ޕްރޮގްރެސިވް ކޮންގްރެސް ކޯލިޝަނުގެ ލީޑަރު އަދި ކުރީގެ ރައީސް ޔާމީން ޢަބްދުލްޤައްޔޫމަކީ ތަންދޮރު ދެނެވަޑައިގަންނަވާ ބޭފުޅެއްކަމަށް ވިދާޅުވެ ރައްޔިތުން މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވާހަކަ ދައްކަވަނީ އަމިއްލަ އެދުމެއް އޮތުމުން ކަމަށް ޕީއެންސީގެ ރައީސް ޢަބްދުއްރަޙީމް (އަދުރޭ) ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގެ ކެމްޕޭނުގެތެރެއިން ނަޝީދު އިއްޔެ ބޭއްވެވ ނޫސްވެރިންގެ ބައްދަލުވުމުގައި ވަނީ ރައީސް ޔާމީނަކީ ވަރަށް އިންޓަލެކްޗުއަލް, ވަރަށް އެކަޑަމިކް ބޭފުޅެއް ކަމަށް ވިދާޅުވެފައެވެ. ރައީސް ޔާމީނަކީ ތަންދޮރު ދެނެވަޑައިގަންނަވާ ވިޝަނެއް އޮތް ބޭފުޅެއްކަމަށް ވެސް ނަޝީދު ވިދާޅުވިއެވެ.

11 އަހަރުގެ ޖަލު ޙުކުމެއް ތަންފީޒު ކުރައްވަމުން ގެންދަވާ ރައީސް ޔާމީން މިނިވަންކުރަން ގޮވާލައި އިދިކޮޅު ކޯލިޝަނުން ރޭ ބޭއްވި އެއްވުމުގައި ވާހަކަދައްކަވަމުން އަދުރޭ ވިދާޅުވީ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައީސް ޞާލިޙާއި ރައީސް ނަޝީދާ ދެބޭފުޅުންގެ ތެރެއިން ކޮންމެ ބޭފުޅަކު އިންތިޚާބުން މޮޅުވިޔަސް ޕީޕީއެމްއަށް ކުރާނެ ފައިދާއެއް ނޯންނާނެ ކަމަށެވެ. އެ ބޭފުޅުން އެ ދައްކަވާ ވާހަކަ އެކަން ނިމޭއިރު އޮންނާނީ ނިމިފައި ކަމަށާއި ދެން ފެންނާނީ ގޮސް ބައްދައިލައްވާ މަންޒަރު ކަމަށެވެ. 

“ކޮންމެހެން ރަށްރަށަށް ވަޑައިގެން ޕީޕީއެމްގެ ގޭގެއަށް ވަދެ ސައިބެއްލެވި ވާހަކަ ވިދާޅުވާނެކަމެއް ނެތޭ. ޕީޕީއެމްގެ ލޯތްބެއް ގަދަރެއް ތިބޭފުޅުންނަކަށް ނެތޭ. އެ އިހުތިރާމެއް ނެތޭ. ސަބަބަކީ ތިބޭފުޅުންނަކީ ޕީޕީއެމްއަކަށް ވެސް ދިވެހި ރައްޔިތުންނަކަށް ވެސް އޯގާތެރިބައެއް ނޫނޭ. ރަޙްމަތްތެރި ބައެއް ނޫނޭ.“

އަދުރޭ ވިދާޅުވީ އެމްޑީޕއަކުން ރައީސް ޔާމީނަކަށް ހެވެއްނޭދޭނެ ކަމަށެވެ. އަދި ރައީސް ޔާމީނަކީ ތަންދޮރު ދެނެވަޑައިގަންނަވާ ބޭފުޅެއްކަމަށް ވިދާޅުވެ ރައީސް ނަޝީދު ވާހަކަ ދައްކަވަނީ އަމިއްލަ އެދުމެއް އޮތުމުން ކަމަށް ވެސް އަދުރޭ ވިދާޅުވިއެވެ.

“މިއަދު ބައެއް ބޭފުޅުން އެބައުޅޭ ރައީސް ޔާމީނަކީ މާ ރަނގަޅު ބޭފުޅަކަށް ހައްދައިގެން. ބަލަ ރައީސް ޔާމީނަކީ ރަނގަޅު ބޭފުޅެއްކަން މޮޅު ބޭފުޅެއްކަން ތަންދޮރުފިލާވަޑައިގެން ހުންނެވި ބޭފުޅެއްކަން މި ރާއްޖޭގެ ރައްޔިތުން އެބަ ގަބޫލުކުރެއޭ. އެކަން ގަބޫލު ނުކުރަނީ އެބޭފުޅުން. މިއަދު ކޮންމެވެސް އަމިއްލަ އެދުމެއް އޮތީމަ ރައީސް ޔާމީން ވެއްޖެ އެކަޑަމިކް ބޭފުޅަކަށް. ރައީސް ޔާމީންވެއްޖެ ވިޝަނެއް ގެންގުޅުއްވާ ބޭފުޅަކަށް. ރައީސް ޔާމީންވެއްޖެ ކަންކަން ކުރަން ދެނެވަޑައިގަންނަވާ ބޭފުޅަކަށް.“ އަދުރޭ ވިދާޅުވިއެވެ.

އަދުރޭ އިތުރަށް ވިދާޅުވި ގޮތުގައި އަދިވެސް މި ޤައުމު ކުރިއަށް ގެންދެވޭނީ ރައީސް ޔާމީނަށެވެ. އަދި އެ މަނިކުފާނު މިނިވަންވާނެ ކަމަށް ވެސް އޭނާ ވިދާޅުވިއެވެ.