ކޮންމެ ފަސް އަހަރަކުން އެއްފަހަރު ސިޔާސީ މީހުންގެ ކަންފަތްބުޑުގައި ރައްޔިތުން ސަލާންޖަހަން ޖެހޭ ޖެހުން ނިމުމަކަށް ގެންނާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ ރޭ ދަރުބާރުގޭގައި ބޭއްވި ކަންގަތި ކޮލި 2022 އެވޯޑު ހަފުލާގައި ވާހަކަ ދައްކަވަމުންނެވެ.
ރައްޔިތުން ތަފާތު ގިނަ ކަންބޮޑުވުންތައް އެ މަނިކުފާނާއި ހިއްސާކުރެއްވި ކަން ފާހަގަކުރައްވާ ރައީސް ވިދާޅުވީ އެންމެ ބޮޑު ކަންބޮޑުވުމަކީ ބޯހިޔާވަހިކަމުގެ ތަކުލީފުކަމަށާއި އެކަމަށް ހައްލެއް ހޯއްދަވައި ދެއްވާނެ ކަމަށެވެ.
ރައީސް މުޢިއްޒު ވިދާޅުވީ މިއަދު ވެސް އެ ތަކުލީފުގެ ވާހަކަތަކާއި އަޑު ހަނދާން އެބަހުރި ކަމަށާއި އެ މަނިކުފާނުގެ ސިކުނޑީގައި ފީތާއެއްހެން އެ ވާހަކަތައް ހުޅުވި ދައުރުވާ ކަމަށެވެ.
ރައީސް ވިދާޅުވީ ފުށިދިއްގަރު ފަޅު ހިއްކައި، ’ރަސްމާލެ‘ ސިޓީ ތަރައްޤީ ކުރަން ނިންމެވީ، ދިވެހި ރައްޔިތުންނަށް ގެދޮރުގެ ދަތިކަމަށް ހައްލު ހޯއްދަވައި ދެއްވުމަށް ކަމަށާއި ރަސްމާލެ ސިޓީ ތަރައްޤީކޮށް އެންމެ ޒަމާނީ ފެންވަރުގެ އާ ޝަހަރުތަކެއް ދިވެހީންގެ ހަޔާތަށް ހަދިޔާ ކުރެވޭނެ ކަމަށެވެ.
ރަސްމާލެ ވެގެން ދާނީ ދުނިޔޭގައިވެސް ނަން ވިދާލާ ނަމޫނާ ސިޓީއަކަށް ކަމަށާއި އެ ސިޓީ ތަރައްޤީ ކުރާނީ ތިމާވެއްޓާއި ރައްޓެހި ސްމާޓް ސިޓީއެއްގެ ގޮތުގައި ކަމަށް ރައީސް މުޢިއްޒު ވިދާޅުވިއެވެ.
ރައީސް މުޢިއްޒު ވިދާޅުވީ ރަސްމާލެ އާއި ގުޅީފަޅަށް އިތުރު ކުރެވޭ ބޮޑު ބިމާ، ގިރާވަރު ފަޅުން އިތުރަށް ހިއްކާ އިތުރު ކުރެވޭ ބޮޑުބިމުން ދިވެހިންގެ ގެދޮރުވެރިކަމުގެ ހިތްދަތިކަމަށް ދާއިމީ ހައްލެއް ގެނެސް ދެވޭނެ ކަމަށެވެ.
މީގެ އިތުރުން ކޮންމެ ފަސް އަހަރަކުން އެއްފަހަރު ސިޔާސީ މީހުންގެ ކަންފަތްބުޑުގައި ދިވެހި ރައްޔިތުން ސަލާންޖަހަން ނިކަމެތި ޖިފުޓިތަކެއްގައި ބައިތިއްބައިފައި ތިބި ތިބުމަށް ދާއިމަށް ނިމުމެއް ގެނެސްދެއްވާނެ ކަމަށް ރައީސް މުޢިއްޒު ވަނީ ވިދާޅުވެފައެވެ.
One Response
Ehenve dhoa Gasim aai Siyam PO ah gengos gen e salaam jahanee? Fake