ކަޅު ބާޒާރުގައި ޑޮލަރުގެ ވިޔަފާރިކުރި ދެ ބިދޭސީއަކު ޑީޕޯޓްކޮށްފިއެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިއަދު ބުނީ ކަޅު ބާޒާރުގައި ޑޮލަރުގެ ވިޔަފާރިކުރި މައްސަލާގައި މި މަހުގެ 5ވަނަ ދުވަހު ހައްޔަރުކުރި ފަސް ބިދޭސީންގެ ތެރެއިން ދެ މީހަކު ޑީޕޯޓްކޮށްފައިވާ ކަމަށެވެ.
އެ ދެ މީހުން ޑީޕޯޓްކޮށްފައިވަނީ މިދިޔަ ހަފްތާގައެވެ.
މި މައްސލައިގައި ހައްޔަރުކުރި މީހުންގެ އަތުން ގިނަ ޢަދަދެއްގެ ފައިސާ އާއި ޑެބިޓް އަދި ކްރެޑިޓް ކާޑުތަކެއް ވަނީ ފެނިފައެވެ. އިމިގްރޭޝަނުން ވަނީ މިރެއިޑުގައި ހިފަހައްޓާފައިވާ ޑޮލަރާއި ދިވެހި ފައިސާއާއި ގިނަ ޢަދަދެއްގެ ޕާސްޕޯޓުގެ ފޮޓޯ އާއްމުކޮށްފައެވެ.
މީގެ އިތުރުން މި މައްސަލައިގައި ބާކީ ތިބި ތިން މީހުން ވެސް ޑީޕޯޓް ކުރުމުގެ މަސައްކަތް ކުރަމުން އަންނަ ކަމަށް އިމިގްރޭޝަނުން ހާމަކުރެއެވެ. ނަމަވެސް އެ މީހުން ރާއްޖެއިން ފޮނުވާލާނެ ދުވަހެއް ހާމަކުރެވޭނީ ލިޔެކިޔުމުގެ މަސައްކަތް ނިމުމުން ކަމަށް އިމްގްރޭޝަނުން ބުނެފައި ވެއެވެ.
ކަޅު ބާޒާރުގައި ޑޮލަރުގެ ވިޔަފާރި ކުރި ދެ ބިދޭސީއަކު ޑީޕޯޓުކޮށްލާފައި ވާއިރު ރާއްޖޭން ގަވާއިދާ ޚިލާފަށް ބޭރުކުރަން އުޅުން 81000 އަށްވުރެ ގިނަ ޑޮލަރާއެކު ބިދޭސީއަކު މިދިޔަ މަހު ވަނީ ހައްޔަރުކޮށްފައެވެ.
