މާލޭ ޓީޖެޓީ ސަރަހައްދުގައި މިއަދު ހަވީރު ބިދޭސީންތަކެއްގެ މެދުގައި ހިންގި ގްރޫޕު މާރާމާރީއެއްގައި ފަސް މީހަކަށް އަނިޔާވެއްޖެ އެވެ.
ފުލުހުން މިރޭ ބުނީ ބިދޭސީންތަކެއްގެ މެދުގައި މާރާމާރީއެއް ހިނގައިގެން އުޅޭ ކަމުގެ ރިޕޯޓު މިއަދު ހަވީރު 16:50 ލިބިފައިވާ ކަމަށެވެ.
އެ މާރާމާރީގައި ފަސް މީހަކަށް އެކިވަރުގެ އަނިޔާވެގެން އައިޖީއެމްއެޗަށް ގެންގޮސްފައިވާ ކަމަށާއި އެ މާރާމާރީއާ ގުޅިގެން 11 ބިދޭސީއަކު ހައްޔަރުކޮށްފައިވާކަމަށްވެސް ފުލުހުން ބުންޏެވެ.
އެ މާރާމާރީގައި ބިދޭސީން ވަނީ ލަކުޑިބުރި ފަދަތަކެތި ބޭނުންކޮށްފައެވެ.
ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.
