ރާއްޖޭގައި ހުދުމުހުތާރު ވެރިކަމެއް އާލާވިޔަ ނުދިނުމަށް ކުރަންޖެހޭ މަސައްކަތައިގެން މި ވަގުތު ރާއްޖޭގައި އޮތް އެންމެ ބޮޑު އިދިކޮޅު ސިޔާސީ ޕާޓީ އެމްޑީޕީ ދާނީ ކުރިއަށް ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ. 

ފައްޔާޒު މިހެން ވިދާޅުވެފައި ވަނީ ރައްޔިތުންގެ މަޖިލީހުގައި އެމްޑީޕީ ތަމުސީލު ކުރައްވާ 13 މެމްބަރަކު ވެރިކަން ކުރާ ޕީއެންސީއަށް މިރޭ ސޮއިކުރެއްވުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ. 

އެގޮތުން ފައްޔާޒުގެ ޕޯސްޓުގައި ވަނީ އެމްޑީޕީން ވަކިވެ ޕީއެންސީއާ ގުޅުނު ބޭފުޅުން އެމްޑީޕީއަށް ކޮށްދެއްވި ޚިދުމަތްތަކަށް ޝުކުރު އަދާކުރައްވާފައެވެ. 

ހަމަ އެހެންމެ މި ދަނޑިވަޅު ރާއްޖޭގައި ހުދުމުހުތާރުކަން އާލާވިޔަ ނުދިނުމަށް ކުރަންޖެހޭ މަސައްކަތައިގެން މާތްﷲ ވާގިފުޅާއެކު އެމްޑީޕީ ދާނީ ކުރިއަށް ކަމަށް ފައްޔާޒު ވަނީ ވިދާޅުވެފައެވެ. 

އެމްޑީޕީން ވަކިވެ، ޕީއެންސީއާ މިރޭ ގުޅުނު 13 މެންބަރުންނާ އެކު ޕީއެންސީގެ މަޖިލިސް މެންބަރުންގެ އަދަދު ވަނީ 15 އަށް އިތުރުވެފައެވެ. މިއާއެކު އެ ޕާޓީ މަޖިލީހުގެ މައިނޯރިޓީ ޕާޓީއަށް ބަދަލުވާނެ އެވެ. އަދި އެމްޑީޕީން 13 މެމްބަރުން ވަކިވުމުން، މަޖިލީހުގައި އޮތް އެ ޕާޓީގެ ސުޕަމެޖޯރިޓީ މިހާރު ވަނީ ގެއްލިފައެވެ. މީގެ އިތުރުން މަޖިލީހުގައި ހިމެނޭ ޕީޕީއެމްގެ ދެ މެންބަރުންނާ އެކު ގުޅިފައިވާ ޕީޕީއެމް ޕީއެންސީ ހިމެނޭ ޕްރޮގްރެސިވް ކޮންގްރެސް ކޯލިޝަންގެ މެންބަރުންގެ އަދަދު 17 މެންބަރުންނަށް އިތުރުވާނެއެވެ.