ގދ.ނަޑެއްލާގައި ނުރައްކާތެރި އެކްސިޑެންޓެއްގައި 3 މީހަކަށް އަނިޔާވެ، އޭގެތެރެއިން ދެ މީހުން އިތުރު ފަރުވާއަށް މާލެ ގެނެސްފިއެވެ.
ފުލުހުން މިއަދު ބުނީ ނަޑެއްލާގެ ޖެޓީ މަގުން ބާރު ސްޕީޑުގައި ދުއްވި ސައިކަލެއް ކޮންޓްރޯލްނުވެ ގޮސް، މަޑުކޮށްފައި އޮތް ރަށު ޕިކަޕެއް ކައިރީގައި ހުރި މީހެއްގެ ގައިގައި ޖެހި އެކްސިޑެންޓްވީ ރޭގެ ވަގުތެއްގައި ކަމަށެވެ.
މި އެކްސިޑެންޓުގައި ސައިކަލުގައި ތިބި 18 އަހަރުގެ ދެ މީހުންނާއި ޕިކަޕު ކައިރީގައި ހުރި 47 އަހަރުގެ މީހާއަށް އަނިޔާވެގެން ތިނަދޫ އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ފަރުވާދީފައިވާ ކަމަށް ފުލުހުން ބުންޏެވެ.
ފުލުހުން ބުނީ ސައިކަލު ދުއްވި މީހާއާއި، ޕިކަޕު ކައިރީގައި ހުރި މީހާ މިއަދު މާލެ ގެނެސް މިހާރު އޭޑީކޭގައި ފަރުވާދެމުންދާ ކަމަށެވެ.
ސައިކަލު ދުއްވާފައިވަނީ ލައިސެންސް ނެތް މީހެއް ކަމަށް ފުލުހުން ބުންޏެވެ.
ފުލުހުން ބުނީ މި މައްސަލަ ތަހުގީގުކުރަމުންދާ ކަމަށެވެ.
