ރާއްޖޭގައި އުފެދޭ ކުނި ސަލާމަތްތެރި ކަމާއެކީ މެނޭޖް ކުރުމަކީ ޤައުމުގެ އިޤްތިޞާދާއި ގުޅިފައިވާކަމެއް ކަމަށް މިނިސްޓަރ އޮފް ކްލައިމެޓް ޗޭންޖް، އެންވާރަމަންޓް، އެންޑް އެނަރޖީ ޠާރިޤް އިބްރާހިމް ވިދާޅުވެއްޖެއެވެ. 

މިނިސްޓަރ ޠާރިޤް މިހެން ވިދާޅުވީ ދ. ކުޑަހުވަދޫގައި މިނިސްޓްރީ އޮފް ކްލައިމެޓް ޗޭންޖް، އެންވާރަމަންޓް އެންޑް އެނަރޖީ އިން މ، ފ، ދ، އަދި ތ، އަތޮޅުގައި ކުރިއަށްދިޔަ ޓްރެއިނިންގ އޮން ވޭސްޓް މެނޭޖްމަންޓް އޮޕަރޭންސް އެންޑް ކޮމިއުނިޓީ އެންގޭޖްމަންޓް ނިންމާލުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ. 

އެގޮތުން މިނިސްޓަރ ޠާރިޤް ވިދާޅުވީ ކުނި މެނޭޖްކުރުމަކީ އެންމެންގެ ކަމެއް ކަމަށާއި، އެއީ ވަކި ސަރުކާރެއް ނުވަތަ ވަކި ކައުންސިލެއްގެ ޒިންމާއެއް ނޫން ކަމަށެވެ. 

ރާއްޖެފަދަ ނާޒުކު ވެއްޓެއްގައި، ރައްޔިތުން ހިމެނޭގޮތަށް، ރައްޔިތުންނާއި ގުޅިލާމެހިގެން ހިންގޭ މިފަދަ މަސައްކަތްތަކަކީ އޭގެން ގިނަ ބަޔަކަށް ފައިދާ ކުރާނެ ކަމެއް ކަމަށްވެސް މިނިސްޓަރު ވިދާޅުވިއެވެ. 

ހަތަރު އަތޮޅަކަށް އަމާޒުކޮށްގެން ހިންގި މި ޕްރޮގްރާމްގައި 18ރަށަކުން، 45 ފަރާތެއް ވަނީ ބައިވެރިވެފައެވެ. 

މިނިސްޓްރީން ހިންގި ޕްރޮގްރާމްގައި މޯލްޑިވްސް ކްލީން އެންވާރަމަންޓް ޕްރޮޖެކްޓްގެ ދަށުން ރަށްތަކަށް ފޯރުކޮށްދީފައިވާ ކުނި މެނޭޖްކުރާ އެކުއިޕްމަންޓްތައް ބޭނުން ކުރާނެ ގޮތާއި، އެ ބޭނުންކޮށްގެން ކުނިން މަންފާއެއް ހޯދިދާނެ ގޮތްތައް ކިޔައިދީ، ތަމްރީނު ކުރުން ހިމެނެއެވެ. 

އަދި، ކުނި މެނޭޖްކުރުމުގެ ޤާނޫނު، ޤަވާއިދާއި، ސިޔާސަތުތަކަށް ބައިވެރިން އަހުލުވެރިކޮށް ހަރުދަނާ ގޮތެއްގައި ރަށު ފެންވަރުގައި މެނޭޖު ކުރާނެ ގޮތުގެ ޕްލޭން ހެދުމަށް އެހީތެރިވެދިނުން ހިމެނެއެވެ. 

ފ. ނިލަންދޫ، ފ. މަގޫދޫ، ފ. ފީއަލި، މ. މުލި، މ. މުލައް، މ. ކޮޅުފުށި، މ. ދިއްގަރު، ދ. ކުޑަހުވަދޫ، ދ.ރިނބުދޫ، ދ. މާއެނބޫދޫ، ތ. ބުރުނި، ތ. މަޑިފުށި، ތ. ގުރައިދޫ، ތ. ވަންދޫ، ތ. ތިމަރަފުށި، ތ. ކިނބިދޫ، ތ. ހިރިލަންދޫ އަދި ތ. އޮމަދޫއަށް އަމާޒުކޮށްގެން ހިންގި ޕްރޮގްރާމްގައި ބޭލަރ، ގްލާސް ކަޓަރ، ސްޓްރެޕިންގ ޓޫލް، ކުނި މެނޭޖްކުރާ މަރުކަޒުގައި ކުނި އެއްތަނުން އަނެއް ތަނަށް އުފުލާނެ އާލާތްތައް، ތިން ސައިޒެއްގެ ޑަސްޓްބިން، އަދި ޕީ.ޕީ.އީ ކިޓް ފޯރުކޮށްދީފައި ވެއެވެ. 

މީގެ އިތުރުން އެންވާރަމަންޓް މިނިސްޓްރީގެ ވަފުދެއް މިހާރު ދަނީ ދ. އަތޮޅުގެ ރަށްތަކަށް ދަތުރެއް ކުރަމުންނެވެ. މި ދަތުރުގައި މިނިސްޓަރު ޠާރިޤް އާއި ސްޓެލްކޯގެ ޑެޕިއުޓީ މެނެޖިންގ ޑިރެކްޓަރ ޢަބްދުﷲ  ނާޡިރު، އެންވާރަމަންޓް މިނިސްޓްރީގެ މިނިސްޓަރ އޮފްސްޓޭޓް ޢަލީ ފާރިސް ޔޫސުފް، އާއި އެންވާރަމަންޓް މިނިސްޓްރީގެ ޑެޕިއުޓީ މިނިސްޓަރ އަޙްމަދު ނިޒާމް، އެންވާރަމަންޓްމިނިސްޓްރީގެ ޑެޕިއުޓީ މިނިސްޓަރ އަޙްމަދު މުޢާޛު، އެންވާރަމަންޓް މިނިސްޓްރީގެ ޑެޕިއުޓީ މިނިސްޓަރ ޢާއިޝަތު ޢިނާޔާ، ސީނިއަރ ޕޮލިޓިކަލް ޑިރެކްޓަރ ފާޠިމަތު އަޙްޝާ ޙަސަން އަދި މަރްޔަމް ރުޝްދާ ރަޝީދު ބައިވެރިވެ ވަޑައިގަންނަވައެވެ.