ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްގެން ދިން ހަމަލާއަށް ފަހު ހޯމް މިނިސްޓަރު އިމްރާން އަބްދުﷲ ދެއްކެވި ވާހަކަފުޅުތަކާމެދު އީވާ ނުރުހުންފާޅުކޮށްފިއެވެ.

ރައީސް ނަޝީދަށް ހަމަލާ ދިން ރޭ ނޫސްވެރިންގެ ސުވާލުތަކަށް ޖަވާބުދެއްވަމުން އިމްރާން ވިދާޅުވީ ރައީސް ނަޝީދުގެ ހަށިކޮޅަށް އެކިވަރުގެ އަނިޔާ ލިބިފައިވާ ކަމަށާ ނަމަވެސް ފުރާނަފުޅަށް ނުރައްކާވާ ފަދަ އަނިޔާއެއް ލިބިވަޑައިގެންފައި ނުވާކަމށެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މި ކަމާ ގުޅިގެން އެންމެ ފުރަތަމަ ސުވާލުކުރެއްވީ އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް އެވެ.

އޭނާ ވިދާޅުވީ ރައީސް ނަޝީދަށް ހަމަލާދިން ރޭ އޭޑިކޭގައި ފަރުވާ ދެމުްނ ދަނިކޮށް އެމަނިކުފާނުގެ ސިއްހީ ހާލުކޮޅު ރަނގަޅަށް ބައްލަވާނުލައްވައި ސިއްހީ ހާލުކޮޅު ރަނގަޅު ކަމަށް މިނިސްޓަރު މީޑިއާގައި ވިދާޅުވީ ކީއްވެގެންތޯ އެވެ.

އޭގެ ޖަވާބުގައި އިމްރާން ވިދާޅުވީ ރައީސް ނަޝީދުގެ ހާލުކޮޅާ ގުޅޭގޮތުން އެ ރޭ އޭނާ ވާހަކަ ދެއްކެވީ އޭޑީކޭގެ ޑޮކްޓަރުންނާއި ރައީސް ނަޝީދުގެ އާއިލާގެ ބޭފުޅުން ހިއްސާ ކުރެއްވި މައުލޫމާތަށް ބަލައިގެން ކަމަށެވެ.
“ އަޅުގަނޑު ދެންނެވި އެއްޗެއް މުޅިން ދޮގެކޭ ބުނެވެން ނެތް ގޮތަށް ހަގީގަތް ފެންނަން އެބަ އޮތް. އަޅުގަނޑު ހަމަ ދެންނެވީ އެބޭފުޅުން ދެއްވި މައުލޫމާތުގެ ތެރެއިން ވަރަށް ސާފު އެއްޗެއް އަޅުގަނޑު ދެންނެވީ. އެއީ ދޮގެއް ނޫންކަން ފެންނަން އެބަ އޮތް. އަޅުގަނޑު ދެންނެވީ ޑޮކްޓަރުންނާ ހަވާލާދީ އާއިލާއަށް ލިބިފައިވާ މައުލޫމާތު“ އިމްރާން ވިދާޅުވި އެވެ.

މިނިސްޓަރު އިމްރާން މަޖިލީހުގައި އެހެން ވިދާޅުވުމާ ގުޅިގެން ރިއާސަތުގައި އިންނެވި ރައީސް ނަޝީދުގެ އާއިލީ ބޭފުޅެއްކަމަށްވާ މަޖިލީހުގެ ނައިބު ރައީސް އަދި ގަލޮޅު އުތުރުދާއިރާގެ މެންބަރު އީވާ އަބްދުﷲ ވިދާޅުވީ މިނިސްޓަރު އިމްރާން ދެއްކެވި ވާހަކަފުޅާ ގުޅިގެން އާއިލާ އިން ކަންބޮޑުވެއްޖެ ކަމަށެވެ.

އީވާ ވިދާޅުވީ ރައީސް ނަޝީދު އޭޑީކޭއަށް ގެންދިއުމަށް ފަހު އެމަނިކުފާނުގެ ސިއްހީ ހާލުކޮޅު އެންމެ ގާތުން ބެއްލެވި އެއް ބޭފުޅަކީ އެކަމަނާ ކަމަށާ ޑޮކްޓަރުންގެ އެއްވެސް ބޭފުޅަކު އަދި އާއިލާގެ އެއްވެސް ބޭފުޅަކު ރައީސް ނަޝީދުގެ ހާލުކޮޅު ރަނގަޅު ކަމަށް ވިދާޅުވާނެ ކަމަށް ދެކެވަޑައި ނުގަންނަވާ ކަމަށެވެ.

”އަޅުގަނޑަކަށް ހިޔެއް ނުވޭ ޑޮކްޓަރަކު ވެސް އަދި އާއިލާއިން ވެސް ރައީސް ނަޝީދުގެ ހާލުކޮޅު ރަނގަޅު ކަމަކަށް އެންމެ ފަހަރަކު ވެސް އެވީ 20 ގަޑިއިރު ތެރޭގައި ވިދާޅުވެފައި އޮންނާނެ ހެނެއް. އެހެންވީމަ އާއިލާއާ ހަވާލާދެއްވައި ވިދާޅުވާ އެއްޗެއް ކަމަށް ވިދާޅުވީމަ، ޑޮކްޓަރުން ވިދާޅުވެ އަދި އާއިލާއާ ހަވާލާދެއްވައި ވިދާޅުވި އެއްޗެއް ކަމަށް ވިދާޅުވީމަ އަޅުގަނޑު ހިތާމަކުރަން. އެއީ އަޅުގަނޑަކީ ރައީސް ނަޝީދު ސާޖަރީގައި އޮންނެވިހާ ވަގުތަކު، މަޖިލިސް ޖަލްސާއަށް ވަނުމަށް ފިޔަވައި އެ ހޮސްޕިޓަލުން ނުކުތް މީހެއް ނޫން. އަދި ޑޮކްޓަރުން ދެއްވި ހުރިހާ އަޕްޑޭޓެއް އަޅުގަނޑު ހުރިހާ ވަގުތެއްގައި ވެސް އަޑު އެހިން. އަޅުގަނޑަށް ކަށަވަރު އާއިލާއަކުން ރައީސް ނަޝީދުގެ ހާލަތު އެވަގުތު ރަނގަޅު ކަމަށް ވިދާޅުވެފައި ނޯންނާނެކަން،“ އީވާ ވިދާޅުވި އެވެ.

އީވާ ދެއްކެވި ވާހަކަފުޅާ ގުޅިގެން މިނިސްޓަރު އިމްރާން ވަނީ އޭނާ ދެއްކެވި ވާހަކަފުޅު ދިފާއުކުރައްވާ ވާހަކަފުޅު ދައްކަވާފައެވެ. އިމްރާން ވިދާޅުވީ ރައީސް ނަޝީދަށް ދިން ހަމަލާއާއި ގުޅިގެން އެމަނިކުފާނަށް އަނިޔާތަކެއް ލިބިވަޑައިގެންނެވި ކަމަށާއި އެހެން ނަމަވެސް ފުރާނަފުޅަށް ގެއްލުންވާ ވަރުގެ އަނިޔާއެއް ލިބިވަޑައިގެންފައި ނުވާ ކަމަށެވެ.

ރައީސް ނަޝީދަށް އަވަސް ޝިފާއަކަށް އެދިވަޑައިގަންނަވަމުން އިމްރާން ވިދާޅުވީ އެ ހަމަލާގެ ހަގީގަތްތަކާއި ރާވައި ހަރަދު ކުރި މީހުން ހޯދަން ތަހުގީގު ހިންގަމުންދާ ކަމަށާ އަދި މި ތަހުގީގަށް ކުރިއެރުން ލިބޭކަމަށް ވެސް އޭނާ ވިދާޅުވިއެވެ.

އަދި ތަހުގީގު ކުރިއަށްދާ ވަރަކުން ތަހުގީގުގެ މައުލޫމާތު މަޖިލީހާއި މަޖިލީހުގެ ނައިބު ރައީސްއާ ހިއްސާ ކުރައްވަމުން ގެންދަވާ ކަން ކަމަށްވެސް ހޯމް މިނިސްޓަރު އިމްރާން އަބްދުﷲ މަޖިލީހުގެ މިއަދުގެ ޖަލްސާގައި ވިދާޅުވިއެވެ.