ދިވެހި ދައުލަތަށް ގިނަ ދުވަސްތަކެއް ވަންދެން ޚިދުމަތް ކުރެއްވި ކުރީގެ މިނިސްޓަރު ޢަބްދުﷲ ޖަމީލް އަވަހާރަވެއްޖެއެވެ.
އާލަސްކަންފުޅާ އުޅުއްވާތާ ދުވަސްކޮޅަކަށްފަހު ޖަމީލް އަވަހާރަވީ މިއަދުގެ ހެނދުނުގެ ވަގުތެއްގައި މާލޭގައެވެ.
ޢަބްދުﷲ ޖަމީލަކީ ޝައިޚް މުޙައްމަދު ޖަމީލްދީދީގެ ދޮށީ ދަރިކަލުންނެވެ.
ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޢަބްދުﷲ ޖަމީލް ވަނީ 54 އަހަރަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރައްވައިފައެވެ. އެގޮތުން 6 ވުޒާރާއެއްގެ ވަޒީރުކަން ވެސް ކުރެއްވިއެވެ.
11 ނޮވެންބަރު 1983 ގައި އޭރުގެ ރައީސް މައުމޫން ޢަބްދުލްޤައްޔޫމް ދެވަނަ ދައުރަކަށް ރައީސުލްޖުމްހޫރިއްޔާ ކަމުގެ މަގާމުގެ ހުވާ ހުވާކުރެއްވުމަށްފަހު އެ މަނިކުފާނުގެ ކެބިނެޓްގައި ޢަބްދުﷲ ޖަމީލް ހިމެނުއްވިއެވެ. އެ މަނިކުފާނު އައްޔަން ކުރެއްވީ މިނިސްޓަރ އޮފް ހެލްތުގެ މަގާމަށެވެ.
އޭގެފަހުން ރައީސް މައުމޫންގެ ރިޔާސީ ތިންވަނަ ދައުރުގެ ކެބިނެޓް އެކުލަވައިލެއްވިއިރު ޢަބްދުﷲ ޖަމީލް އައްޔަން ކުރެއްވީ މިނިސްޓަރ އޮފް ފިޝަރީޒް އެންޑް އެގްރިކަލްޗަރ ކަމުގެ މަގާމަށެވެ. އެއަށްފަހު މިނިސްޓަރ އޮފް އެޓޮލްސް އެޑްމިނިސްޓްރޭޝަން ކަމުގެ މަގާމާއި މިނިސްޓަރ އޮފް ޓޫރިޒަމް ކަމުގެ މަގާމާއި މިނިސްޓަރ އޮފް ހޯމް އެފެއާޒް ކަމުގެ މަގާމާއި މިނިސްޓަރ އޮފް ހޯމް އެފެއާޒް އެންޑް ހައުސިންގ ކަމުގެ މަގާމު އަދާކުރެއްވިއެވެ.
ޢަބްދުﷲ ޖަމީލަކީ ރައްޔިތުންގެ މަޖިލީހުގައިވެސް ވަރަށް މުހިންމު ދައުރެއް އަދާކުރައްވައިފައިވާ ބޭފުޅެކެވެ. އެގޮތުން ރައްޔިތުންގެ މަޖިލީހުގެ ތ.އަތޮޅު މެންބަރުކަން 30 އަހަރަށްވުރެ ދިގު މުއްދަތެއްގައި ކުރެއްވިއެވެ. އަދި ރައްޔިތުންގެ ޚާއްސަ މަޖިލީހުގެ ތ.އަތޮޅު މެންބަރުކަން 14 އަހަރަށްވުރެ ގިނަދުވަހު ކުރެއްވިއެވެ.
ޖަމީލަށް ވަނީ މިނިވަން 25 ގެ އާންމު ޚިދުމަތުގެ އިނާމު ވެސް ލިބިވަޑައިގެންފައެވެ.
