ރާއްޖޭގެ ކަނޑުތައް ގަދަވާނެތީ ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ކޯސްޓުގާޑުން އިލްތިމާސްކުރައްވައިފިއެވެ.
އެމްއެންޑީއެފުން ވަނީ ވައިގަދަވެ ކުރިމަތިވެދާނެ ހާދިސާއަކަށް ހުރިހާ ފަރާތްތަކުން ސަމާލްވުމަށް އިލްތިމާސްކޮށްފައެވެ. އަދި ހާއްސަކޮށް ކަނޑު ދަތުރުކުރުމުގައި ސަމާލްވުމަށް އެމްއެންޑީއެފްން ވަނީ އިލްތިމާސްކޮށްފައެވެ.
ކުރިއަށް އޮތް ތިން ދުވަހު ރާއްޖެ އަށް ވައިދަވާނެކަމަށް ލަފާކޮށް މޫސުމާ ބެހޭ ގައުމީ އިދާރާއިން ވަނީ ރާއްޖޭގެ ބޮޑު ބަޔަކަށް ޔެލޯ އެލަރޓްވެސްވަނީ ނެރެފައެވެ. މި އެލާޓް ނެރެފައިވަނީ ހއ.އަތޮޅާއި ހދ.އަތޮޅު ފިޔަވައި ރާއްޖޭގެ ހުރިހާ ސަރަހައްދުތަކަށެވެ.
އެމްއެންޑީއެފްން ވަނީ ކަނޑު ދަތުރަށް ނިކުންނަ އުޅަނދުފަހަރުގެ އޮޑިވެރިންނާއި، ކެޕްޓަނުން މޫސުމާބެހޭ އެންމެ ފަހުގެ މައުލޫމާތު ހޯއްދުމަށްފަހު ދަތުރުތައް ރޭވުމަށާއި، ދަތުރަށް ފުރުމުގެ ކުރިން އަންގަންޖެހޭ ފަރާތްތަކަށް އެންގުމާއި އަދި އުޅަނދުގައި ލައިފްޖެކެޓާއި މުވާސަލާތީ ނިޒާމާއި ދިޔަހިއްކާ ޕަންޕުފަދަ ތަކެތި ހުރީ ރަނގަޅަށްތޯ ޗެކް ކުރުމަށްވަނީ އިލްތިމާސްކުރައްވާފައެވެ.
އަދި ހާއްސަކޮށް ކުދި އަދި ސަލާމަތީގޮތުން ރައްކާތެރިކަން ކުޑަ އުޅަނދުފަހަރުގައި ރޭގަނޑު، އަދި ވިއްސާރައިރު ދަތުރު ނުކުރުމަށްވަނީ އިލްތިމާސްކުރައްވާފައެވެ. މުދާ އުފުލާ އުޅަނދުފަހަރުންވެސް މުދާ ބަރުކުރުމުގައި ގަވާއިދުތަކަށް އަމަލު ކުރުމާއި އޮޑިފަހަރު އަޅާފައި ބާއްވާއިރު ރަނގަޅަށް ސަމާލުވެ ބެލެހެއްޓުމަށްވަނީ އިލްތިމާސްކުރައްވާފައެވެ.
މޫސުމުމާ ބެހޭ އިދާރާއިން މޫސުމަށް ސަމާލުވުމަށް އެލާޓް ނެރެފައި ހުންނަ އިރުވެސް އެކަމަށް ސަމާލުކަން ނުދީ ކަނޑުދަތުރުތައ ކުރުމުން މީހުން މަރުވުންފަދަ ހިތާމަވެރި ހާދިސާތައް އަންނަނީ ދިމާވަމުންނެވެ.
