ފަޅެއްގެ މަތީގައި ގެތައް އަތުރާލައި އެ ގެތަކުގައި ދިރިއުޅުމަކީ ދިވެހިންނަށް މުޅީން އާ ކަމެކެވެ. ނަމަވެސް އެއީ، ރާއްޖެ ފަދަ ކަނޑުގެ ސަރަހައްދު ބޮޑު ގައުމެއްގައި ކުރެވިދާނެ ކަމެކެވެ. އެހެންވެ އެ ވިސްނުން ނެރެ ދުނިޔޭގެ ފުރަތަމަ ފްލޯޓިން ސިޓީ ރާއްޖޭގައި ހެދުމަށް، އެންމެ ފުރަތަމަ ސޮއިކުރީ ކުރީގެ ރައީސް މުހައްމަދު ނަޝީދުގެ ސަރުކާރުގައި، 2010 ވަނަ އަހަރުގަ އެވެ. އެ އެއްބަސްވުމުގައި އޭރުގެ ސޮއި ކުރެއްވީ ނަޝީދު ސަރުކާރުގެ އިކޮނޮމިކް މިނިސްޓަރު މުހަންމަދު ރަޝީދެވެ. ނަމަވެސް އެ މަޝްރޫއަށް ފަހުން ވީގޮތެއް ނޭނގެ އެވެ. އެ މަޝްރޫއުގައި ދެވަނަ ފަހަރަށް ސޮއިކުރީ 2019 ވަނަ އަހަރު އެވެ.
ނެދަލޭންޑްސްގެ ޑަޗް ޑޮކްލޭންޑް ކުންފުންޏާ ހަވާލުކޮށްގެން ހެދުމަށް ނިންމާފައިވާ ފްލޯޓިން ސިޓީގައި 5000 އަށްވުރެ ގިނަ ގެ ތަރައްގީކުރުމަށް ހަމަޖެހިފައިވާއިރު، މި މަޝްރޫއު ކުރިއަށް ގެންދިއުމަށް ރާވާފައި އޮތީ ދިހަ އަހަރަށް ބަހާލައިގެންނެވެ. ފްލޯޓިން ސިޓީ ހެދުމަށް ޖުމްލަ ފަސް ފަޅެއް ޑަޗް ޑޮކްލޭންޑަށް ދޫކުރިއެވެ. އޭގެ ތެރޭގައި އާރަށް ކައިރީގައި އޮތް 200 ހެކްޓަރުގެ ބޮޑު ފަޅެއްވެސް ހިމެނެއެވެ.
ފްލޯޓިން ސިޓީގެ އަމަލީ މަސައްކަތް 2021 ވަނަ އަހަރުގެ ފަހުކޮޅު ފެށުމަށް ތައްޔާރީތަކެއް ވަމުން އަންނަކަމަށް އޭރު ޑަޗް ޑޮކްލޭންޑުން ބުނެފައިވެއެވެ. ނަމަވެސް އެ އަހަރުވެސް ހުސްވީ އެ މަސައްކަތް ނުފެށިއެވެ. ފްލޯޓިން ސިޓީގެ މަޝްރޫއު ނުފެށި ދިގުލައިގެންދާތީ ގިނަ ބައެއްގެ ފާޑުވުން އަމާޒުވުމާއެކު މިދިޔަ އަހަރުގެ ފެބްރުއަރީ މަހުގެ ތެރޭގައި ފްލޯޓިން ހައުސްތައް އެޅުމަށް ޑަޗް ޑޮކްލޭންޑުން ބައިސަން މޯލްޑިވްސް ކިޔާ އަމިއްލަ ކުންފުންޏަކާ ހަވާލުކުރިއެވެ.
ޔޮޓު މެރީނާއަކާއި ފަސްތަރީގެ ދެ ރިސޯޓު އަދި ކުދި ޕިކްނިކް އައިލެންޑްތަކާއި ހޮސްޕިޓަލާއި ސްކޫލާއި ޝޮޕިންމޯލްގެ އިތުރުން ކައުންސިލާއި ސަރުކާރު އޮފީސްތައް ފްލޯޓިން ސިޓީގައި ހެދުމަށް އޮތީ ޕްލޭންކޮށްފައެވެ. ފްލޯޓިން ހައުސްތައް އެޅުމަށް ބައިސަންއާ ހަވާލުވި ފަހުންވެސް އަހަރެއްހާ ދުވަސްވީއިރުވެސް އަމަލީ މަސައްކަތް ފެށިފައެއް ނުވެއެވެ. އެހެން އޮވެފައި، މިދިޔަ މަހުގެ ތެރޭގައި ބައިސަންއިން ވަނީ ފްލޯޓިން ސިޓީގެ ފުރަތަމަ ގެތައް ހުޅުމާލޭ ފަޅުގައި ބަހައްޓައިފައެވެ. ނަމަވެސް އެއީވެސް ނަމޫނާއެކެކެވެ. ޓަގެއްގެ މަތީގައި އަތުރާލައިފައިވާ ގެތައް ބަލާލަން ރީއްޗަށް އެހާ ހިސާބުންވެސް މަޝްރޫއުގައި ހަގީގީ ކުލަ ޖެހޭނެ ކަމާމެދު ގިނަ ބައެއްގެ ހިތުގައި ސުވާލު އުފެދުނެވެ.
މިހެން މިކަން އޮއްވައި، ދެން އިވެން ފެށި އަޑަކީ، ދުނިޔޭ ފުރަތަމަ ފްލޯޓިން ސިޓީ ރާއްޖޭގައި ހެދުމުގެ މަސައްކަތް ކުރާ ނެދަލޭންޑްސްގެ ޑަޗް ޑޮކްލޭންޑްސް ކުންފުންޏަށް ދިން ފަޅުތަކުގެ ތެރެއިން އެއްވެސް ފަޅެއްގައި މަސައްކަތް ކުރިއަށްނުގެންދާ ކަމަށާއި ނަމަވެސް ބައެއް ފަޅުތައް ވިއްކާލާފައިވާ ކަމަށެވެ. އެކަން ޓޫރިޒަމް މިނިސްޓްރީންވެސް ޔަގީންކޮށްދެއެެވެ.
ޑަޗް ޑޮކްލެންޑްސްއަށް ދޫކުރި ފަޅުތައް ވިއްކުމާއި ހިއްކުމުގެ ހުއްދަ އެއްބަސްވުމުގެ ދަށުން ލިބިދީފައިި ވާއިރު، ޓޫރިަމް މިނިސްޓްރީން ބުނެފައިވާ ގޮތުގައި އެ ކުންފުންނަށް ދޫކުރި ފަސް ފަޅުގެ ތެރެއިން ދެ ފަޅެއް ވިއްކާލާފައިވާ ކަމަށެވެ އޭގެ ތެރެއިން އެއް ފަޅު ވިއްކާލީ 100،000 ޑޮލަރު (1.53 މިލިއަން ރުފިޔާ)އަށެވެ. އަނެއް ފަޅު ވިއްކާލީ 5،000 ޑޮލަރު (76،750ރ.) އަށެވެ.
ފްލޯޓިން ސިޓީގެ މަޝްރޫއުގައި ހަގީގީ ކުލަ ނުޖެހި އެކި ތާރީހުތައް ދެމުން އައިސް އެންމެ ފަހުން ފަޅުތައް ކުޑަ އަގުގައި ވިއްކާލުމާ ހަމައިންވެސް މި މަޝްރޫއު ކުރިއަށްގެންދެވޭނެ ކަމާމެދު ވަނީ ސުވާލު އުފެދިފައެވެ. ބުނި ހުރިހާ ތާރީހެއް ފަހަނަ އަޅައި ދިޔައިރު ދޫކުރި ފަސް ފަޅު އަދިވެސް އޮތީ ހުސްކޮށެވެ. ކަޑައެއްވެސް ޖަހައެއް ނުލައެވެ. ފްލޯޓިން ސިޓީއަކީ ރައްޔިތުންނަށް ދެއްކި ދަޅައަކަށް މިވަނީ ވެފައެވެ.
