މިހާރު ކުރަމުންދާ ވިއްސާރާގައި ރާއްޖޭގެ އެކި ރަށްރަށުގައި ފެންބޮޑުވެ ބައެއް ގޭގެއަށް ފެންވަދެ ގެއްލުންވެއްޖެއެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން މިއަދު ހާމަކޮށްފައިވާ ގޮތުގައި މިހާރު ކުރަމުންދާ ވިއްސާރާގައި ގެއްލުން ލިބުމާ ގުޅިގެން ފ.ނިލަންދުއާއި ކ.ގުރައިދުއާއި ލ.ގަމާއި ލ.ފޮނަދުއާއި އައްޑޫ ސިޓީ މަރަދޫއިން ވެސް ވަނީ ރިޕޯޓް ކޮށްފައެވެ.
އެގޮތުން ކ.ގުރައިދޫ ގެ 20 ގެއެއްގައި ފެންބޮޑުވެ 3 ގެއަކުން އެހެން ތަންތަނަށް ބަދަލުވެފައިވާ ކަމަށް އެ އޮތޯރިޓީން ބުނެފައިވެއެވެ. މީގެއިތުރުން ފުވައްމުލަކުގައި 15 ގެއަށްވުރެ ގިނަ ގޭގައި އިއްޔެ ފެންބޮޑުވެފައިވެއެވެ.
ނަމަވެސް އެއްވެސް ގެއަކުން މީހުން ހުސްކުރަންޖެހޭފަދަ ހާލަތަކަށް ގޮސްފައި ނުވާ ކަމަށާއި ގެއްލުންތައް ވަޒަންކުރުމުގެ މަސައްކަތް ކައުންސިލުން ކުރަމުންދާ ކަމަށް އެންޑީއެމްއޭއިން ވަނީ ބުނެފައެވެ. ރޭ އިރާކޮޅު ވާރޭވެހެން ފެށި ގޮތަށް މުޅި މާލޭގައި ވެސް ވަނީ ފެންބޮޑުވެފައެވެ.
ފެން ބޮޑުވުމުގެ ހާދިސާތަކަށް އިޖާބަ ދިނުމުގެ މަސައްކަތް ސިފައިންނާއި ފުލުހުން އަދި ކައުންސިލްތައް ގުޅިގެން ދަނީ މަސައްކަތް ކުރަމުންނެވެ. އަދި މާލޭގެ ބައެއްގޭގައި ފެންބޮޑުވެފައިވާތީ ވެލި ބަސްތާޖެހުމުގެ މަސައްކަތް ސިޓީ ކައުންސިލްގެ އެހީތެރިކަމާއިއެކު އަންނަނީ ކުރަމުންނެވެ.
