަ އެކަނިވެރިމައިންގެ ތެރޭގައި ހިމެނޭ ގިނަ އަންހެންކުދިން ވަނީ ދަރިފުޅުގެ ބައްޕަ ޚަރަދު ނުކުރުމުގެ ސަބަބުން ވަރަށް ނިކަމެތި ޙާލުގައެވެ.
ރާއްޖޭގެ އިޤްތިޞާދަށް ކުރިމަތިވެފައިވާ ހީނަރުކަމުގެ ސަބަބުންނާއި ތަކެތީގެ އަގު މަތިވުމާއި ކޮޓަރި ނުވަތަ އެޕާޓުމެންޓް ތަކުގެ ކުލި ބޮޑުވުމުގެ ސަބަބުން ދިރިއުޅުމުގެ ޚަރަދުތައް ފޫބެއްދޭނެ ގޮތެއް ނެތުމާއެކު ބައެއް އަންހެނުންގެ ޢިއްފަތްތެރިކަން ރައްކާތެރި ނުކުރެވި ﷲ ނުރުއްސަވާ މަގުން ހިނގަން ޖެހުމަކީ މިފަދަ ފަރާތްތަކުން މަޖުބޫރުވެގެން ހިނގަން ޖެހިފައިވާ މަގެއް ކަމަށް ގިނަ އަންހެން ކުދިން ބުނާކަމަށް ވެއެވެ.

މިއީ ދައުލަތުގެ ފަރާތުން ވަރަށް ބޮޑަށް ވިސްނާންޖެހޭނެ ކަމެއް ކަމަށް ދެކެމެވެ. ﷲ ނުރުއްސަވާމަގުން ހިނގަން މަޖުބޫރުވެފައިވާ ބައެއް އަންހެނުން ރަށްމެދަށް ވިހަމުން ދާ ކަމީ ހިތާމަ ކުރަން ޖެހިފައިވާ އަނެއް މައްސަލައެވެ. އެކަނިވެރި މައިންނާއި އެފަދަ އަންހެނުންގެ ޙައްގުތައް ރައްކާތެރި ކުރުމަށް ދައުލަތުން އެޅެން ހުރި ހުރިހާފިޔަވަޅެއް އަޅަން އެބަޖެހެއެވެ. ވަޒީފާ އަދާކުރާން ޖެހިފައިވާ މިދެންނެވި ފަދަ އެކަނިވެރި މައިންނަށް ވަޒީފާ އަދާނުކުރެވެނީ ކުދިން ބަލަހައްޓާދޭނެ ފަރާތެއް ނެތުމުން ނެވެ. އެހެން ކަމުން މިފަދަ ފަރާތްތަކަށް ދައުލަތުގެ ފަރާތުން ކޮށްދެވޭނެ ބައެއް ކަންކަން ހުންނާނެއެވެ.

އޭގެ ތެރޭގައި ވަޒީފާއަށްދާ އަންހެނުންގެ ދަރިން ބަލަހައްޓާދޭނެ ސެންޓަރެއްވެސް ގާއިމް ކޮށްދެވިދާނެއެވެ. މިފަދަ މަރުކަޒެއް ގާއިމް ކުރުމުގެ މަޝްވަރާތައްވެސް ބައެއް ސަރުކާރުތަކުން ވަނީ ކުރައްވާފައެވެ. ބުޅާ ބަލަހައްޓާ ތަނެއް މި ސަރުކާރުން ހަދާދީފައިވާއިރު މި ދެންނެވިފަދަ މަރުކަޒެއް ބިނާނުކުރެވެންވީ ސަބަބެއް އަޅުގަނޑަކަށް ނުވިސްނެއެވެ.މުޖުތަމަޢުގެ ރައްކާތެރިކަމަށްޓަކާ އެކަނިވެރި އަންހެނުންނާއި އަދި އެނޫންވެސް ފަރާތްތަކަަށް ވަޒީފާއަދާއަދާކުރަން މި ދެންނެވިފަދަ ކުދިންބަލަހައްޓާދޭނެ މަރުކަޒެއް ބިނާ ކުރެވިއްޖެ ނަމަ ފަސޭހަވެ މުޖުތަމަޢުގެ ލާބައާއި މަންފާ އިތުވެގެން ދާނެއެވެ.

ރައްޔިތުން ވޯޓު އަޅާ ވެރިކަންބަދަލު ކުރަނީ ވަރަށް މާތް މަގުޞަދު ތަކަކަށްޓަކައެވެ. އެހެން ކަމުން ސަރުކާރުގެ ފަރާތުން ރައްޔިތުންއުޅޭ ނުއުޅޭ ގޮތް ބަލާ ރައްޔިތުންނަށް ކުރިމަތިވާ މިފަދަ ޙާލަތުތައް ދެނެގަނެ މުޅި ޖަމާޢަތުގެ ފައިދާއަށް އިސްކަން ދޭން ޖެހޭނެއެވެ.
ނިމިދިޔަ ސަރުކާރު ފެށުމާއެކު އިވިގެން ދިޔައީ އެކަނިވެރި މައިންނަށް ދެވޭ ޢިނާޔަތު ދިހަހާސް ރުފިޔާއަށް ބޮޑުކުރާނެ ވާހަކަ އެވެ. ނަމަވެސް އެ ސަރުކާރު ނިމިގެންދިޔައިރުވެސް އެކަމެއް ނުވިއެވެ. އެހެން ކަމުން އެނގެނީ ދައުލަތުގެ މާލީތަނަވަސް ކަމަށް ބަލާއިރު އެއީ ދެވިދާނެ މިންވަރެއްކަމެވެ. ރާއްޖޭގައި ދިރިއުޅޭ ރައްޔިތުންގެ ނިސްބަތަށް ބާލާއިރު ރާއްޖެއަށް ލިބޭ އިގްތިޞާދީ މަންފާއިން ރާއްޖޭގެ އާބާދީގެ 18 އަހަރުންމަތީގެ ކޮންމެ ބޮލަކަށް ފަސްހާސް ރުފިޔާ ދެވޭނެއެވެ. ރާއްޖެއަކީ ސަރުކާރުން ބޭކާރު އިސްރާފު ނުކުރާނަމަ ރައްޔިތުންނަށް ނުހަނު އުފަލާ އަރާމުގައި އުޅެވެން އޮތް ތަނަވަސް ގައުމެކެވެ.

އެހެނަސް ބައެއް ވެރިން ގައުމަށް ޣައްދާރުވެ ދައުލަތުގެ މުދަލާ ފައިސާއިން ވައްކަންކޮށް ޚިޔާނާތް ތެރިވަމުންދާތީ ދައުލަތުގެ ދަރަނި ބޮޑުވެ ރައްޔިތުންދަތި ޙާލުގައި އުޅެންޖެހިފައި ވަނީއެވެ. އެއީ ދިވެހި ދައުލަތުގެ މާލީ ތަނަވަސް ކަން ނެތިގެން ކުރިމަތިވާކަން ކަމެއް ނޫނެވެ. ވެރިންގެ އިޚުލާޞްތެރިކަމެއް ނެތްނަމަ ރާއްޖޭގެ ކުރިމަގު އުޖާލާވެގެނެއް ނުދާނެއެވެ. އަބަދުވެސް ސަރުކާރެއް ނިމޭއިރު އެ ނިމޭ ސަރުކާރުގެ ބޮޑުން އޮންނަނީ ދައުލަތުގެ މާލީތަނަވަސް ކަން ވީދައިގެން ކާލާފައެވެ.
އެހެންކަމުން ފެށިގެން އަންނަ ސަރުކާރުގެ ވެރިންގެ ޚިޔާލުގައިވެސް ވައްކަން ކުރުމާއި ޚިޔާނާތް ތެރިވުމުގެ ވިސްނުން އަށަގެންފައި ވާތީ ކުރީ ސަރުކާރުން ހިންގާފައިވާ ޚިޔާނާތުގެ މައްސަލަ ބަލާ އެ ފައިސާ ރައްޔިތުންނަށް ހޯއްދަވައި ނުދެއްވަނީއެވެ.