ޗައިނާއަށް 2022 ވަނަ އަހަރު ފެށިފައި ވަނީ މީގެ ގާތްގަނޑަކަށް ދެ އަހަރު ކުރިން ކޮރޯނާ ކޮންޓްރޯލް ކުރުމަށްފަހު 7 ދުވަހުގެ ތެރޭގައި އެންމެ ގިނަ އަދަދެއްގެ މީހުން ކޮރޯނާ ވައިރަހަށް ފައްސިވި ހަފްތާއާއި އެކުއެވެ. ޗައިނާއަކީ ކޮރޯނާ ވައިރަހާއި ދެކޮޅަށް ދުނިޔޭގެ އެންމެ ހަރުކަށި ބައެއް އުސޫލުތައް ތަންފީޒު ކުރަމުންދާ ގައުމެވެ.

ހޮނިހިރު ދުވަހު ޗައިނާގެ ނެޝަނަލް ހެލްތު ކޮމިޝަނުން ބުނެފައިވާ ގޮތުގައި ޑިސެމްބަރު 31ވަނަ ދުވަހު 175 މީހުން ވަނީ ވައިރަހަށް ޕޮޒިޓިވް ވެފައެވެ. އެއާ އެކު ޗައިނާއިން ފާއިތުވި ހަފްތާ ތެރޭގައި ވައިރަހަށް ޕޮޒިޓިވްވި މީޙުންގެ އަދަދު ޖުމުލަ 1،151އަށް އަރާފައިވެއެވެ.

މިހާ ގިނަ އަދަދެއްގެ ބަޔަކަށް ކޮރޯނާ ޖެހެމުންދާ ސަބަބެއްކަމަށް ބެލެވިފައިވަނީ އުތުރުދެކުނު ޒިއާން ސިޓީގައި ކޮރޯނާ ފެތުރެން ފެށުމެވެ. ޒިއާން އަކީ 13 މިލިއަން ރައްޔިތުންގެ އާބާދީއެއް އޮންނަ އިންޑަސްޓްރިއަލް އަދި ޓެކް ހަބެކެވެ.

ޒިއާން ސިޓީއިން ފެށިފައިވާ މި އައުޓްބްރޭކް ވެފައިވަނީ ކޮރޯނާ ފެތުރުން ހުއްޓުވުމަށްޓަކާ ފިޔަވަޅުތައް ހަރުދަނާ ކުރުމަށްކަމާ ބެހޭ ފަރާތްތަކަށް ލިބިގެންދާ އިތުރު ހިތްވަރެކެވެ.

ޒިއާން ސިޓީ ފާއިތުވި 10 ދުވަސް ހޭދަކޮށްފައިވަނީ ލޮކްްޑައުންގައެވެ. މި މުއްދަތުގެ ތެރޭގައި 1،451 ރައްޔިތުންގެ ފަރާތުންވަނީ ކޮރޯނާގެ އަލާމާތްތައް ފެނިފައެވެ.

ޗައިނާގެ ނޫހަކުން ލިޔެފައުވާ ގޮތުގައި ޒިއާންގައި ފެށިފައިވާ އައުޓްބްރޭކް ކޮންޓްރޯލް ކުރެވިފައި ނުވުމުގެ ސަބަބުން ކުރިއަށް އޮތީ ދަތި ދުވަސްތަކެކެވެ.

ޝާންޒީ ޕރޮވިސަނަލް ކޮމިޓީ އޮފް ދަ ކޮމިއުނިސްޓް ޕާޓީ އޮފް ޗައިނާގެ ސެކްރަޓަރީ، ލިއު ގުޒްްހޮންގް ބުނެފައިވާ ގޮތުގައި ވައިރަހުގެ ފެތުރުން ކޮންޓްރޯލް ކުރުމަށް ކުރިޔަށް އޮތް ދުވަސްތަކުގައި އިސްކަން ދޭންޖެހޭނެއެވެ.