ބޯކޮށް ވާރޭ ވެހި ފެންބޮޑުވުމުގެ ސަބަބުން މެލޭޝިއާގެ ދެކުނުގެ ޖޮހޯރު ސްޓޭޓުގައި ގާތްގަނޑަކަށް 41،000 މީހުން ގެދޮރު ދޫކޮށް ދާންޖެހިފައިވާއިރު ފާއިތުވި ހަފުތާގެ ތެރޭގައި މަދުވެގެން ހަތަރު މީހަކު މަރުވެފައިވާ ކަމަށް އޮފިޝަލުން މިއަދު ވިދާޅުވެއްޖެއެވެ.
”ކުރިން އަބަދުވެސް ނޮވެމްބަރު އަދި ޑިސެމްބަރު މަހު ވާރޭ ވެހޭ މޫސުމަށް ތައްޔާރުވަމުން ދިޔައީ،“ ޖޮހޯރުގެ ބާޓޫ ޕަހަތު ޑިސްޓްރިކްޓްގެ ޔޮންގް ޕެންގް ޓައުންގެ އުމުރުން 57 އަހަރުގެ މުހައްމަދު ނޫރު ސާދު ރޮއިޓާސް އަށް ބުންޏެވެ.
މެލޭޝިއާގެ އޮތޯރިޓީތަކުން މިހާރު ވަނީ ފެންބޮޑުވުމުގެ ސަބަބުން ގެދޮރުން ނުކުންނަން ޖެހުނު މީހުންނަށް 200 ވަގުތީ ހިޔާ ފޯރުކޮށްދީފައެވެ.
ކުރިއަށް އޮތް ދުވަސްތަކުގައި އިތުރު ވާރޭ ވެހޭނެ ކަމުގެ އިންޒާރު މޫސުމާ ބެހޭ އިދާރާއިން ދޭއިރު ގިނައިން ވާރޭ ވެހޭނީ ދެކުނުގެ ސްޓޭޓްތަކަށެވެ.
މެލޭޝިޔާގައި ކުރިމަތިވި އެންމެ ނުރައްކާތެރި ފެންބޮޑުވުމުގެ ހާދިސާ ހިނގާފައި ވަނީ 2014 ވަނަ އަހަރުއެވެ. އެ ފަހަރު ފެންބޮޑުވުމާ ގުޅިގެން 118,000 މީހުން ގެދޮރު ދޫކޮށް ދިޔައެެވެ.
މެލޭޝިއާއަކީ ގިނަ އަދަދަކަށް ދިވެހިންވެސް ދިރިއުޅެމުން އަންނަ ގައުމެކެވެ.
