ތުރުކީގެ ބޮޑުވަޒީރު އުރުދުޣާން އަށް މަލާމާތް ކުރުމާ ގުޅިގެން ތުރުކީގެ މަޝްހޫރު ނޫސްވެރިއެއް ކަމަށްވާ ސަދެފް ކަބާސް ހައްޔަރުކުރުމަށް ތުރުކީގެ ކޯޓަކުން އަމުރުކޮށްފިއެވެ. މިއަމުރުގައި ވާގޮތުން މައްސަލަ ނިމެންދެން އޭނާ ހުންނާނީ ޖަލުބަންދުގައެވެ.
އޭނާ ހައްޔަރުކުރުމަށް އަމުރު ނެރެފައި ވަނީ ތުރުކީގެ ރައީސް ޠައްޔިބް އުރްދުޣާންއަށް މަލާމާތްކުރުމާ ގުޅިގެން ކޯޓަށް ހުށައެޅިފައިވާ މައްސަލައަކާ ގުޅިގެންނެވެ.
ކަބާސް ހައްޔަރުކޮށްފައި ވަނީ ހޮނިހިރު ދުވަހުގެ ހެނދުނުގެ ވަގުތެއްގައެވެ. ކަބާސްގެ މައްސަލަ ކޯޓަށް ހުށައަޅަފައި ވަނީ އުރްދުޣާންއަށް މަލާމާތް ކުރުމުގެ ގޮތުން އޭނާގެ ޓްވިޓާގެ އިތުރުން އުރްދުޣާންއާ އިދިކޮޅު މީޑިއާ އަކަށް ދިން އިންޓަވިއުއެއްގައި ދައްކާފައިވާ ވާހަކަތަކާ ގުޅިގެންނެވެ. މިގޮތުން ހަބާސް ދައްކާފައިވާ ވާހަކަތަކުގެ ތެރޭގައި ”ގެރިއެއް ގަނޑުވަރަކަށް ވަނުމުން އޭތި ރަސްކަލަކަށްނުވާނެ. ގަނޑުވަރު ބަދަލުވާނީ ގެރި ކޮށްޓަކަށް.“ މިފަދަ ނުސީދާ ބުނުންތައް ހިމެނެއެވެ.
އޭނާ ދެއްކި ވާހަކަތަކަށް ސަރުކާރާއި ތުރުކީގެ ގިނަ އިސްވެރިން ވަނީ ނުރުހުން ފާޅުކޮށްފައެވެ. ތުރުކީގެ ކޮމިއުނިކޭޝަންސް ޑިޕާޓްމެންޓްގެ ވެރިޔާ ފަހްރަތިން އަލްތުން ވަނީ ކަބާސް ދެއްކި ވާހަކަތައް ކުށްވެރިކޮށްފައެވެ. މީގެ އިތުރުން ކަބާސްއަށް ގާނޫނާއި އެއްގޮތަށް ފިޔަވަޅު އެޅިގެން ދާނެކަމަށް ތުރުކީގެ ޖަސްޓިސް މިނިސްޓަރު، އަބްދުލްހާމިތް ގުލްތީ ވަނީ ވިދާޅުވެފައެވެ.
އުރްދުޣާން ވެރިކަމަށް ވަޑައިގަތުމަށްފަހު ހައްދަވާފައިވާ އުރްދުޣާނަށް މަލާމާތްކުރުން މަނާ ކުރާ ގާނޫނުގެ ސަބަބުން އެތައް ހާސް ނޫސްވެރިން ވަނީ މިހާތަނަށް ޖަލަށްލާފައެވެ.
