އައްޑޫ ސިޓީ ހިތަދޫ ފިހާރައަކަށް ވަދެ ބިރުދައްކައި ފޭރުނު މައްސަލައިގައި އިތުރު މީހަކު ހައްޔަރުކޮށްފިއެވެ.
އައްޑޫ ސިޓީ ހިތަދޫ ފިހާރައަކަށް ދެ މީހަކު ވަދެ، ސޭޓަށް ބިރުދައްކައި ފޭރިފައިވަނީ މި މަހު 14 ވަނަ ދުވަހުއެވެ.
މި މައްސަލާގައި އިއްޔެ ވަނީ 40 އަހަރުގެ ދިވެހި ފިރިހެނަކު ހައްޔަރުކޮށްފައެވެ.
ފުލުހުން މިރޭ ބުނީ އޭނާގެ ބަންދާމެދު ގޮތެއް ނިންމަން މިއަދު ކޯޓަށް ހާޒިރުކުރުމުން 30 ދުވަހަށް ބަންދުުކުރަން އަމުރުކޮށްފައިވާ ކަމަށެވެ.
މި މައްސަލާގައި ކޯޓު އަމުރެއްގެ ދަށުން މިއަދު އިތުރު މީހަކު ހައްޔަރުކޮށްފައިވާ ކަމަށާއި، އެއީ 31 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.
ސޯޝަލްމީޑިއާގައި އާންމުވެފައިވާ ސީސީޓީވީ ފުޓޭޖުން ފެންނަ ގޮތުގައި ދެ މީހަކު ހިތަދޫ ފިހާރައަކަށް ވަދެ، އެ ފިހާރައިގައި އިން ސޭޓަށް ބިރުދެއްކީ ލަކުޑިގަނޑަކާއި ވަޅިއެއް ބޭނުންކޮށްގެންނެވެ.
