ތިން ރަށެއްގައި އައިސްޕްލާންޓާއި، އައިސް ސްޓޯރޭޖް ހެދުމަށް
ފިޝަރީޒް މިނިސްޓްރީއާއި މިފްކޯއާ ދެމެދު މިއަދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ފައިނޭންޝަލް ކޮންޓްރޯލަރ އީނާޒް ނަސީރެވެ.
މިފްކޯގެ ފަރާތުން ސޮއިކުރެއްވީ ކުންފުނި ހިންގެވުމާއި މިވަގުތު ހަވާލުވެ ހުންނެވި ޗީފް ފައިނޭންޝަލް އޮފިސަރ (ސީއެފްއޯ) އިލްޔާސް ހަނީފެވެ.
މި އެއްބަސްވުމުގެ ދަށުން 3 ރަށެއްގައި މުޅިން އަލަށް 30 ޓަނުގެ އައިސްޕްލާންޓާއި، 50 ޓަނުގެ އައިސް ސްޓޯރޭޖްގެ މަސައްކަތް ކުރުމަށް ހަމަޖެހިފައިވެއެވެ. އެ ތިން ރަށަކީ ދ.މީދޫ، ދ.ބަނޑިދޫ، ށ.ފުނަދުއެވެ.
މިފްކޯއިން ބުނީ އެ ރަށްތަކުގައި ހަދާނީ ޓިއުބު އައިސް އުފައްދާ 3 އައިސް ޕްލާންޓު ކަމަށެވެ.
މިއީ ސަރުކާރުގެ ޕީއެސްއައިޕީ ބަޖެޓުން ކުރިއަށް ގެންދާ 24 މިލިއަން ރުފިޔާގެ މަޝްރޫއުއެއް ކަމަށާއި ކޮންމެ އައިސް ޕްލާންޓެއްގެ އަގަކީ 8 މިލިއަން ރުފިޔާ ކަމަށް މިފްކޯއިން ވަނީ ބުނެފައެވެ.
އަދި މި މަސައްކަތުގެ މުއްދަތަކީ 8 މަސް ދުވަސް މިފްކޯއިން ވަނީ ބުނެފައެވެ.
