އަންނަ މަހުގެ ނުވަވަނަ ދުވަހު ބާއްވާ ވާ ރިޔާސީ އިންތިހާބުގައި އެމްއާރުއެމްގެ ރައީސް، ފާރިސް މައުމޫން އަމިއްލަ ގޮތުން ވާދަ ކުރެއްވުމަށް ނިންމަވައިފިއެވެ.
އެމްއާރުއެމްގެ ޒައީމް، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް، ރިޔާސީ އިންތިހާބުގައި ވާދަ ކުރައްވާކަން އިއުލާން ކުރެއްވީ އޭނާގެ ޓުވިޓާ އެކައުންޓް މެދުވެރިކޮށް މިއަދު ދެއްވި 30 ސިކުންތުގެ ވީޑީއޯ މެސެޖެެއްގަ އެވެ.
”ލޮބުވެތި ދިވެހި ރައްޔިތުން އެދިވަޑައިގަންނަވާ ގޮތެއްގެ މަތީން ދިވެހިރާއްޖޭގެ ކަންކަން އިސްލާހުކުރުމުގެ މާތް މަގުސަދުގައި މާތްﷲ ގެ ވާގިފުޅާއެކު މިއަހަރުގެ ރިޔާސީ އިންތިހާބުގައި އަމިއްލަ ގޮތުން ވާދަކުރަން ނިންމި ވާހަކަ ތިބޭފުޅުންގެ މައުލޫމާތަށްޓަކައި ހިއްސާކުރަން“ ފާރިސްގެ ވީޑިއޯ މެސެޖުގައިވެއެވެ.
އަމިއްލަ ގޮތުން ރިޔާސީ އިންތިހާބުގައި ވާދަކުރައްވަން ފާރިސް ނިންމެވިއިރު، އޭނާ މިހާރު ވަނީ ރިޔާސީ އިންތިހާބުގައި ވާދަކުރުމަށް ފޯމު ހުށަހެޅުމަށް ބޭނުންވާ 1،500 ސޮއި ހަަމަކުރައްވައިފައެވެ.
ފާރިސް އަމިއްލަ ގޮތުން ރިޔާސީ އިންތިހާބުގައި ވާދަ ކުރެއްވުމަށް ނިންމަވާފައިވާއިރި ގާނޫނުގައި ބުނާ 3،000 މެންބަރުން ހަމަނުވުމުން އޭނާ ރައީސްކަން ކުރައްވާ އެމްއާރުއެމް އުވާލުމަށް އިލެކްޝަން ކޮމިޝަން (އީސީ) އިން ނިންމި މައްސަލަ މިވަގުތު އޮތީ ސިވިލް ކޯޓުގައެވެ.
ސަރުކާރު ކޯލިޝަންގައި އޮތް އެމްއާރްއެމް އުވާލުމުގައި ސަރުކާރުގެ ނުފޫޒު އޮތް ކަމަށް ފާރިސް މީގެ ކުރިން ތުހުމަތުކުރައްވާފައިވެސް ވެއެވެ.
One Response
ދެންކީކޭ ބުނާނީ ދޯ؟ ބަލަންތިބެމާ! ޢުމަރަށް ވާވަރުވެސް ނުވާނެއެވެ. ބައްޕާފުޅު އަސާޖަހައިގެން ނެރުނުނަމަވެސް މާ ގިނަ ވޯޓް ލިބުނީހެވެ. ކޮންމެ އެއްޗެއްގެވެސް އެކްސްޕައަރީ ޑޭޓެއްވާނެއެވެ. ތި އޮތީ އެކްސްޕަޔަރު ވެފައެވެ. ގަބޫލުފުޅު ކުރައްވާށެވެ!