ޕްރޮޕަޓީ މެނޭޖުމަންޓްގެ ދާއިރާއިން މީހުން ބިނާކުރުމަށް ކޯހެއް ހިންގަން ހައުސިން މިނިސްޓްރީއާއެކު ޤައުމީ ޔުނިވާސިޓީ (އެމްއެންޔޫ)އާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރީ އެމްއެންޔޫގެ އިދާރީ މަރުކަޒުގައި ބޭއްވި މިއަދު ބޭއްވި ރަސްމިއްޔާތެއްގައެވެ.
މި ރަސްމިއްޔާތުގައި ވާހަކަދައްކަވަމުން ހައުސިން މިނިސްޓަރު ޑރ. އަލީ ހައިދަރު ވިދާޅުވީ، އަލަށް ތައާރަފުކުރާ އެ ކޯހުން ޕްރޮޕަޓީ މެނޭޖްމެންޓު ދާއިރާގެ ފަންނީ ކަންތައްތަކާއި ޤާނޫނީ ކަންތައްތަކާއި އިދާރީ ކަންތައްތައް އުނގަންނައިދޭނެ ކަމަށެވެ.
ހަމަ އެހެންމެ މި ކޯސް ފަރުމާކުރުމުގެ މަޤްސަދަކީ ރާއްޖޭގައި ހުރި މި ކަހަލަ ހުރިހާ ކަމެއް ވެސް ވީހާވެސް ރަނގަޅަށް ހަމައަކަށް އަޅުވައިގެން ގަވާއިދުތަކާއި ޤާނޫނުތައް ހެދިގެން އެއަށް ތަބާވާނެ ރައްޔިތުން އުފައްދައިގެން ހަމަޖެހޭ ދިރިއުޅުމެއް ގެނެސްދިނުން ކަމަށް ހައިދަރު ވިދާޅުވިއެވެ.
މިގޮތުން އެ ކޯހުގެ ބައިވެރިން ބޮޑެތި އިމާރާތްތައް ބެލެހެއްޓުމުގައި އިސްދައުރެއް އަދާކުރާނެ ކަމަށް މިނިސްޓަރު ހައިދަރު ވަނީ ވިދާޅުވެފައެވެ.
މި ރަސްމިއްޔާތުގައި ވާހަކަދައްކަވަމުން އެމްއެންޔޫގެ ޗާންސެލަރު ޑރ. މަހުމޫދު ޝައުގީ ވަނީ، މި ކޯސްތައް އެމްއެންޔޫއާ ހަވާލުކޮށްގެން ހިންގަން ނިންމެވީތީ، މިނިސްޓަރު ހައިދަރަށް ޝުކުރު އަދާކުރައްވާފައެވެ.
ސްޓްރާޓާ މެނޭޖްމެންޓްގެ ދާއިރާއިން ކޯސްތަކެއް ފަރުމާކޮށް ހިންގުމަކީ ރައީސް ޑރ. މުހައްމަދު މުޢިއްޒުގެ ވެރިކަމުގެ ފުރަތަމަ 14 ހަފުތާގެ ތެރޭގައި ކުރުމަށް ނިންމާފައިވާ ކަމެކެވެ.
މި ރަސްމިއްޔާތުގައި ހައުސިން އެންޑް އާބަން ޑެވޮލޮޕްމަންޓު މިނިސްޓަރު ޑރ. އަލީ ހައިދަރާއި ޤައުމީ ޔުނިވާސިޓީގެ ޗާންސެލަރު ޑރ. މަހަމޫދު ޝައުގީގެ އިތުރުން ސްޓޭޓް މިނިސްޓަރު އިބްރާހިމް ނިޒާމާއި، ޤައުމީ ޔުނިވާސިޓީގެ ވައިސް ޗާނަސެލަރު ޑރ. އައިޝަތު ޝެހެނާޒް އާދަމް ބައިވެރިވެ ވަޑައިގެންނެވިއެވެ.
