މިއަހަރުގެ ތެރޭގައި އޮޅުވާލައިގެން ރާއްޖެއަށް ވައިގެ މަގުން ވަންނަން އުޅުނު 45 މީހަކު ހުއްޓުވާފައިވާ ކަމަށް މޯލްޑިވްސް އިމިގްރޭޝަންގެ ތަފާސްހިސާބުތަކުން ދައްކައިފިއެވެ.
އިމިގްރޭޝަނުން މިއަދު ވަނީ މިއަހަރުގެ ފުރަތަމަ ތިން ކުއާޓަރުގެ ތަފާސްހިސާބުތައް އާންމުކޮށްފައެވެ.
ތަފާސްހިސާބުތަކުން ދައްކާ ގޮތުގައި އޮޅުވާލައިގެން ރާާއްޖެއަށް އެތެރެވާން މަސައްކަތް ކުރި މީހުންގެ ތެރެއިން އެންމެ ގިނަ ބަޔަކު ހުއްޓުވާފައިވަނީ ތިންވަނަ ކުއާޓަރުގައެވެ.
ތަފާސްހިސާބުތަކުން ދައްކާ ގޮތުގައި އޮޅުވާލައިގެން ވައިގެމަގުން ރާއްޖެއަށް އެތެރެވާން އުޅުނު ޖުމްލަ 45 މީހުން މިއަހަރުގެ ސެޕްޓެމްބަރު މަހުގެ ނިޔަލަށް ވަނީ ހުއްޓުވާފައެވެ. އޭގެތެރޭގައި ހިމެނެނީ ފުރަތަމަ ކުއާޓަރުގައި ހިފެހެއްޓި 8 މީހުންނާއި ދެވަނަ ކުއާޓަރުގައި ހިފެހެއްޓި 17 މީހުން އަދި ތިންވަނަ ކުއާޓަރުގައި ހިފެހެއްޓި 20 މީހުންނެވެ.
މި ސަރުކާރު ވެރިކަމާ ހަވާލުވިފަހުން އޮޅުވާލައިގެން ރާއްޖެއަށް އެތެރެވާން އުޅުނު 50 މީހުން ހުއްޓުވާފައިވާ ކަމަށް އިމިގްރޭޝަންގެ ތަފާސްހިސާބުތަކުން ދައްކައެވެ.
17 ނޮވެމްބަރ 2023 އިން ސެޕްޓެމްބަރު 2024 ގެ ނިޔަލަށް ފާހަގަކުރެވުނު މައްސަލަތަކުގެ ތެރޭގައި ހިމެނެނީ ފޭކު ރެސިޑެންޓް ކާޑުގެ 1 މައްސަލަ، ފޭކު ޕާސްޕޯޓުގެ 31 މައްސަލަ، ފޯޖުކޮށްފައިވާ ޕާސްޕޯޓުގެ 1 މައްސަލަ، ވުޖޫދުގައި ނެތް ގައުމެއްގެ ޕާސްޕޯޓުގެ 1 މައްސަލަ، ފޭކު އައިޑީގެ 2 މައްސަލަ، ޝަހްސު އޮޅުވާލުމުގެ 5 މައްސަލަ، ފޭކު ސްޓޭމްޕްގެ 4 މައްސަލަ، ފޭކު ވިސާގެ 2 މައްސަލަ އަދި ޕާސްޕޯޓުގައި ފޭކު ބައޯ ޕޭޖު ބޭނުންކުރުމުގެ 3 މައްސަލައެވެ.
