ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ ބައެއް އަކުރުތައް އިސްތިސްނާކުރި ކުރުން ނިމުމަކަށް ގެނެސް މި ގާނޫނަށް އަމަލުކުރުން ފުރިހަމަ ގޮތުގައި އިއާދަކޮށްދިނުމަށް އެދި ރައްޔިތުންގެ މަޖިލީހަށް ހުށަހަޅައިފިއެވެ.
ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާއިން އިސްތިސްނާކޮށްފައިވަނީ އެ މާއްދާގެ (ހ) އާއި (ރ) އަދި (ބ) އެވެ. އެ މާއްދާގައި ބަޔާންކޮށްފައިވާ އުުސޫލުތަކަށް އަމަލުކުރުން އިސްތިސްނާކުރުމަށް ފިނޭންސް މިނިސްޓްރީން މަޖިލީހަށް ހުށަހެޅީ 2020 ގައެވެ.
އެއީ އެ ގާނޫނުގެ 36 ވަނަ މާއްދާގައި ބަޔާންކޮށްފައިވާފަދަ ގުދުރަތީ ކާރިސާއެއް ކަމަށްވާ ކޮވިޑް-19 ގެ އާލަމީ ވަބާ ރާއްޖެއަށް ކުރިމަތިވުމާ ގުޅިގެންނެވެ.
އެގޮތުން ކުރިމަތިވި އިގުތިސާދީ ހީނަރުކަން ފިލައިގެން ގޮސްފައިނުވާތީ މި އިސްތިސްނާގެ މުއްދަތު ރައްޔިތުންގެ މަޖިލީހުން ދެފަހަރެއްގެ މަތިން އިތުރުކޮށްދިނެވެ.
ފިނޭންސް މިނިސްޓްރީން ނެރުނު ބަޔާނެއްގައި ބުނީ އިގުތިސާދީ ހިސާބުތަކަށް ބަލާއިރު 2022 ވަނަ އަހަރު ރާއްޖެއަށް ރިއަލް ޖީޑީޕީ ވަނީ ކޮވިޑް-19 ގެ އާލަމީ ވަބާގެ ކުރިން ހުރި މިންވަރު ފަހަނައަޅައި ގޮސްފައި ކަމަށެވެ. އެގޮތުން 2022 ވަނަ އަހަރު ދައުލަތަށް ލިބުނު އާމްދަނީ 2019 ވަނަ އަހަރު ލިބުނު އާމްދަނީއަށްވުރެ އިތުރުވެފައިވާ ކަމަށާއި އެހެންކަމުން ދައުލަތުގެ ޚަރަދަށް ޒިންމާވުމުގެ ގާނޫނުގެ 36 ވަނަ މާއްދާގައި ބަޔާންކޮށްފައިވާފަދަ ހާލަތެއް މިހާރު ނެތް ކަމަށެވެ.
އެހެންވެ މިނިސްޓްރީ މަޖިލީހުގައި އެދިފައިވަނީ އަންނަ ޖެނުއަރީ ފުރަތަމަ ދުވަހުން ފެށިގެން, އިސްތިސްނާކުރި އަކުރުތައް ނިމުމަކަށް ގެނެސް މި ގާނޫނަށް އަމަލުކުރުން ފުރިހަމަ ގޮތުގައި އިއާދަކޮށްދިނުމަށެވެ.
