އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކުރަމުންދާ މައްސަލައަށް އެއްބާރުލުން ދެއްވި އިންތިގާލީ އިންސާފުގެ އޮމްބަޑްސްޕާސަންގެ އޮފީހުގެ ތިން މުވައްޒަފުން ސަސްޕެންޑް ކުރި މައްސަލަ އޭސީސީއިން ކުށްވެރިކޮށްފިއެވެ.
އޭސީސީއިން މިއަދު ބުނީ އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް ދިޔަ އެ ކޮމިޝަންގެ ތަހުގީގު ޓީމުތަކަށް އެ އޮފީހުގެ ބައެއް އިސްވެރިން ހުރަސްއަޅައި އަދި ތަހުގީގަށް އެއްބާރުލުން ދެއްވި މުވައްޒަފުންގެ މަސައްކަތަށް ހުރަސް އަޅައި މުވައްޒަފުންނަށް ދީފައިވާ ބައެއް އެކްސަސްތައް ކަނޑާލައި އެ މުވައްޒަފުން ވަޒީފާގެ މަސްއޫލިއްުޔަތުން ސަސްޕެންޑްކޮށް އެ އޮފީހުން މުވައްޒަފުންނާމެދު ފިޔަވަޅު އަޅާފައިވާތީ އެ ކޮމިޝަނުން އެކަން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
އަދި އޭސީސީއިން ވަނީ އެ ކޮމިޝަނުގެ މަސްއޫލިއްޔަތު އަދާކުރަން އެއްބާރުލުން ދެއްވައި ފަސްޖެހުމެއްނެތި ގާނޫނު ނެގެހެއްޓުމަށް އިންތިގާލީ އޮމްބަޑްސް ޕާސަން އޮފީހުގެ ތިން މުވައްޒަަފަކު މަސައްކަތް ކޮށްދެއްވާފައިވާތީ އެކަން ފާހަގަކޮށް އެ މުވައްޒަފުންނަށް ޝުކުރު އަދާކޮށްފައެވެ.
އޭސީސީއިން ބުނީ ކޮރަޕްޝަންގެ އަމަލުތައް ހުއްޓުވުމަށާއި އެފަަދަ ތުހުމަތުތައް ބަލައި ތަހުގީގުކުރުމަށް ކޮމިޝަނުން ކުރަމުންދާ މަސައްކަތްތަކަށް ގޮންޖައްސަވައި ކޮމިޝަނުގެ މަސްއޫލިއްޔަތު އަދާކުރުމަށް ހުރަސްއެޅުމަށް ޒިންމާދާރު މަގާމުތަކުގައި ތިއްބަވާ ފަރާތްތަކުން މަސައްކަތް ކުރައްވަމުން ގެންދަވާތީ އެފަދަ ފަރާތްތަކާމެދު ގާނޫނީ އިމުގެ ތެެރެއިން އެޅެން ހުރި ފިޔަވަޅުތައް އަޅަމުންދާނެ ކަމަށެވެ.
ތަހުގީގު ޓީމުން އިންތިގާލީ އޮމްބަޑްސް ޕާސަންގެ އޮފީހަށް ގޮސް ކޮމިޝަނުން ހިންގާ ތަހުގީގަށް ބޭނުންވާ ލިޔެކިޔުމާއި މައުލޫމާތު ހޯދުމުގެ މަރުހަލާގައި އެ އޮފީހުން ދެމުންދިޔަ ޚިދުމަތްތަކަށް ބުރޫއަރާފާނެ ނުވަތަ ޚިދުމަތެއް ހުއްޓާލަން ޖެހިދާނެ އެއްވެސް އަމަލެއް ހިންގާފައިނުވާނެ ކަމަށް ވެސް އޭސީސީއިން ވަނީ ބުނެފައެވެ.
One Response
ކިހިނެއހީވި. ވާނީވެސް އެހެންތާ. 4 އަހަރުވީއިރު ވެސް އޭސީސީގެ ދަތެއްނުފެޅި. 5 އަހަރުގެ ދައުރެއް ނިމެން 3 ހަފްތާއަށްވީމާ ދަތްފެޅީ. މުސާރަ ބަގައިގެން ހެޔޮކޮށް އެންމެންވެސް އުޅެނީ