ރާއްޖެއިން މީހުން ހައްޖަށް ގެންދިއުމަށް ބައެއް ކުންފުނިތަކުން ބޮޑު އަގު ނަގާ މައްސަލަ ހައްލުކުރުމަށް މޯލްޑިވްސް ހައްޖު ކޯޕަރޭޝަނަށް އެކަނި ހައްޖުކޯޓާ ދޫކުރަން ސަރުކާރުން މިއަދު ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުހައްމަދު ޝަހީބް ވިދާޅުވީ، ޙައްޖުވެރިންގެ އިންތިޒާރު ދިގުލައިގެން ދިޔަ ނުދިނުމަށާއި، ޚިދުމަތުގެ ފެންވަރު ރަނގަޅު ކުރުމަށް ރާއްޖެއަށް ލިބޭ ރަސްމީ ކޯޓާ، މޯލްޑިވްސް ޙައްޖު ކޯޕަރޭޝަން ލިމިޓެޑަށް ދެއްވާ ގޮތަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ކަމަށެވެ.
އެހެންކަމުން މި ކަމުގެ ސަބަބުން އާންމު ރައްޔިތުންނަށް ބޮޑު ލުއި ފަސޭހައެއް ލިބިގެން ދާނެ ކަމަށް ޝަހީބް ވަނީ ވިދާޅުވެފައެވެ.
އާއްމުގޮތެއްގައި ހައްޖު ކޯޓާގެ ގޮތުގައި ރާއްޖެއަށް ލިބެނީ އަހަރަކު 1،000 މީހުން ހައްޖަށް ގެންދިއުމަށެވެ. މީގެ ތެރެއިން އެއްބައި ކޯޓާ ސަރުކާރުގެ ހައްޖު ކޯޕަރޭޝަނުން ނަގާއިރު ބާކީ ކޯޓާތައް ދެނީ އަމިއްލަ ކުންފުނި ތަކަށެވެ. މިގޮތުން އަމިއްލަ ޖަމާއަތްތަކުން މީހުން ހައްޖަށް ގެންދިއުމުގެ ނަމުގައި ބޮޑެތި އޮޅުވާލުންތަކެއް އޮޅުވާލާ ސަރުކާރުން ހުއްދަ ދީފައިވާ އަގަށް ވުރެން ބޮޑު އަގެއް ނެގުމާއި އިންތިޒާމުތައް ރަނގަޅަށް ހަމަނުޖެއްސުން ފަދަ އެތައް ކަމެއް ދިޔައީ ކުރަމުންނެވެ.
