ނޭޕާލްގެ ހިމްލުންގް ހިމާލް ފަރުބަދައިގެ ބޭސް ކޭމްޕަށް އާދީއްތަ ދުވަހު އައި ސުނޯ ކަނޑައިގެން ދިއުމުގެ ހާދިސާއެއްގައި ދެ މީހަކު މަރުވެ، އިތުރު 10 މީހަކު ގެއްލިފައިވާ ކަމަށް އެ ގައުމުގެ ފުލުހުން ބުނެފިއެވެ.

އުސްމިނުގައި 7،126 މީޓަރު ހުންނަ ހިމްލުންގް ހިމާލްގެ ބޭސް ކޭމްޕަށް މި ހާދިސާ ހިނގާފައިވަނީ މަނަންގް ޑިސްޓްރިކްޓްގެ ނާރް ފޫ ސަރަހައްދުގައެވެ. މި ހާދިސާގައި ފަރުބަދައަށް އަރާ މީހުންނާއި އެހީތެރިން ތިބި ޓެންޓު ވަނީ ސުނޯގެ ދަށުވެފައެވެ.

ފުލުހުން ބުނި ގޮތުގައި މި ހާދިސާ ހިނގި ވަގުތު އެ ކޭމްޕުގައި ފަރުބަދައަށް އަރާ ނުވަ މީހުންނާއި 13 އެހީތެރިން ތިއްބެވެ. ފުރަތަމަ ރިޕޯޓްތައް ބުނި ގޮތުގައި ގާތްގަނޑަކަށް 12 މީހުން ގެއްލުނު ނަމަވެސް، ފަހުން ވަނީ މަރުވި ދެ މީހެއްގެ ހަށިގަނޑު ފަރުބަދަމަތިން ފެނިފައެވެ.

ޑެޕިއުޓީ ސުޕްރިންޓެންޑެންޓް އޮފް ޕޮލިސް ޝައިލެންދުރަ ތާޕާ ވިދާޅުވީ، އަދިވެސް ނުފެނި ގެއްލިފައިވާ 10 މީހުންނަކީ ވެސް ނޭޕާލްގެ ރައްޔިތުން ކަމަށެވެ.

ކަމާބެހޭ ފަރާތްތަކުން މީހުން ސަލާމަތްކުރުމުގެ މަސައްކަތް ފެށުމާއެކު، އެ ސަރަހައްދަށް ވަނީ ހެލިކޮޕްޓަރެއް ފޮނުވާފައެވެ. އެ ކުންފުނިތަކުގެ ތެރެއިން އެއް ކުންފުނީގެ އޮފިޝަލަކު ވިދާޅުވި ގޮތުގައި ގެއްލިފައިވާ މީހުންނަކީ ހިމާލަޔަން ހޮލިޑޭސް ނޭޕާލް އަދި އިމޭޖިން ނޭޕާލް ޓްރެކްސް އާ ގުޅުން ހުރި މީހުންނެވެ.

އޮފިޝަލް އިތުރަށް ވިދާޅުވީ، ސުނޯ ކަނޑައިގެން ދިޔުމުގެ ހާދިސާއަށް ފަހު އެ ޓީމުގެ އެކަކަށް ގުޅޭ ގޮތްވި ކަމަށާއި، ނަމަވެސް ޓީމުގެ މެންބަރުން އެކި ދިމަދިމާލަށް ވަކިވެފައިވާ ކަމަށާއި އިތުރު އެތައް ބަޔަކާ ބެހޭ އެއްވެސް މައުލޫމާތެއް ލިބިފައި ނުވާ ކަމަށް އޭނާ މައުލޫމާތު ދީފައިވާ ކަމަށެވެ.

ނޭޕާލުގެ ފަރުބަދަމަތީގެ ސަރަހައްދުތަކަށް މެދުކެނޑުމެއްނެތި ވާރޭވެހި، ސްނޯ ފޭބުމުގެ ސަބަބުން ބިންގަނޑު ކަނޑައިގެން ދިއުމާއި ފެންބޮޑުވުމުގެ ހާދިސާތައް ވެސް ހިނގަމުންދާތީ، އެ ގައުމުގެ ކަމާބެހޭ ފަރާތްތަކުން ދަނީ މި ހާލަތު ވަރަށް ގާތުން ބަލަމުންނެވެ.