ދިވެހި ފުލުހުންގެ ޚިދުމަތުގެ އޮންލައިން ޚިދުމަތްތައް ވަގުތީ ގޮތުން މެދުކެނޑިއްޖެއެވެ.
މިކަންހާމަކޮށް ދިވެހި ފުލުހުންގެ ޚިދުމަތުގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ ދިވެހި ފުލުހުންގެ ޚިދުމަތުގެ ނެޓްވޯކަށް ދިމާވި ޓެކްނިކަލް މައްސަލައަކާ ގުޅިގެން، އިންޓަނެޓް މެދުވެރިކޮށް ދެމުންއައި ޚިދުމަތް ވަގުތީ ގޮތުން މެދުކެނޑިފައިވާ ކަމަށެވެ.
އެގޮތުން މިކަމުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށް ފުލުހުންގެ ޚިދުމަތުން ވަނީ މާފަށް އެދިފައެވެ.
މީގެ އިތުރުން މި މައްސަލަ ހައްލު ކުރުމުގެ މަސައްކަތް ދަނީ ކުރަމުން ކަމަށް ފުލުހުން ހާމަކޮށްފައި ވެއެވެ .