ނަޒާކީ ޒަކީ ޕީޕީއެމުން ވަކިވެވަޑައިގެންފިއެވެ.

އެ މަނިކުފާނު ޕީޕީއެމުން ވަކިވެވަޑައިގަތީ ރާއްޖޭގެ ސިޔާދަތީ ބާރަށް ކުރިމަތިވަމުން އައި ނުރައްކަލުން ގައުމު ދިފާޢު ކުރުމަށް އެޕާޓީން ކީހާޅެން ފަރިއްސައްވެ ދިއުމުން ކަމަށް ވިދާޅުވިއެވެ.

 ނަޒާކީ ޒަކީ ( ދާތޯ މުޙައްމަދު ޒަކީ) ވިދާޅުވި ގޮތުގައި އެމަނިކުފާނު ޕީޕީއެމާ ގުޅިވަޑައިގަތީ 2020 ވަނައަހަރު އެޕާޓީން ދެއްވި ޚާއްޞަ ދައުވަތަކަށް ކަމަށާއި އެހެން ކަމާއެކު އެޕާޓީ އާއި ގުޅިވަޑައިގަތީ ވަރަށް ފޮނި އުންމީދު ތަކަކާއެކުގައި ކަމަށެވެ.

އެގޮތުން ޕީޕީއެމް/ ޕީއެންސީ އިން އެކުލަވާލި ކޯލިޝަނަށް ފަހު އެ ދެޕާޓީން އިގްރާރުވެފައި ވަނީ ރާއްޖޭގެ މިނިވަންކަމާއި ސިޔާދަތީބާރު ނެގެހެއްޓުމަށާއި އިންޑިޔާއިން ރާއްޖެއަށް އަތްގަދަ ކުރަމުންދިޔަ ދިއުން ނިމުމަކަށް ގެނައުމަށާއި ޗާގޯސް އައިލެންޑުން ގެއްލިފައިވާބައި އަލުން ހޯދުމަށާއި ރާއްޖެ ދަރާފައިވާ ދަރަނިން ރާއްޖެސަލާމަތް ކުރުމަށް އެކުލަވާލާފައިވާ ޖޯޝުންފުރިގެންވާ ސްލޯގަން ހިތުގެ އަޑިންގަބޫލު ކުރެވިގެން ކަމަށެވެ.

ކަން މިހެން ހުރިނަމަވެސް މިހާރު ޕީޕީއެމް ވަނީ ޕެރަލައިޒްކޮށަލާފައި ކަމަށާއި ޕީޕީއެމްގެ ކުރީގެ ސިޔާސަތަކީ ރައީސް ޔާމީނުގެ ޒަޢާމަތުގައި އެ މަނިކުފާނު ގެންގުޅުއްވި ސިޔާސަތުތަކެއް ކަމަށްބުނެ އެސިޔާސަތު ތަކަކީ އޭރުވެސް އަދި މިހާރުވެސް ޕީޕީއެމް ޕީއެންސީގެ ރުހުން އޮވެގެން އުފަން ކުރެވިފައިވާ ސިޔާސަތުތަކެއް ނޫންކަމަށް ބުނެ ލީޑަރޝިޕުން އެގެންދަނީ މީޑިއާގައިވެސް އެކަން ތަކުރާރު ކުރަމުން ކަމަށެވެ.

ވެރިކަން ލިބުމާއެކު ޕީޕީއެމްގެ ސިޔާސަތުތަކާއި އެޕާޓީގެ އެއްވެސް ޙަރަކާތެއް ނެތްކަމަށާއި ޕީޕީއެމް އަކީ މިހާރު ހަމައެކަނި ބައެއްފަހަރަށް ކިޔޭނަމެއް ކަމަށެވެ. މިހާރު ވެރިކަން ހިންގަނީ ޕީއެންސީއިން ކަމަށާއި ވެރިކަން ލިބުނީ ޕީއެންސީގެ މޭސްތިރިކަމުގެ ދަށުން ކަމަށް ވެސް މިހާރުވަނީ ބުނެފައެވެ.

އެހެން ކަމާއެކު ވެރިކަން ބަދަލުކުރުމަށް އިޚްލާސްތެރި ކަމާއިއެކު ބުރަކޮށް މަސައްކަތްކުރި ޕީޕީއެމްގެ ވަރަށް ގިނަ މެންބަރުނާއި ޕާޓީއަކާއި ގުޅުމެއް ނެތްކަމަށާއި ވަޒީފާއެއް ލިބޭތޯ ޕީއެންސީއަށް ސަލާމް ޖަހަން މަޖުބޫރުވެ ޕީޕީއެމްގެ މެންބަރުން ޕީއެންސީއަށް ސޮއިކުރަންޖެހޭ ޙާލަތަށް ގެންދިއުމުން ޕީޕީއެމްގެ މިހާރު އޮތީ ހަމައެކަނި ނަމެއް ކަމަށްވެސް ދާތޯ ޒަކީ ވިދާޅުވިއެވެ.

   ޒަކީ ޕީޕީއެމުން އިސްތިއުފާ ދެއްވުމާއި ގުޅިގެން އިތުރަށް ވާހަކަފުޅުދައްކަވަމުން ވިދާޅުވީ ރައީސް ޑޮކްޓަރ މުޙައްމަދު މުޢިއްޒު އިސްވެ ހުންނަވައި ޕީޕީއެމްގެ ބާރުތައް ނެތިކޮށްލައްވައި އަދި އެޕާޓީގެ ދެ ނާއިބުރައީސުން ވެސް  ވަޒީރުކަމުގެ ލައްޒަތުގައި ޖެހިވަޑައިގެން ރައްޔިތުންގެ ރުހުމާ ލޯބި ގެއްލުވާލުމާއި ގުޅިގެން އިތުރަށް ޕީޕީއެމްގައި ހުރެގެން ކުރާނޭ އެއްވެސް ސިޔާސީ މަސައްކަތް ޕުޅެއް ނުވަތަ ގައުމީ ޚިދުމަތެއް ނެތްކަމަށެވެ. އެހެންވުމާއި އެ ޕާޓީއިން އިސްތިއުފާ ދެއްވަން ޖެހިވަޑައިގަތީކަމަށެވެ.

 ނިމިދިޔަ ރިޔާސީ އިލެކްޝަނާއި ރައްޔިތުންގެ މަޖިލީހުގެ އިލެކްޝަންގައި މެލޭޝިޔާއާއި ކިނބިދޫދާއިރާގެ މެންބަރޝިޕް އިތުރުކުރުމާއި ސަޕޯޓު ހޯއްދެވުމުގައި ޒަކީވަނީ ހީވާގިކަމާއިއެކު ގަދައަޅާމަސައްކަތް ކުރައްވާފައެވެ. އަދި އެދާއިރާތަކުގެ މެޖޯރެޓީ ވޯޓު ހޯއްދެވުމުގައި ވަރަށް އިޚުލާސްތެރި މަސައްކަތްޕުޅުތަކެއް ކުރައްވާ ނަތީޖާ ނެރެދެއްވާފައެވެ.

 މިއަދު ޕީޕީއެމުން އިސްތިއުފާ ދެއްވުމާހަމައަށް އެމަނިކުފާނު ހުންނެވީ ޕީޕީއެމް/ ޕީއެންސީގެ ސްޕެޝަލް އެންވޯއީގެ ގޮތުގައެވެ.

 ނަޒާކީ ޒަކީ ސިޔާސީމައިދާނަށް ނުކުމެވަޑައިގެންނެވީ 1989 ވަނައަހަރު ރާއްޖޭގައި ބޭއްވުނު ޕާލިމެންޓްރީ އިލެކްޝަންގައި އޭރުގެ “ ސްޓްރޯންގްމޭން“ ރައީސް މައުމޫނުގެ ޅިޔަނު އިލްޔާސް އިބްރާހީމާއި ޗެލެންޖްކޮށް ޑޮކްޓަރ މުޙައްމަދު ވަޙީދު ޙަސަންމަނިކު ހޮވުމަށެވެ. އެފަދަ ނުރައްކާތެރި މާޙައުލެއް އުފެދިފައިވާ އެދުވަސްވަރު ޑޮކްޓަރ ވަޙީދަށް އިލެކްޝަން ކާމިޔާބު ކުރެވުނު ހިސާބުން ފެށިގެން މައުމޫނުގެ އަނިޔާ ވަނީ ލިބެން ފަށާފައެވެ. އެހެންކަމާއެކު އެ އަނިޔާތަކުން ސަލާމަތް ވުމަށްޓަކާ ޒަކީ ވަނީ އަމިއްލަފުޅަށް މެލޭޝިއާއަށް އަރުވާލެވިގެން ދިރިއުޅެން ޖެހިފައެވެ. އަދި އެމަނިކުފާނުގެ ނަޒާކީ ވިޔާފާރިވެސް ބަނގުރޫޓް ކޮށްލުވާފައެވެ.

 މި ދިމާވި ކަންކަމާއި ގުޅިގެން ދެން ސިޔާސީ މަސައްކަތްޕުޅު ކުރަށްވަން ގުޅިވަޑައިގަންނަވަން ގަސްދު ކުރައްވަނީ ކޮން ޖަމާޢަތަކާތޯ ނޫންނަމަ ސިޔާސީ ޙަޔާތް މިހިސާބުން ކަފުންކުރެއްވީތޯ ނޫންނަމަ އިތުރަށް ސިޔާސީ މަސައްކަތް ކުރައްވަން ވިސްނަވަންތޯ ދެންނެވުމުން ޒަކީ ވިދާޅުވީ ތިކަމަށް މިވަގުތު އިތުރު ޖަވާބެއް ނެތްކަމަށެވެ.

 ނަޒާކީ ޒަކީ އަކީ ރާއްޖެ އިޞްލާޙު ކުރުމަށްޓަކާ ޖާނާއިމާލުން ގުރުބާންވި ބަތަލެކެވެ. ދުލާ ގަލަމުގެ މިނިވަންކަމަށްޓަކާ އެ މަނިކުފާނުވަނީ މެލޭޝިއާ އަށް އަރުވާލެވިގެން ހުންނަވާ ރައީސް މައުމޫނުގެ އަނިޔާވެރި ސިޔާސަތުތައް ސަންދާނު މަޖައްލާ އޮންލައިންކޮށް ޕަބްލިޝްކުރައްވާ ސަރުކާރުގެ އަނިޔާވެރި ކަމާއި ޚިޔާނާތެރިކަން ދިވެހިރައްޔިތުންނަށް ހާމަކޮށްދެއްވާފައެވެ.

އޭރު ޒަކީއަކީ ރާއްޖޭގައި ހުރި ބޮޑު މަހުޖަނެއްވެސް މެއެވެ. އެމަނިކުފަނުވަނީ ރައީސް މައުމޫނުގެ އަނިޔާވެރިކަމުން 2001ން 2005 އަށް ޢުމުރު ދުވަހުގެ ޖަލު ޙުކުމެއްވެސް ތަޙަންމަލް ކުރައްވާފައެވެ. އޭގެ އިތުރުން އެއް އަހަރު ދުވަހު ދޫނީދޫ ކުޑަގޮޅީގައި އެކަހެރިކޮށް ބަންދު ކުރެވިފާވެއެވެ. ޒަކީ އަކީ އެމްޑީޕީ އުފެއްދުމަށްޓަކާ އެ މަނިކުފާނުގެ ޅިޔަނު އަންނިއާއި އެކު ބުރަ މަސައްކަތްތަކެއްވެސް ކުރައްވާފައިވާ ބޭފުޅެކެވެ. އަދި ރާއްޖޭގައި މަލްޓިޕާޓީ ސިސްޓަމެއް ގާޢިމްކުރުމަށްޓަކާ ޖާނާއި މާލުން ގުރުބާންވި ބޭފުޅެއްވެސްމެއެވެ.