އެމްއެމްޕީއާރްސީގެ ޚިޔާނާތުގެ މައްސަލާގައި 11 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް ޔާމީން ޢަބްދުލްޤައްޔޫމް މިނިވަންވުމަކީ ޖުޑިޝަރީ ތެރޭގައި އޮތްކަމެއް ކަމަށް ސަރުކާރުން މިއަދު ބުނެފިއެވެ.

ރިޔާސީ އިންތިޚާބުގެ ތެރޭގައި ރައީސް ޑރ.މުޙައްމަދު މުޢިއްޒު އެންމެ ގިނައިން ދެއްކެވި އެއް ވާހަކަފުޅަކީ ރައީސް ޔާމީނަށް ހުކުމް އިއްވާފައިވަނީ ޝަރީއަތަށް ނުފޫޒު ފޯރުވައިގެން ކަމަށާއި ވެރިކަން ލިބިވަޑައިގެންފިނަމަ ގާނޫނީ ހަމަތަކުގެ ތެރެއިން އެމަނިކުފާނު މިނިވަން ކުރައްވާނެ ކަމުގެ ވާހަކައެވެ.

ރައީސް ޔާމީންގެ ބަންދަށް ދިން ލުުޔާއެކު އޮކްޓޫބަރުމަހުން ފެށިގެން އެމަނިކުފާނު ހުންނަނީ ގޭބަންދުގައެވެ. އެއާއެކު އިތުރު ލުއިތަކެއް ވެސް ދީފައިވެއެވެ.

ރައީސް އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ރައީސް ޔާމީން މިނިވަންކުރުމާ ގުޅޭ ގޮތުން ސުވާލުކުރުމުން ޗީފް ސްޕޯކްސްޕާސަން މުޙައްމަދު ޝަހީބް ވިދާޅުވީ ރައީސް ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު ދެއްވި ފުރަތަމަ ތަގްރީރުގައި ޝަރުއީ ދާއިރާއަށް ނުފޫޒު ފޯރުވުން އެ ހިނދުން އެ ހިނދަށް ހުއްޓުނީ ކަމަށް ވިދާޅުވެފައިވާ ކަމަށެވެ.

އެހެންކަމުން ރައީސް ޔާމީނާ ގުޅިގެން ރައީސް ޑރ.މުޢިއްޒު ވެވަޑައިގެންނެވި ވައުދު އެ އޮތީ ފުދިފައި ކަމަށާއި ރައީސް ޔާމީން މިނިވަންވުމަކީ ޖުޑިޝަރީތެރޭގައި އޮތް ކަމެއް ކަމަށް އޭނާ ވިދާޅުވިއެވެ.

އަދި ސަރުކާރުން އެ މައްސަލައިގެ ތެރެއަށް ނުވަންނާނެ ކަމަށް ވެސް ޝަހީބް ވިދާޅުވިއެވެ.