މާލެއަށް ރާއްޖޭގެ އެންމެން ހިޖުރަ ކުރަން މަޖުބޫރު ވާ ސަބަބުތައް ގިނައެވެ. އެސަބަބުތައް ނޭނގޭ މީހަކު ވެސް ނެތެވެ. މިހާރު މާލޭގައި ހިނގާފަ އުޅެވޭކަށް އަދި ދުއްވާ އެއްޗެއްގައި ވެސް އުޅެވޭކަށް ނެތެވެ.

ތޮއްޖެހުން ބޮޑީއެވެ. މީހުން އެހާ ގިނަ އެވެ. ދުއްވާ ވެހިކަލްތައް އެހާ ގިނައެވެ. ހިނގާ މީހުންނަށާއި ދުއްވާ އެއްޗެއްސަށް އޮތް ބިމުގެ ޖާގަ ކުޑައީއެވެ. މިކަމަށް އޮތް ހައްލަކީ، ރާއްޖޭގެ އުތުރާއި މެދުރާއްޖެ ތެރެއާއި ދެކުނުގައި ގެދޮރު އިމާރާތް ކޮށްދިނުމަށް ފަހު ފައިސާ ދައްކާ ޚަލާޞްކުރުމުން އިމާރާތާއި ބިން ކޮޅު އަމިއްލަ ކުރެވޭނެ ގޮތަށް ހެދުމެވެ. ދެން ވަޒީފާތައް އިތުރު ކުރެވޭނެ އިންވެސްޓްމަންޓްތައް ޤާއިމުކޮށް މަތީ ތަޢުލީމު ވެސް އެ ސަރަހައްދުތަކުން ލިބޭނެ ނިޒާމެއް އޮތުމެވެ.

ހިޖުރަކުރަން މަޖުބޫރުވާ އެންމެ ބޮޑު ސަބަބަކީ އާއްމުދަނީ ހޯދުމަށާއި މަތީ ތަޢުލީމާއި ޞިއްޙީ ފަރުވާ ހޯދުމަށެވެ. ރާއްޖެ އަކީ ބިން ނެތް ޤައުމެއް ނޫނެވެ. މާލެ އަށާއި ހުޅުމާލެ އަށް ނުކަތާވަރަށް މީހުން ތޮއްޖެއްސުމުގެ ސިޔާސަތަކީ، ކޮރަޕްޝަނާއި އިޖްތިމާއި މައްސަލަތައް ދިމާވުމަށް މެދުވެރިވާ ސަބަބެއްވެސްމެއެވެ. މާލޭގައި މިހާރު އޮތް އާބާދީގެ ސަބަބުން ތޮއްޖެހިފައިވާ މިންވަރަށް ބަލާއިރު ހިނގާ ނުރައްކާތެރި ކާރިސާތަކުން ރައްކާތެރިކަން ފޯރުކޮށް ދިނުމަކީ ހުރިހާ ގޮތަކަށް ބެލި ނަމަވެސް ފަސޭހަ ކަމަކަށް ނުވާނެއެވެ. މިސާލަކަށް ތަނެއްގައި އަލިފާނުގެ ހާދިސާއެއް މެދުވެރި ވާހިނދު އަލިފާން ނިއްވާ ވެހިކަލްތައް އައުމަށް ޓްރެފިކް ތޮއްޖެހުމުގެ ސަބަބުން ލަސްވެއެވެ. އެކި ކާރިސާތަކާއި ގުޅިގެން ޒަހަމުވާ ފަރާތްތައް ފަރުވާދޭ މަރުކަޒުތަކަށް ގެންދިޔުމަށް ދަތިތައް ކުރިމަތިވެއެވެ.

މިހުރިހާ ކަމެއް މިގޮތަށް ތޮއްޖެއްސުމަށް ފަހު އާބާދީ ބޮޑީ މާލޭގައި ކަމަށްވާތީއޭ ބުނެ ދައުލަތަށް ލިބޭހައި، އާމްދަނީއެއްގެ 3/2 (ތިންބައިކުޅަ ދޭއް) އަދި ނަގާ ލޯނުތަކުގެ 3/2 (ތިންބައިކުޅަ ދޭއް) ބަޔަށް ވުރެ ބޮޑު ޢަދަދެއް މާލޭ ސަރަހައްދަށް ނުވަތަ މާލެއަށް ޚަރަދު ކުރުމުގެ ސިޔާސަތެއް އޮތުމަކީ، ހަމަޖެހޭ ކަމެއް ކަމަކަށް އަހުރެންގެ ބުއްދިއަކަށް ނުވިސްނެއެވެ. މިއީ މި ސަރުކާރުން އެކަނި ގެންގުޅެމުން އަންނަ ސިޔާސަތެއް ވެސް ނޫނެވެ. މިގޮތުން މާލޭ ވިލިގިލި ބުރިޖަކީ އެމް.ޑީ.ޕީ ގެ ސަރުކާރުން ފެށި އިޝްރާފް ބޮޑު ގެއްލުން ބޮޑު މަސައްކަތެކެވެ.

ރައްޔިތުންނަށް ލިބޭނެ ހިތްހަމަޖެހުމާއި ލުއި ފަސޭހަ އަށްވުރެ ބޮޑަށް އުފުލަންޖެހޭނެ ބުރަ ބޮޑު މަސައްކަތެކެވެ. މިފަދަ ދޯހަޅި ސިޔާސަތުތަކުގެ ސަބަބުން ދަރަނި ބޮޑުވެ ތަކެތީގެ އަގާއި ޚިދުމަތުގެ އަގުތައް ހިފެހެއްޓޭ ގޮތް ނުވާނަމަ ޚިދުމަތުގެ އަގުތައް ބޮޑުވި ވަރަކަށް ރައްޔިތުންނަށް ލިބޭ އެއްޗަކުން ދެކޮޅު ނުޖެއްސޭނެއެވެ. ބުނާތީ އިވެނީ ، ނުއުފުލޭ ވަރުގެ މިފަދަ ބޮޑެތި ޕްރޮޖެކްޓްތައް ފެށުމުގެ ބޭނުމަކަށް ރާއްޖޭގައި ވެފައި އޮންނަނީ ބޮޑު ޕްރޮޖެކްޓަކުން ބޮޑު ކަޓެއް، މަސައްކަތް ހަވާލު ކުރާ ފަރާތްތަކަށް ލިބޭނެ ފުރުޞަތު ފަހިކުރުންކަމަށެވެ. މިކަންކަން ކަށަވަރު ވާނީ ވެސް މިނިވަންކަމާއެކު އޮޑިޓެއް ވެސް ކުރެވޭނަމަ އެވެ.