މިދިޔަ ޖޫން މަހުގައި ބާރު ސްޕީޑުގައި ސައިކަލު ދުއްވާފައި ދަނިކޮށް އެމްއެންޔޫގެ ލެކްޗަރަރ ޢަލީ ހަފީޒުގެ ގައިގައި ސައިކަލުން ޖެހި އެކްސިޑެންޓްވި މައްސަލާގައި ހައްޔަރުކުރި ޒުވާނާ މިއަދު ބަންދުން ދޫކޮށްލައިފިއެވެ.
ޖޫންމަހުގެ 28 ވަނަ ދުވަހުގެ ރޭ ފަތިސް ނަމާދުން ފައިބައިގެން ހިނގާފައި ދަނިކޮށް ބާރު ސްޕީޑުގައި ދުއްވާފައި ދިޔަ ސައިކަލަކުން ޖެހި އެމްއެންޔޫގެ ލެކްޗަރަރ ޢަލީ ހަފީޒަށް ސީރިއަސް އަނިޔާތަކެއް ލިބުނެވެ.
ސައިކަލު ދުއްވަން އިން 22 އަހަރުގެ ފިރިހެން މީހާ ހައްޔަރުކޮށް ބަންދަށް ފުރަތަމަ ޖެހީ 15 ދުވަހެވެ. އޭގެފަހުން އޭނާގެ ބަންދަށް އިތުރުކުރި 15 ދުވަސް ހަމަވެފައިވާތީ މިއަދު ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ ޝަރުތުކުރުމަށްފަހު އޭނާ ދޫކޮށްލައިފައެވެ.
އޭނާއަކީ ސައިކަލު ދުއްވުމުގެ ލައިސަންސް އޮންނަ މީހެއް ނޫނެވެ. އޭނާ ވަނީ ބާރު ސްޕީޑުގައި ސައިކަލު ދުއްވި ކަމަށް އިއުތިރާފުވެފައެވެ.
ކޯޓުގައި އޭނާގެ ފަރާތުން ބުނެފައިވާ ގޮތުގައި އެކްސިޑެންޓް ހިނގީ ހަފީޒު ކަފިހި ހުރަސް މަތިން ހުރަސް ކުރައްވަނިކޮށެއް ނޫނެވެ. އަދި އޭނާ ސައިކަލުގައި ދަނިކޮށް ހަފީޒު މަގު ހުރަސްކުރައްވަމުން ސައިކަލު އަންނަ ތަން ފެނިގެން “ޕެނިކްވެގެން“ ސައިކަލާ ދިމާއަށް ދުއްވައިގަނެވުމުން ސައިކަލުގައި ލައިގަނެގެން އެކްސިޑެންޓުވީ ކަމަށް ވެސް ބުނެފައިވެއެވެ.
