ޖުމްހޫރީ ޕާޓީ (ޖޭޕީ) ގެ ކުރީގެ ސެކްރެޓަރީ ޖެނެރަލް އަދި ރައީސް އޮފީހުގެ މިނިސްޓަރު އަޙްމަދު ސަމީރާއި އެމްޑަބްލިޔުއެސްސީގެ މެނޭޖިންގ ޑިރެކްޓަރު ޙަަސަން ޝާހު ހިމެނިވަޑައިގަންނަވާހެން ޖޭޕީން ވަކިވެވަޑައިގެންނެވި ގިނަ ބޭފުޅުންތަކެއް މިއަދު އެމްޑީޕީއަށް ސޮއިކުރައްވައިފިއެވެ.
އެމްޑީޕީން މިރޭ ކުރި ޓުވީޓެއްގައިި ބުނެފައިވަނީ ކުރީގެ ކައުންސިލް މެންބަރުން ހިމެނިވަޑައިގަންނަވާ ގޮތަށް ޖޭޕީގެ ކުރީގެ ގިނަ މެންބަރުންތަކެއް މިއަދު އެމްޑީޕީއަށް ސޮއިކުރައްވާފައިވާ ކަމަށެވެ.
އެބޭފުޅުންގެ މެމްބަރޝިޕް ފޯމާ ހަވާލުވެވަޑައިގަތީ ރައީސް އިބްރާހިމް މުޙައްމަދު ޞާލިޙެވެ. މި ރަސްމިއްޔާތުގައި އެމްޑީޕީގެ ޗެއާޕާސަން ފައްޔާޟް އިސްމާޢީލް ވެސް ހިމެނިވަޑައިގަންނަވައެވެ.
ސަމީރާއި ޝާހުގެ އިތުރުން މިއަދު އެމްޑީޕީއަށް ސޮއިކުރެއްވި ބޭފުޅުންގެ ތެރޭގައި ޖުމްހޫރީ ޕާޓީގެ ސްލޮޓެއްގައި ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުޙައްމަދު ސަލީމް (ސޯނީ) އާއި ހެރިޓޭޖް މިނިސްޓްރީގެ ޑެޕިއުޓީ މިނިސްޓަރުކަމުގައި ހުންނެވި ކުރީގެ ފިލްމީ ތަރި ވަލީދާ ވަލީދު ހިމެނިވަޑައިގަންނަވައެވެ.
މި އެންމެ ބޭފުޅުން ވެސް ޖޭޕީން ވަކިވެވަޑައިގަތީ އަންނަ ރިޔާސީ އިންތިޚާބުގައި އެ ޕާޓީން ރައީސް އިބްރާހިމް މުޙައްމަދު ޞާލިޙަށް ތާއީދުނުކުރަން ނިންމައި ވަކިން އިންތިޚާބުގައި ވާދަކުރަން ނިންމި ހިސާބުންނެވެ.
