ރާއްޖޭގައި ބަރަހަނާ ވެބްސައިޓްތަކަށް ނުވަދެވޭ ގޮތަށް އެފަދަ ހުރިހާ ސައިޓުތަކެއް ބުލޮކް ކޮށްފިއެވެ. މިއީ ރާއްޖޭގައި މިފަދަ ނިންމުމެއް ނިންމައި އަމަލުކުރަން ފެށި ފުރަތަމަ ފަހަރެވެ.
ސަރުކާރުގެ އޮފިޝަލަކު ވިދާޅުވީ ބަރަހަނާ ސައިޓްތައް ބްލޮކް ކުރަން ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އަށް ސަރުކާރުން އެންގީ މިދިޔަ ބުރާސްފަތި ދުވަހު ކަމަށެވެ. މިކަމާ ގުޅޭގޮތުން ސަރުކާރާއި އިންޓަނެޓުގެ ޚިދުމަތް ފޯރުކޮށްދޭ ފަރާތްތަކުގެ ރަސްމީ ބަހެއް އަދި ނުލިބެއެވެ.
އެކަމަކު މިފަދަ ވެބްސައިޓުތަކަށް އިއްޔެއިން ފެށިގެން އެކްސެސް ކަނޑާލައިފައިވާ ކަމަށް އޮފިޝަލު ވިދާޅުވިއެވެ.
ދިރާގާއި އުރީދޫގެ އިންޓަނެޓް ކަނެކްޝަންތަކުން މިފަދަ ސައިޓްތައް ސާޗުކުރެވުނު ނަމަވެސް މިހާރު އެފަދަ ސައިޓަކަށް ނުވަދެވޭ ކަމަށް ވެއެވެ.
