އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް ހިންގާ އަސްކަރީ އޮޕަރޭޝަންތައް ”ތިމަންމަނިކުފާނަށް ފުދިއްޖެއޭ ވިދާޅުވަންދެން“ ކުރިއަށްދާނެ ކަމަށް އިއުލާނުކުރެއްވުމާ ގުޅިގެން، އެމެރިކާއާއި އީރާނާ ދެމެދު އޮތް ހަމަނުޖެހުން ބުދަ ދުވަހު ވަނީ ވަރަށް ބޮޑަށް އިތުރުވެފައެވެ. މިއީ ހަލުވިކަމާއެކު އިތުރުވަމުންދާ ކުރިމަތިލުންތަކަށް އަވަސް ނިމުމެއް ނާންނާނެކަމުގެ ނިޝާނެކެވެ.
ޓްރަމްޕް މިހެން ވިދާޅުވީ، ހޯރްމޫޒް ކަނޑުއޮޅި ކައިރީގައިވާ އީރާނުގެ ދެކުނުގެ އެތައް އަސްކަރީ މަރުކަޒުތަކަކަށް އަމާޒުކޮށް، ބޮޑެތި ހަމަލާތަކެއް ދީފައިވާކަން އެމެރިކާގެ ސެންޓްރަލް ކޮމާންޑް ސެންޓްކޮމް އިން ކަށަވަރުކޮށްދިން ވަގުތެއްގައެވެ. އެމެރިކާގެ އަސްކަރިއްޔާއިން ބުނި ގޮތުގައި، ހަތް ގަޑިއިރަށް ދެމިގެންދިޔަ މި އޮޕަރޭޝަންގައި ފައިޓަރު ޖެޓްތަކާއި، ޑްރޯންތަކާއި އަދި ކަނޑުގެ އުޅަނދުފަހަރު ބޭނުންކޮށްގެން މިސައިލް އަދި ޑްރޯން އިންސްޓަލޭޝަންތަކަށާއި، ކަނޑުގެ އަސްކަރީ ވަސީލަތްތަކަށާއި އައްސޭރިފަށުގެ ދިފާއީ ނިޒާމުތަކަށް ހަމަލާދީފައިވެއެވެ. ވޮޝިންޓަނުން ބުނީ މި އޮޕަރޭޝަންގެ މަގްސަދަކީ ދުނިޔޭގެ އެންމެ ބާރުބޮޑު ހަކަތައިގެ ކޮރިޑޯއިން ދަތުރުކުރާ ވިޔަފާރި އުޅަނދުފަހަރާއި އާންމު އުޅަނދުފަހަރަށް އީރާނުން ދެމުންދާ ނުރައްކާ ކުޑަކުރުން ކަމަށެވެ.
މި ފަހުގެ ހަމަލާތަކާ އެކު، އީރާނުގެ ބަނދަރުތަކަށް ވަދެ ނިކުމެވާ އުޅަނދުފަހަރު ހުއްޓުވުމަށް އެމެރިކާގެ ކަނޑުގެ ސިފައިން ހިންގާ ބްލޮކޭޑް އަލުން ފެށުމުން، އިސްތިރާތީޖީ ގޮތުން މުހިންމު ގަލްފު ސަރަހައްދުގެ މަސްރަހު ވަނީ އިތުރަށް ގޯސްވެފައެވެ.
އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި ބަންދަރު އައްބާސް، ބުޝެހްރް، ސިރިކް، އަހްވާޒް އަދި ގޭޝްމް އާއި ހެންގާމް ޖަޒީރާ ހިމެނޭ ގޮތަށް ދެކުނުގެ އެކި ސަރަހައްދުތަކުގައި ގޮވުންތަކުގެ އަޑު އިވިފައިވެއެވެ. އީރާނުގެ ކަމާބެހޭ ފަރާތްތަކުން ލިބުނު ގެއްލުންތައް ބަލަމުންދާއިރު، ގިނަ ސިޓީތަކެއްގައި ވައިގެ ދިފާއީ ނިޒާމުތައް ވަނީ ހަރަކާތްތެރިކޮށްފައެވެ. އަދި ދެހްލޮރާންގައި ހުރި ފެން ބަންދުކުރާ ފެކްޓްރީއަކަށާއި އީރާނުގެ އިރުދެކުނުގެ އަސްކަރީ މަރުކަޒުތަކަށް ހަމަލާދީފައިވާ ކަމަށް ރިޕޯޓްތައް ބުނާއިރު، މަރުވި މީހުންގެ އަދަދު ރަސްމީކޮށް ކަށަވަރުކޮށްދީފައެއް ނުވެއެވެ.
އީރާނުން ދަނީ މެދުއިރުމަތީގައި ހުރި އެމެރިކާގެ މަރުކަޒުތަކަށް އަމާޒުކޮށް އަސްކަރީ އޮޕަރޭޝަންތަކުން ރައްދު ދެމުންނެވެ. އުރުދުންގައި ހުރި އެމެރިކާގެ އަސްކަރީ ވަސީލަތްތަކަށް ހަމަލާދީފައިވާ ކަމަށް އީރާނުގެ އޮފިޝަލުން ބުނާއިރު، އިސްލާމިކް ރިވޮލިއުޝަނަރީ ގާޑް ކޯޕްސް އައި.އާރު.ޖީ.ސީ އިން ވަނީ ބަހްރޭންގައި ހުންނަ އެމެރިކާގެ ކަނޑުގެ ސިފައިންގެ ފިފްތް ފްލީޓް ބޭސްއަށް ހަމަލާދީ، ކޮމާންޑް ސެންޓަރުތަކާއި، ގުދަންތަކާއި ތެޔޮ ރައްކާކުރާ ތަންތަނަށް ގެއްލުން ދީފައިވާ ކަމަށް ބުނެފައެވެ. ނަމަވެސް މި ދައުވާތަކުގެ މިނިވަން ކަށަވަރުކަމެއް އަދި ލިބިފައެއް ނުވެއެވެ.
ހަމަނުޖެހުންތައް ކުރިއަށްދާނަމަ އެމެރިކާއާއި އެގައުމުގެ ބައިވެރިންނަށް ތެލާއި ގޭސް އެކްސްޕޯޓްކުރާ މަގުތަކަކީ އަމާޒުފަތްގަނޑަކަށް ވެދާނެ ކަމުގެ އިންޒާރުވެސް އައި.އާރު.ޖީ.ސީ އިން ވަނީ ދީފައެވެ. ސަރަހައްދީ ހަކަތައިގެ އެކްސްޕޯޓަކީ ”އެންމެންނަށް އޮތް އެއްޗަކަށް ނުވަތަ އެކަކަށްވެސް ނެތް އެއްޗަކަށް“ ވާންޖެހޭނެ ކަމަށް ބުނެ، ގަލްފުގެ ދަތުރުފަތުރާއި ހަކަތައިގެ އިންފްރާސްޓްރަކްޗާއަށް އިތުރު ބުރޫއަރުވާނެ ކަމުގެ އިޝާރާތެއް އީރާނުން ވަނީ ދީފައެވެ.
މިދަނޑިވަޅުގައި، ”އެމެރިކާގެ ނުބައިކަން“ ނިމުމަކަށް އަންނަންދެން ހޯރްމޫޒް ކަނޑުއޮޅި ބަންދުކޮށްފައި އޮންނާނެ ކަމަށް އައި.އާރު.ޖީ.ސީ އިން ވަނީ ބުނެފައެވެ. ކުވެއިތުގެ އެކި ސަރަހައްދުތަކަށް ގޮވުންތަކުގެ ބާރު އަޑު އިވުމާ ގުޅިގެން، އީރާނުގެ ޑްރޯންތަކެއް ހުއްޓުވާފައިވާ ކަމަށް އެގައުމުގެ ޑިފެންސް މިނިސްޓްރީން ވެސް ވަނީ ރިޕޯޓްކޮށްފައެވެ.
ފުޅާވަމުންދާ މި ހަމަނުޖެހުމުގެ ސަބަބުން ސަރަހައްދީ ހަތިޔާރު އެޅި ޖަމާއަތްތަކުގެ ބައިވެރިވުން އިތުރުވެދާނެ ކަމުގެ ކަންބޮޑުވުން ވަނީ އުފެދިފައެވެ. އިރާގުގެ އީރާނަށް ތާއީދުކުރާ ކަތާއިބު ހިޒްބުالله އިން ވަނީ އީރާނާ ދެކޮޅަށް ކުރާ ކޮންމެ އާ ހަނގުރާމައަކަށް އިރާގުގެ ރެސިސްޓެންސް ފޯސްތަކުން ވަގުތުން ރައްދު ދޭނެ ކަމުގެ އިންޒާރު ދީފައެވެ. މީގެ ސަބަބުން މި ކުރިމަތިލުން މުޅި ސަރަހައްދީ ހަނގުރާމައަކަށް ބަދަލުވެ، ދުނިޔޭގެ ހަކަތައިގެ ބާޒާރަށާއި ބައިނަލްއަގުވާމީ ސަލާމަތަށް ބޮޑެތި ނޭދެވޭ އަސަރުތަކެއް ކޮށްފާނެ ކަމުގެ ބިރު ވަނީ ބޮޑުވެފައެވެ.
