މެދުކެނޑުމަކަށް ފަހު، ކުރީގެ ރައީސް އަބްދުﷲ ޔާމީނުގެ މައްޗަށް ދައުލަތުން އުފުލާފައިވާ ހިޔާނާތުގެ ދައުވާތަކުގެ ޝަރީއަތްތަކުގެ އަޑުއެހުން މި ހަފުތާގެ ދުވަސްތަކުގައި ކްރިމިނަލް ކޯޓުން ތާވަލުކޮޮށްފި އެވެ.
ޔާމީނުގެ މައްޗަށް ދެ މައްސަލައެއްގެ ޝަރީއަތް ކްރިމިނަލް ކޯޓުގައި ހިނގަމުން އެބަ ދެ އެވެ.
އެއް މައްސަލައަކީ ރ. ފުއްގިރި ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލައިގައި އެ މަނިކުފާނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިންގެ ދައުވާގެ މައްސަލައެވެ. އެ މައްސަލައިގެ އަޑުއެހުމެއް އެންމެ ފަހުން ބޭއްވީ މިދިޔަ އަހަރުގެ އޮގަސްޓު މަހުގެ ތެރޭގައެވެ.
ކްރިމިނަލް ކޯޓުން މިއަދު ބުނީ އެ މައްސަލައިގެ އަޑުއެހުމެއް އަންގާރަ ދުވަހަށް ތާވަލުކޮށްފައިވާ ކަމަށެވެ.
އަނެއް މައްސަލައަކީ ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނުގެ މައްސަލައިގައި އުފުލި މަނީ ލޯންޑަރިންގެ ދައުވާއާއި ރިޝްވަތު ގަބޫލުކުރުމުގެ ދައުވާގެ މައްސަލައެވެ. އެ މައްސަލާގައި ކްރިމިނަލް ކޯޓުން ޔާމީނުގެ މައްޗަށް 11 އަހަރުގެ ޖަލު ހުކުމެއް 2022، ގައި އިއްވި އެވެ. ހައި ކޯޓުގައި މައްސަލަ ބެލުމަށް ފަހު ކްރިމިނަލް ކޯޓުން އަލުން މައްސަލަ ބަލަން ޖެހޭ ކަމަށެވެ.
ކްރިމިނަލް ކޯޓުން ބުނި ގޮތުގައި ހައި ކޯޓުން ތަހުވީލުކޮށްފައިވާ މައްސަލައިގެ ފުރަތަމަ އަޑުއެހުން އަންނަ ބުދަ ދުވަހަށް ވަނީ ތާވަލުކޮށްފަ އެވެ.
ރައީސް ޔާމީންގެ ޝަރީއަތްތައް ތާވަލުކޮށްފައިވާއިރު، މި ފަހަކަށް އައިސް އެ މަނިކުފާނު ގެންދަވަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. އެގޮތުން ކޮރަޕްޝަންގެ އެތައް ތުހުމަތެއް އެ މަނިކުފާނު ވަނީ ކުރައްވާފައެވެ.
