މިދިޔަ ހުކުރު ދުވަހު ރަޝިޔާގެ ނޫހަކުން ރިޕޯޓުކޮށްފައިވާ ގޮތުގައި އެ ގައުމުގެ މިސައިލް ލެބްގެ ޑިރެކްޓާ، އެންޑްރެއި ޝިޕްލިޔުކް ވަނީ ހައްޔަރުކޮށްފައެވެ. އޭނާ ހައްޔަރުކޮށްފައިވަނީ އަސްކަރީ ސިއްރުތައް ނުހިފެއްޓުމާއި ގައުމަށް ޚިޔާނާތްތެރިވެފައިވާ ކަމުގެ ތުހުމަތާ އެކުގައެވެ.
ހައިޕާސޮނިކް މިސައިލަކީ އަޑު ދަތުރުކުރާ ސްޕީޑުގެ ނުވަ ގުނަ ބާރަށް ދަތުރުކުރާ މިސައިލެކެވެ. ރަޝިޔާގެ ރައީސް، ވްލަޑްމީރް ޕުޓިން ވަނީ މީގެ ކުރިން މި މިސައިލްތަކަށް ތައުރީފްކޮށްފައެވެ. އޭނާ ބުނެފައިވާ ގޮތުގައިވާ މި މިސައިލްތަކުގެ ސަބަބުން ރަޝިޔާގެ އަސްކަރީ ބާރު ގަދަވެގެންދާނެއެވެ.
އެންޑްރެއި އަކީ ރަޝިޔާގެ ނޮވޮސިބާސްކް އިންސްޓިޓިއުޓްގެ ހައިޕާސޮނިކްސް ލެބޯޓްރީ ހިންގުމާއި ހަވާލުވެ ހުންނެވި އެންމެ އިސް ސައިންސުވެރިޔާއެވެ. އެ ގައުމުގެ ނޫސްތަކުން ރިޕޯޓުކުރާ ގޮތުގައި އޭނާ ހައްޔަރުކޮށް މިހާރު ވަނީ މޮސްކޯގެ ލެފޮޓޮވޯ ޖަލަށް ލައިފައެވެ.
ފާއިތުވި އަހަރުތަކުގެ ތެރޭގައި ރަޝީޔާގައި ސައެންސްވެރިންގެ މައްޗަށް އެކި ކަހަލަ ތުހުމަތުކޮށް ހައްޔަރުކޮށްފައިވާ މިންވަރު އިތުރުވެފައިވާކަން ފާހަގަކުރެވެއެވެ. އަދި ހައްޔަރުކުރެވޭ ސައެންސްވެރިންނަށް 20 އަހަރުގެ ދިގު ޖަލު ހުކުމް އިއްވާފައިވެއެވެ.
